കൊച്ചി: തൃക്കാക്കരയിൽ മദ്യലഹരിയിൽ അഞ്ചംഗ സംഘം പൊലീസ് പട്രോളിങ് സംഘത്തെ ക്രൂരമായി ആക്രമിക്കുകയും സിഐയുടെ കൈയൊടിക്കുകയും ചെയ്ത സംഭവത്തിന്റെ കൂടുതൽ ഞെട്ടിക്കുന്ന ദൃശ്യങ്ങൾ പുറത്ത് (Thrikkakara Police Attack Case). പൊലീസുകാർക്ക് നേരെയുള്ള കൊലവിളി ഭീഷണിയും വാഹനം തല്ലിത്തകർക്കലും പുതിയ മന്ത്രിസഭയിലെ മന്ത്രിമാർ നേരിട്ടെത്തി ഇടപെടണമെന്ന ആവശ്യവുമെല്ലാം അടങ്ങുന്ന വിഡിയോകളാണ് ഇപ്പോൾ പുറത്തുവന്നിരിക്കുന്നത്. കഴിഞ്ഞ ശനിയാഴ്ച പുലർച്ചെ ഉണിച്ചിറ മരോട്ടിച്ചുവടിനു സമീപം നടന്ന അക്രമത്തിനിടെ പ്രതികളായ യുവാക്കൾ തന്നെ സ്വന്തം മൊബൈൽ ഫോണിൽ പകർത്തിയ ദൃശ്യങ്ങളാണിത്.
രണ്ടോ മൂന്നോ പേരടങ്ങുന്ന നൈറ്റ് പട്രോളിങ് സംഘത്തെ യുവാക്കൾ വളയുന്നതും സ്ഥലത്തു നിന്ന് പോകാൻ അനുവദിക്കാതെ അക്രമാസക്തരായി ഭീഷണിപ്പെടുത്തുന്നതും ദൃശ്യങ്ങളിൽ വളരെ വ്യക്തമാണ്. സംഭവവുമായി ബന്ധപ്പെട്ട് കൊച്ചിയിലെ പ്രമുഖ മാളിലെ സെക്യൂരിറ്റി ജീവനക്കാരായ അക്ഷയ് (25), ജിനീഷ് (38), അജ്മൽ (20), അൽത്താഫ് (21), ഷംസുദീൻ (36) എന്നിവരെ പൊലീസ് പിന്നീട് അറസ്റ്റ് ചെയ്തിരുന്നു. മരോട്ടിച്ചുവടിലുള്ള ഒരു വാടക അപ്പാർട്ട്മെന്റിൽ താമസിച്ചിരുന്ന ഈ അഞ്ചംഗ സംഘം മദ്യപിച്ച് വലിയ രീതിയിൽ ബഹളമുണ്ടാക്കിയതിനെ തുടർന്ന് നാട്ടുകാരാണ് പൊലീസിൽ വിവരമറിയിച്ചത്.
സ്ഥലത്തെത്തിയ പൊലീസിനോട് ഐഡന്റിറ്റി കാർഡ് ചോദിച്ച് തട്ടിക്കയറിയ പ്രതികൾ, തങ്ങൾക്കെതിരെ പരാതി നൽകിയത് ആരാണെന്ന് വ്യക്തമാക്കണമെന്ന് ആവശ്യപ്പെട്ട് അക്രോശിക്കുകയായിരുന്നു. തങ്ങളെ കള്ളക്കേസിൽ കുടുക്കാൻ നോക്കുകയാണെന്ന് ആരോപിച്ച യുവാക്കൾ, ‘ഒരാളാണെങ്കിൽ പോലും കൊന്നിട്ടേ ഞങ്ങൾ ഇവിടുന്ന് പോകൂ, ഇത് വിഡിയോ എടുത്തോ’ എന്ന് പരസ്യമായി കൊലവിളി നടത്തുന്നത് ദൃശ്യങ്ങളിലുണ്ട്. തങ്ങൾ നിൽക്കുന്നത് മെയിൻ റോഡിലാണെന്നും ക്യാബിനറ്റ് മന്ത്രിമാരോ മന്ത്രാലയത്തിൽ നിന്നുള്ളവരോ വരാതെ പിന്നോട്ടില്ലെന്നും ഇവർ വാശിപിടിച്ചു. ഇതിനിടെ സ്ഥിതി വഷളായതോടെ കൂടുതൽ പൊലീസ് സ്ഥലത്തെത്തുകയും പ്രതികളെ കസ്റ്റഡിയിലെടുക്കാൻ ശ്രമിക്കുകയുമായിരുന്നു.
പ്രതികളെ പിടിച്ചുവെക്കാൻ ശ്രമിക്കുന്നതിനിടെ ഇവർ പൊലീസുകാരെ കായികമായി നേരിട്ടു. ഈ അടിപിടിക്കിടെയാണ് ഇടപ്പള്ളി ട്രാഫിക് ഈസ്റ്റ് സി.ഐ ഉദയകുമാറിന്റെ കൈക്ക് ഗുരുതരമായി പരുക്കേൽക്കുകയും എല്ലിന് പൊട്ടലുണ്ടാവുകയും ചെയ്തത്. ആക്രമണത്തിനു ശേഷം ഇവർ വാടക വില്ലയ്ക്കുള്ളിൽ കയറി കതകടച്ചെങ്കിലും പൊലീസ് വാതിൽ പൊളിച്ച് അകത്തുകയറി അഞ്ചുപേരെയും ബലമായി കസ്റ്റഡിയിലെടുക്കുകയായിരുന്നു. സ്റ്റേഷനിലെത്തിച്ച ശേഷവും തങ്ങൾ നൽകുന്ന നികുതിപ്പണം വാങ്ങി തിന്നുന്ന വേലക്കാരാണ് നിങ്ങളെന്ന് പറഞ്ഞ് പ്രതികൾ പൊലീസിനോട് അക്രമാസക്തമായി പെരുമാറി. നിലവിൽ ഔദ്യോഗിക കൃത്യനിർവഹണം തടസ്സപ്പെടുത്തൽ, മാരകായുധങ്ങൾ ഉപയോഗിച്ച് പരുക്കേൽപ്പിക്കൽ, പൊതുമുതൽ നശിപ്പിക്കൽ തുടങ്ങിയ ജാമ്യമില്ലാ വകുപ്പുകൾ ചുമത്തി പ്രതികളെ റിമാൻഡ് ചെയ്തിരിക്കുകയാണ്.
Summary: Shocking new mobile video footage has emerged showing a five-member drunk gang threatening and attacking a police night patrolling team in Thrikkakara, Kochi. The youth, who worked as security guards at a prominent local mall, were filmed daring the police, demanding the intervention of cabinet ministers, and shouting death threats. During the physical altercation that followed, Edappally Traffic East CI Udayakumar sustained a severe hand fracture before the police managed to break into their apartment and arrest all five individuals.
