ബാഗൽകോട്ട്: ഭാര്യയെ കൊലപ്പെടുത്തി മരിക്കുന്ന ദൃശ്യങ്ങൾ വീഡിയോ കോൾ വഴി മാതാപിതാക്കൾക്ക് കാണിച്ചെന്ന ഞെട്ടിക്കുന്ന ആരോപണത്തിൽ കർണാടകയിൽ യുവാവ് അറസ്റ്റിലായി (Karnataka Woman Murder). ബാഗൽകോട്ട് ജില്ലയിലെ ഗലഗലി ഗ്രാമത്തിൽ ഞായറാഴ്ച വൈകുന്നേരമാണ് സംഭവം നടന്നത്. 23 വയസുകാരിയായ ഭാഗ്യശ്രീ ജിഗളൂർ ആണ് കൊല്ലപ്പെട്ടത്. ഭർത്താവ് പ്രവീൺ ജിഗളൂറിനെ പൊലീസ് അറസ്റ്റ് ചെയ്തു. വിവാഹേതര ബന്ധം സംശയിച്ചാണ് ഇയാൾ ഭാര്യയെ കൊലപ്പെടുത്തിയതെന്നാണ് പ്രാഥമിക അന്വേഷണത്തിൽ പൊലീസ് കണ്ടെത്തിയിരിക്കുന്നത്.
പൊലീസിന്റെ വിവരങ്ങൾ പ്രകാരം, പ്രവീൺ ആദ്യം മരക്കൊമ്പ് ഉപയോഗിച്ച് മർദിച്ചശേഷം ഭാര്യയെ വീട്ടിനുള്ളിൽ കെട്ടിത്തൂക്കുകയായിരുന്നു. തുടർന്ന് ഭാഗ്യശ്രീ ജീവൻ വേണ്ടി പിടഞ്ഞുകൊണ്ടിരിക്കുന്ന ദൃശ്യങ്ങൾ ഇയാൾ മൊബൈൽ ഫോണിൽ പകർത്തിയതായും അന്വേഷണസംഘം പറയുന്നു. തുടർന്ന് വീഡിയോ സുഹൃത്തുക്കൾക്കും ബന്ധുക്കൾക്കും അയച്ചതായും പൊലീസ് വ്യക്തമാക്കി. ഇതിനിടെ, ഭാഗ്യശ്രീയുടെ മാതാപിതാക്കളെ വീഡിയോ കോൾ ചെയ്ത് മകൾ അവസാന നിമിഷങ്ങളിൽ പിടയുന്നത് കാണിച്ചതായും ആരോപണമുണ്ട്. ഈ ക്രൂരതയുടെ വിശദാംശങ്ങളാണ് പ്രദേശവാസികളെ നടുക്കിയത്.
ഭാഗ്യശ്രീ രണ്ടുമാസം മുമ്പ് നിരന്തര കുടുംബവഴക്കങ്ങളെ തുടർന്ന് ഭർത്താവിന്റെ വീട് വിട്ട് മാതാപിതാക്കളുടെ വീട്ടിലേക്ക് പോയിരുന്നതായി ബന്ധുക്കൾ പറഞ്ഞു. സമാധാനപരമായി ജീവിക്കാമെന്ന് ഉറപ്പ് നൽകിയതിനെ തുടർന്ന് പ്രവീൺ വീണ്ടും വീട്ടിലേക്ക് കൂട്ടിക്കൊണ്ടുവന്നെങ്കിലും അതേ ദിവസം തന്നെ കൊലപാതകം നടന്നതായാണ് അന്വേഷണത്തിൽ വ്യക്തമാകുന്നത്. സംഭവസ്ഥലത്തെത്തിയ ബിലഗി പൊലീസ് ഇൻക്വസ്റ്റ് നടപടികൾ പൂർത്തിയാക്കി അന്വേഷണം ആരംഭിച്ചു. ദമ്പതികൾക്കിടയിൽ ഉണ്ടായിരുന്ന പ്രശ്നങ്ങൾ, യുവതി തിരിച്ചെത്തിയ സാഹചര്യങ്ങൾ, കൊലപാതകത്തിന് മുമ്പുണ്ടായ സംഭവവികാസങ്ങൾ എന്നിവയെക്കുറിച്ച് പൊലീസ് വിശദമായി അന്വേഷിച്ചുവരികയാണ്.
Summary: A 23-year-old woman was allegedly murdered by her husband in Karnataka’s Bagalkot district after he suspected her of having an extramarital affair. Police say the accused assaulted her, hanged her, recorded the incident, and video called her parents before sharing the footage with others.
