തികച്ചും ആരോഗ്യകരമായ രീതിയിൽ, വളരെ കുറഞ്ഞ ചിലവിൽ റെസ്റ്റോറന്റ് സ്റ്റൈലിൽ നല്ല മൊരിഞ്ഞ ചിക്കൻ നഗ്ഗറ്റ്സ് (Chicken Nuggets) ഇനി വീട്ടിൽത്തന്നെ ഉണ്ടാക്കാം. പുറമേ നല്ല ക്രിസ്പിയായും ഉള്ളിൽ നല്ല ജ്യൂസിയായും മൃദുവായും ഇത് തയ്യാറാക്കുന്നതിനായി ‘ബ്രൈനിങ്’ രീതി ഉപയോഗിക്കാവുന്നതാണ്. ചിക്കൻ കഷ്ണങ്ങൾ മസാല ചേർക്കുന്നതിന് മുൻപായി മോരിലോ തൈര് വെള്ളത്തിലോ കുതിർത്തു വെക്കുന്ന ഈ രീതി ചിക്കന്റെ ഈർപ്പം നിലനിർത്താനും നഗ്ഗറ്റ്സ് കൂടുതൽ രുചികരമാക്കാനും സഹായിക്കും. സമയം കുറവാണെങ്കിൽ ഈ ഘട്ടം ഒഴിവാക്കാമെങ്കിലും ബ്രൈൻ ചെയ്തെടുക്കുന്ന ചിക്കൻ നഗ്ഗറ്റ്സിന് രുചി കൂടും.
ആവശ്യമായ സാധനങ്ങൾ:
ചിക്കൻ ബ്രെസ്റ്റ് (ചെറിയ ചതുരക്കഷ്ണങ്ങളാക്കിയത്) – 500 ഗ്രാം
തൈര് – കാൽ കപ്പ് (വെള്ളം ചേർത്ത് മോരാക്കിയത്)
മുട്ട – 1 എണ്ണം (നന്നായി അടിച്ചെടുത്തത്)
മൈദ അല്ലെങ്കിൽ കോൺഫ്ലോർ – അര കപ്പ്
ബ്രെഡ് ക്രംസ് – ആവശ്യത്തിന്
വെളുത്തുള്ളി പൗഡർ, ഗരം മസാല, മുളകുപൊടി/പാപ്രിക – ആവശ്യത്തിന്
ഉപ്പ്, എണ്ണ – പാകത്തിന്
തയ്യാറാക്കുന്ന വിധം:
ആദ്യം തന്നെ കാൽ കപ്പ് തൈരിൽ അല്പം ഉപ്പും ഒന്നര കപ്പ് വെള്ളവും ചേർത്ത് നന്നായി അടിച്ചെടുക്കുക. ഇതിലേക്ക് ഒരു ഇഞ്ച് വലിപ്പത്തിൽ മുറിച്ചുവെച്ച ചിക്കൻ കഷ്ണങ്ങൾ ചേർത്ത് 3 മുതൽ 12 മണിക്കൂർ വരെ ഫ്രിഡ്ജിൽ വെച്ച് കുതിർക്കുക (ബ്രൈനിങ്). ശേഷം ചിക്കൻ പുറത്തെടുത്ത് വെളുത്തുള്ളി പൗഡർ, ഗരം മസാല, മുളകുപൊടി, ആവശ്യത്തിന് ഉപ്പ് എന്നിവ ചേർത്ത് നന്നായി പുരട്ടി വെക്കുക. മറ്റൊരു പാത്രത്തിൽ മുട്ട നന്നായി അടിച്ചുവെക്കുക. കൂടാതെ മൈദയും ബ്രെഡ് ക്രംസും വെവ്വേറെ പാത്രങ്ങളിൽ തയ്യാറാക്കി വെക്കണം.
ഇനി മസാല പുരട്ടിയ ചിക്കൻ കഷ്ണങ്ങൾ ഓരോന്നായി എടുത്ത് ആദ്യം മൈദയിൽ നന്നായി മുക്കുക. അതിനുശേഷം അടിച്ചുവെച്ച മുട്ടയിൽ മുക്കിയെടുത്ത്, ഒടുവിൽ ബ്രെഡ് ക്രംസിൽ നന്നായി പൊതിഞ്ഞെടുക്കുക (മുട്ട ഉപയോഗിക്കാത്തവർക്ക് മോര് ലായനിയിൽ മുക്കിയെടുക്കാം). ചുവട് കട്ടിയുള്ള ഒരു പാത്രത്തിൽ എണ്ണ ചൂടാക്കി, തയ്യാറാക്കിവെച്ച ചിക്കൻ കഷ്ണങ്ങൾ ഇട്ട് ഇടത്തരം തീയിൽ വറുത്തെടുക്കുക. ഒരു വശം ഗോൾഡൻ ബ്രൗൺ നിറമാകുമ്പോൾ മറിച്ചിട്ട് വേവിക്കണം. 5-7 മിനിറ്റിനുള്ളിൽ ക്രിസ്പി ചിക്കൻ നഗ്ഗറ്റ്സ് തയ്യാറാകും. ഇത് എണ്ണ വാലാൻ വെച്ച ശേഷം സോസിനൊപ്പമോ മയോണൈസിനൊപ്പമോ ചൂടോടെ വിളമ്പാം.
എയർ ഫ്രൈയർ അല്ലെങ്കിൽ ഓവൻ ഉപയോഗിക്കുന്നവർക്ക്:
കൂടുതൽ ആരോഗ്യകരമായ രീതിയിൽ എണ്ണയില്ലാതെ ഇത് തയ്യാറാക്കാൻ എയർ ഫ്രൈയറോ ഓവനോ ഉപയോഗിക്കാം. എയർ ഫ്രൈയറിൽ 200 ഡിഗ്രി സെൽഷ്യസിൽ 5-7 മിനിറ്റ് വീതം ഇരുവശവും വേവിച്ചെടുക്കുക. ഓവനിലാണ് തയ്യാറാക്കുന്നതെങ്കിൽ 200 ഡിഗ്രി സെൽഷ്യസിൽ 18-20 മിനിറ്റ് ബേക്ക് ചെയ്തെടുക്കാവുന്നതാണ് (പകുതി സമയമാകുമ്പോൾ മറിച്ചിടാൻ ശ്രദ്ധിക്കുക).
