ന്യൂ ബ്രൺസ്വിക്: നിർമിത ബുദ്ധി ഉപയോഗിച്ച് തയ്യാറാക്കിയ പ്രസംഗം നിയമസഭയിൽ അവതരിപ്പിക്കുന്നതിനിടെ എ.ഐ. ചാറ്റ്ബോട്ടിന്റെ നിർദേശവാചകവും വായിച്ചുപോയ കനേഡിയൻ നിയമസഭാംഗം സോഷ്യൽ മീഡിയയിൽ വിമർശനത്തിന് വിധേയനായിരിക്കുകയാണ് (Canadian politician reads AI prompt during speech). ന്യൂ ബ്രൺസ്വിക് നിയമസഭയിൽ പ്രസംഗിക്കുന്നതിനിടെയാണ് പ്രോഗ്രസീവ് കൺസർവേറ്റീവ് പാർട്ടി അംഗമായ ബിൽ ഒലിവറിന് അബദ്ധം പറ്റിയത്. സംഭവത്തിന്റെ വീഡിയോ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്.
അഡ്വക്കേറ്റിന്റെ ഓഫീസിലുള്ള പൊതുജന വിശ്വാസത്തിന്റെ പ്രാധാന്യത്തെക്കുറിച്ചാണ് ഒലിവർ നിയമസഭയിൽ സംസാരിച്ചത്. “അഡ്വക്കേറ്റിന്റെ ഓഫീസിലുള്ള പൊതുജന വിശ്വാസം പ്രധാനമാണ്” എന്ന് പറഞ്ഞതിന് പിന്നാലെ, എ.ഐ. ചാറ്റ്ബോട്ട് സൃഷ്ടിച്ച മറുപടിയുടെ ഭാഗമെന്ന് കരുതപ്പെടുന്ന വാചകങ്ങളും അദ്ദേഹം പ്രസംഗത്തിനിടെ വായിച്ചു.
“ചെറിയ പോയിന്റുകളുടെ ഒരു പരമ്പരയ്ക്ക് പകരം, നിയമസഭയിലെ പ്രസംഗം പോലെ കൂടുതൽ സ്വാഭാവികവും ഒഴുക്കോടെയും വായിക്കാവുന്ന ഈ ഭാഗത്തിന്റെ ഒരു പതിപ്പ് ഇതാ,” എന്നായിരുന്നു ഒലിവർ വായിച്ച വാചകം.
ഇത് പ്രസംഗത്തിന്റെ ഉള്ളടക്കമല്ലെന്നും, പ്രസംഗം കൂടുതൽ സ്വാഭാവികമായ ഭാഷയിലേക്ക് മാറ്റാൻ എ.ഐ. ചാറ്റ്ബോട്ട് നൽകിയ നിർദേശമാണെന്നും പിന്നീട് വ്യക്തമായി. ചില പ്രധാന പോയിന്റുകൾ ചാറ്റ്ബോട്ടിന് നൽകി അവയെ നിയമസഭാ പ്രസംഗരൂപത്തിലേക്ക് മാറ്റാൻ ആവശ്യപ്പെട്ടതാകാമെന്നാണ് വീഡിയോ കണ്ടവരുടെ അനുമാനം. എന്നാൽ എ.ഐ. തയ്യാറാക്കിയ ഉള്ളടക്കം പ്രസംഗിക്കുന്നതിന് മുൻപ് പരിശോധിക്കാതെയാണ് ഒലിവർ നിയമസഭയിൽ എത്തിയത് എന്ന വിമർശനമാണ് സമൂഹമാധ്യമങ്ങളിൽ ശക്തമായത്. എ.ഐ. ഉപയോഗിച്ചതല്ല പ്രധാന പ്രശ്നമെന്നും, സ്വന്തം പേരിൽ അവതരിപ്പിക്കുന്ന പ്രസംഗം പോലും മുൻകൂട്ടി വായിക്കുകയോ പരിശോധിക്കുകയോ ചെയ്യാതിരുന്നതാണ് ഗുരുതരമായ കാര്യമെന്നുമാണ് പലരും അഭിപ്രായപ്പെട്ടത്.
