തിരുവനന്തപുരം: പ്രതിപക്ഷ നേതാവ് പിണറായി വിജയന്റെ വസതിയിൽ എൻഫോഴ്സ്മെന്റ് ഡയറക്ടറേറ്റ് നടത്തിയ റെയ്ഡിന് പിന്നാലെയുണ്ടായ സംഘർഷത്തിൽ അറസ്റ്റിലായ എസ്എഫ്ഐ തിരുവനന്തപുരം ജില്ലാ പ്രസിഡന്റ് വിജയ് വിമലിന് കോടതി ജാമ്യം നിഷേധിച്ചു (ED Raid Vijay Vimal Bail Denied). തിരുവനന്തപുരം ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി ജഡ്ജി ടാനിയ മരിയം ജോസ് ആണ് പ്രതിയുടെ ജാമ്യാപേക്ഷ തള്ളിയത്. അഞ്ചുതെങ്ങ് ഗ്രാമപഞ്ചായത്ത് അംഗം കൂടിയായ വിജയ് വിമലിനെ കഴിഞ്ഞ ഞായറാഴ്ചയാണ് പൊലീസ് വീട്ടിൽ നിന്ന് അറസ്റ്റ് ചെയ്തത്. റെയ്ഡ് കഴിഞ്ഞ് മടങ്ങിയ ഇ.ഡി ഉദ്യോഗസ്ഥരെ സി.പി.എം-എസ്.എഫ്.ഐ പ്രവർത്തകർ തടയുകയും അവരുടെ വാഹനം അടിച്ചുതകർക്കാൻ ശ്രമിക്കുകയും ചെയ്തിരുന്നു. ഈ സമയം ഉദ്യോഗസ്ഥരെ വധശ്രമത്തിൽ നിന്ന് രക്ഷപ്പെടുത്താൻ ശ്രമിച്ച പൊലീസ് ഉദ്യോഗസ്ഥരെ പ്രതി ക്രൂരമായി ആക്രമിക്കുകയും ഔദ്യോഗിക കൃത്യനിർവഹണം തടസ്സപ്പെടുത്തുകയും ചെയ്തുവെന്നാണ് പ്രോസിക്യൂഷൻ കോടതിയെ അറിയിച്ചത്
ഇ.ഡി ഉദ്യോഗസ്ഥർക്ക് നേരെയുണ്ടായ കല്ലേറിലും ആക്രമണത്തിലും വലിയ രീതിയിലുള്ള ഗൂഢാലോചന നടന്നിട്ടുണ്ടെന്ന നിഗമനത്തിലാണ് നിലവിൽ പൊലീസ് സംഘം. കന്റോൺമെന്റ് എസിപി വി. ജയചന്ദ്രന്റെ നേതൃത്വത്തിലുള്ള മുപ്പതംഗ പ്രത്യേക അന്വേഷണ സംഘമാണ് ഈ കേസ് അന്വേഷിക്കുന്നത്. ആക്രമണം ആസൂത്രിതമാണോ എന്നും ഇതിന് പിന്നിൽ ഏതെങ്കിലും ഉന്നത രാഷ്ട്രീയ നേതാക്കളുടെ ഇടപെടലുകളോ പ്രേരണയോ ഉണ്ടായിട്ടുണ്ടോ എന്നും അറിയാൻ പ്രതികളുടെ ഫോൺ രേഖകൾ ഉൾപ്പെടെയുള്ള ശാസ്ത്രീയ തെളിവുകൾ പൊലീസ് വിശദമായി പരിശോധിച്ചു വരികയാണ്. തിരുവനന്തപുരത്തും കൊച്ചിയിലുമായി വിവിധ ടീമുകളായി തിരിഞ്ഞാണ് അന്വേഷണസംഘം ഇപ്പോൾ തെളിവുശേഖരണവും സാക്ഷിമൊഴി രേഖപ്പെടുത്തലും നടത്തുന്നത്.
പ്രതിപക്ഷ നേതാവിന്റെ വീട്ടിലെ റെയ്ഡുമായി ബന്ധപ്പെട്ടുണ്ടായ ഈ അക്രമ സംഭവം തലസ്ഥാന നഗരിയിൽ വലിയ രാഷ്ട്രീയ വടംവലികൾക്ക് കാരണമായിട്ടുണ്ട്. കേസിന്റെ ഗൗരവം കണക്കിലെടുത്ത് എത്രയും വേഗം അന്വേഷണം പൂർത്തിയാക്കി കോടതിയിൽ കുറ്റപത്രം സമർപ്പിക്കാൻ സിറ്റി പൊലീസ് കമ്മീഷണർ പ്രത്യേക സംഘത്തിന് കർശന നിർദേശം നൽകിയിട്ടുണ്ട്. പ്രതികൾക്കെതിരെ പൊതുമുതൽ നശിപ്പിക്കൽ, പൊലീസിനെ ആക്രമിക്കൽ തുടങ്ങിയ ഗുരുതരമായ വകുപ്പുകളാണ് ചുമത്തിയിരിക്കുന്നത്. വരും ദിവസങ്ങളിൽ കൂടുതൽ പ്രതികളുടെ അറസ്റ്റ് ഉണ്ടാകുമെന്നാണ് പൊലീസ് വൃത്തങ്ങളിൽ നിന്ന് ലഭിക്കുന്ന സൂചന.
Summary: The Thiruvananthapuram Judicial First Class Magistrate Court has denied bail to SFI District President Vijay Vimal, who was arrested for attacking police officers during a protest. The violence erupted when CPM-SFI activists blocked and damaged the vehicle of Enforcement Directorate (ED) officials following a raid at the residence of Opposition Leader Pinarayi Vijayan. A 30-member special investigation team led by Cantonment ACP V. Jayachandran is currently probing the suspected conspiracy behind the planned attack.
