ലണ്ടൻ: യാത്രക്കാർ സഞ്ചരിച്ചുകൊണ്ടിരുന്ന ലണ്ടൻ ബസിൽ അലക്കുസഞ്ചിക്കുള്ളിൽ ഉപേക്ഷിക്കപ്പെട്ട നിലയിൽ കണ്ടെത്തിയ ചെറിയ കുരങ്ങിനെ സുരക്ഷിതമായി മൃഗസംരക്ഷണ കേന്ദ്രത്തിലേക്ക് മാറ്റി. ‘ഓയ്സ്റ്റർ’ എന്ന് പേരിട്ട ഈ പെൺ കോമൺ മാർമോസെറ്റ് കുരങ്ങിനെ കഴിഞ്ഞ വെള്ളിയാഴ്ച വടക്കുപടിഞ്ഞാറൻ ലണ്ടനിലെ കെൻസൽ റൈസിൽ നിർത്തിയിട്ടിരുന്ന 302-ാം നമ്പർ ബസിൽ നിന്നാണ് കണ്ടെത്തിയത് (London Bus Monkey Rescue). ബസിലെ ലഗേജ് ഭാഗത്ത് നിന്ന് അലക്കുസഞ്ചി പുറത്തേക്ക് തള്ളുന്നതിനിടെയാണ് ബസ് ഡ്രൈവർ സഞ്ചിക്കുള്ളിൽ നിന്ന് ശബ്ദം കേൾക്കുകയും കുരങ്ങ് ചാടി പുറത്തുവരികയും ചെയ്തത്. ഉടൻ തന്നെ ഡ്രൈവർ മെട്രോലൈൻ ബസ് ഡിപ്പോയിലെ അധികൃതരെ വിവരമറിയിക്കുകയും തുടർന്ന് ആർ.എസ്.പി.സി.എ അധികൃതർ സ്ഥലത്തെത്തി കുരങ്ങിനെ ഏറ്റെടുക്കുകയും ചെയ്തു.
അലക്കുസഞ്ചിക്കുള്ളിൽ കുറച്ച് ആപ്പിൾ വെച്ചിരുന്നെങ്കിലും കുരങ്ങ് കടുത്ത മാനസിക സമ്മർദ്ദത്തിലും നിർജലീകരണാവസ്ഥയിലുമായിരുന്നു എന്ന് ആർ.എസ്.പി.സി.എ അന്വേഷണ ഉദ്യോഗസ്ഥ ക്ലെയർ ഡ്യൂ വ്യക്തമാക്കി. കുരങ്ങിനെ മനഃപൂർവം ഉപേക്ഷിച്ചതാണെന്നാണ് പ്രാഥമിക നിഗമനം. ഇംഗ്ലണ്ടിൽ വളർത്തുന്ന എല്ലാ പ്രൈമേറ്റുകൾക്കും ലൈസൻസും മൈക്രോചിപ്പും നിർബന്ധമാക്കിയ പുതിയ നിയമം പ്രാബല്യത്തിൽ വന്നതിന് പിന്നാലെ ഇത്തരം ഉപേക്ഷിക്കൽ സംഭവങ്ങൾ വർധിക്കുമെന്ന ആശങ്ക നേരത്തേ ഉണ്ടായിരുന്നുവെന്നും, ഈ സംഭവം അതിന്റെ ആദ്യ സൂചനയായേക്കാമെന്നും ആർ.എസ്.പി.സി.എ അഭിപ്രായപ്പെട്ടു. ഓയ്സ്റ്ററിന് നിർബന്ധമായ മൈക്രോചിപ്പ് ഇല്ലായിരുന്നുവെന്നും അധികൃതർ അറിയിച്ചു.
നിലവിൽ പ്രത്യേക പ്രൈമേറ്റ് സംരക്ഷണ സൗകര്യമുള്ള ഒരു സങ്കേതത്തിലാണ് ഓയ്സ്റ്റർ കഴിയുന്നത്. അവിടെ ഒറ്റയ്ക്കായിരുന്ന ഒരു ആൺ മാർമോസെറ്റിനൊപ്പം താമസിപ്പിക്കാനായിരുന്നു നേരത്തേ മറ്റൊരു പെൺകുരങ്ങിനെ എത്തിക്കാൻ ശ്രമിച്ചിരുന്നത്. ആ പദ്ധതി അവസാന നിമിഷം മുടങ്ങിയതോടെയാണ് ഓയ്സ്റ്ററിന്റെ രക്ഷാപ്രവർത്തനം നടന്നത്. കുരങ്ങ് ഇപ്പോൾ ആരോഗ്യവതിയായിരിക്കുകയാണെന്നും പുതിയ അന്തരീക്ഷവുമായി നന്നായി പൊരുത്തപ്പെട്ടുവെന്നും ആർ.എസ്.പി.സി.എ അറിയിച്ചു.
കുരങ്ങിനെ ബസിൽ ഉപേക്ഷിച്ചയാളെ കണ്ടെത്താൻ ബസിലെ സി.സി.ടി.വി ദൃശ്യങ്ങളും യാത്രാ വിവരങ്ങളും പരിശോധിച്ചുവരികയാണ്. വളർത്തുമൃഗങ്ങളെ പരിപാലിക്കാൻ ബുദ്ധിമുട്ടുണ്ടെങ്കിൽ വിദഗ്ധരുടെയോ മൃഗസംരക്ഷണ സംഘടനകളുടെയോ സഹായം തേടണമെന്നും ഒരിക്കലും ഉപേക്ഷിക്കരുതെന്നും ആർ.എസ്.പി.സി.എ ജനങ്ങളോട് അഭ്യർഥിച്ചു.
Summary: A female common marmoset abandoned in a laundry bag on a London bus has been rescued and relocated to a specialist primate sanctuary. The RSPCA is investigating the incident and fears it could be linked to England’s new primate licensing law.