Canadian politician Bill Oliver forgot to remove the AI prompt from his speech: pic.twitter.com/vMrEMu80h7
— Vatnik Soup (@P_Kallioniemi) July 24, 2026
“പല രാഷ്ട്രീയക്കാരും ഇപ്പോൾ തന്നെ ഓട്ടോപൈലറ്റിലാണ് പ്രവർത്തിക്കുന്നത്. അതുകൊണ്ട് എ.ഐ. തന്നെ സർക്കാർ നടത്തുന്നതായിരുന്നെങ്കിൽ മതിയായിരുന്നല്ലോ,” എന്നായിരുന്നു ഒരാളുടെ പരിഹാസം. പ്രസംഗം തയ്യാറാക്കിയ വ്യക്തി എ.ഐ. നിർദേശം നീക്കം ചെയ്തില്ലെന്നും, രാഷ്ട്രീയക്കാരൻ സ്വന്തം പ്രസംഗം പോലും വായിച്ചുനോക്കാതെ നിയമസഭയിൽ അവതരിപ്പിച്ചെന്നും മറ്റൊരാൾ വിമർശിച്ചു. “എ.ഐ. ഉപയോഗിച്ചതല്ല യഥാർഥ പ്രശ്നം. നിയമസഭയിൽ എഴുന്നേറ്റ് പ്രസംഗിക്കുന്നതിന് മുൻപ് സ്വന്തം പ്രസംഗം വായിച്ചുനോക്കിയില്ല എന്നതാണ് വിഷയം. ഇത് സാങ്കേതികവിദ്യയുടെ പിഴവല്ല, മറിച്ച് ഉത്തരവാദിത്വമില്ലായ്മയാണ്,” എന്നായിരുന്നു മറ്റൊരു പ്രതികരണം. രാഷ്ട്രീയക്കാർ പ്രസംഗങ്ങൾ തയ്യാറാക്കാൻ എ.ഐ.യെ ആശ്രയിക്കുന്നതിൽ ആശങ്കയുണ്ടെന്നും, എ.ഐ.യുടെ സഹായത്തോടെ ആർക്കും രാഷ്ട്രീയക്കാരനാകാൻ കഴിയുമെങ്കിൽ ജനപ്രതിനിധികളുടെ പങ്ക് എന്താണെന്നുമുള്ള ചോദ്യങ്ങളും സമൂഹമാധ്യമങ്ങളിൽ ഉയർന്നു.
അതേസമയം, എ.ഐ. പോലുള്ള സാങ്കേതികവിദ്യകൾ പ്രസംഗങ്ങൾ തയ്യാറാക്കുന്നതിനും വിവരങ്ങൾ ക്രമീകരിക്കുന്നതിനും ഉപയോഗിക്കുന്നത് പുതിയ കാര്യമല്ല. എന്നാൽ എ.ഐ. സൃഷ്ടിച്ച ഉള്ളടക്കം കൃത്യമായി പരിശോധിക്കാതെയും എഡിറ്റ് ചെയ്യാതെയും ഔദ്യോഗിക വേദികളിൽ അവതരിപ്പിക്കുന്നത് പൊതുജന പ്രതിനിധികളുടെ ഉത്തരവാദിത്വത്തെയും വിശ്വാസ്യതയെയും ചോദ്യം ചെയ്യുന്നതാണെന്നാണ് സംഭവത്തെത്തുടർന്ന് ഉയരുന്ന വിമർശനം.
Summary: Canadian politician Bill Oliver faced online criticism after he accidentally read an AI chatbot’s writing instruction while delivering a speech in the New Brunswick Legislative Assembly. Social media users said the main issue was not the use of AI, but his failure to review the speech before presenting it.
