ലഖ്നൗ: ഉത്തർപ്രദേശിലെ ലഖ്നൗവിൽ വിവാഹം കഴിഞ്ഞ് ആറാം മാസം ഇരുപത്തിയാറുകാരിയായ യുവതിയെ ഭർതൃഗൃഹത്തിൽ തൂങ്ങിമരിച്ച നിലയിൽ കണ്ടെത്തി (Shweta Singh Dowry Death Case). താക്കൂർഗഞ്ച് സ്വദേശിയായ ശ്വേത സിംഗ് ആണ് തിങ്കളാഴ്ച മരണപ്പെട്ടത്. ശ്വേതയുടെ മരണത്തിന് പിന്നിൽ ഭർത്താവിന്റെയും ഭർതൃവീട്ടുകാരുടെയും നിരന്തരമായ സ്ത്രീധന പീഡനമാണെന്ന് ആരോപിച്ച് യുവതിയുടെ കുടുംബം രംഗത്തെത്തിയിട്ടുണ്ട്. ശ്വേതയെ ഭർതൃവീട്ടുകാർ കൊലപ്പെടുത്തിയ ശേഷം ആത്മഹത്യയായി ചിത്രീകരിക്കാൻ ശ്രമിക്കുകയായിരുന്നുവെന്നാണ് പെൺകുട്ടിയുടെ പിതാവ് ഉമേഷ് കുമാർ സിംഗ് പോലീസിൽ നൽകിയ പരാതിയിൽ വ്യക്തമാക്കുന്നത്. സംഭവത്തിന് പിന്നാലെ ഒളിവിൽ പോയ ഭർത്താവിനും ബന്ധുക്കൾക്കുമായി പോലീസ് തിരച്ചിൽ ശക്തമാക്കിയിട്ടുണ്ട്.
കഴിഞ്ഞ 2025 നവംബർ 22-നായിരുന്നു ശ്വേതയും ഭൂപേന്ദ്ര സിംഗും തമ്മിലുള്ള വിവാഹം കഴിഞ്ഞത്. വിവാഹം കഴിഞ്ഞ നാളുകൾക്ക് പിന്നാലെ ശ്വേതയെ ഭർത്താവ് നിരന്തരം മാനസികമായി പീഡിപ്പിച്ചിരുന്നതായും വിലകൂടിയ കാർ ഉൾപ്പെടെയുള്ള അധിക സ്ത്രീധനം ആവശ്യപ്പെട്ട് ഭർതൃമാതാവും മറ്റ് ബന്ധുക്കളും ചേർന്ന് വലിയ തോതിൽ ദ്രോഹിച്ചിരുന്നതായും പരാതിയിലുണ്ട്. പെൺകുട്ടിയുടെ പിതാവിന്റെ പരാതിയുടെ അടിസ്ഥാനത്തിൽ ഭർത്താവ് ഭൂപേന്ദ്ര സിംഗ്, അദ്ദേഹത്തിന്റെ മാതാപിതാക്കൾ, സഹോദരൻ, സഹോദരഭാര്യ, സഹോദരി എന്നിവരുൾപ്പെടെ ആറ് പേർക്കെതിരെ ഭാരതീയ ന്യായ സംഹിതയിലെ സെക്ഷൻ 80 (സ്ത്രീധന മരണം), സെക്ഷൻ 85 (ക്രൂരത) കൂടാതെ സ്ത്രീധന നിരോധന നിയമപ്രകാരവും പോലീസ് കേസ് രജിസ്റ്റർ ചെയ്തു. യുവതിയുടെ മൃതദേഹം പോസ്റ്റ്മോർട്ടം നടപടികൾക്കായി അയച്ചിട്ടുണ്ടെന്നും റിപ്പോർട്ട് ലഭിച്ച ശേഷമേ മരണത്തിന്റെ കൃത്യമായ കാരണം വ്യക്തമാകൂ എന്നും താക്കൂർഗഞ്ച് സ്റ്റേഷൻ ഹൗസ് ഓഫീസർ അറിയിച്ചു.
Summary: A 26-year-old woman named Shweta Singh was found dead at her in-laws’ residence in Lucknow’s Thakurganj, just six months after her marriage. Her family has alleged that she faced constant mental torture and demands for additional dowry, including a four-wheeler vehicle. The Lucknow police have registered a case of dowry death and cruelty against her husband Bhupendra Singh and five of his family members, who are currently evading arrest.
