ന്യൂഡൽഹി: കേരള നിയമസഭാ തിരഞ്ഞെടുപ്പിലെ അപ്രതീക്ഷിത തിരിച്ചടിക്ക് പിന്നാലെ സിപിഎം പോളിറ്റ് ബ്യൂറോ യോഗം ഇന്ന് മുതൽ ഡൽഹിയിൽ ചേരും. തിരഞ്ഞെടുപ്പ് ഫലം സംബന്ധിച്ച വിശദമായ വിലയിരുത്തലിനൊപ്പം, കേരളത്തിലെ പ്രതിപക്ഷ നേതാവ് ആരാകണം എന്ന നിർണ്ണായക തീരുമാനവും ഈ യോഗത്തിൽ ഉണ്ടായേക്കും.(CPM Politburo Meeting To Discuss Kerala Election Defeat And Opposition Leader Choice)
പത്ത് വർഷത്തെ തുടർച്ചയായ ഭരണത്തിന് ശേഷം അധികാരം നഷ്ടമായ സാഹചര്യത്തിൽ, പിണറായി വിജയൻ തന്നെ പ്രതിപക്ഷത്തെ നയിക്കണമെന്ന ആവശ്യം പാർട്ടിയിൽ ശക്തമാണ്. എന്നാൽ അദ്ദേഹം ഈ പദവി ഏറ്റെടുക്കാൻ സന്നദ്ധനാകുമോ അതോ താൽപ്പര്യക്കുറവ് അറിയിക്കുമോ എന്നതാണ് രാഷ്ട്രീയ കേന്ദ്രങ്ങൾ ഉറ്റുനോക്കുന്നത്.
ഭരണവിരുദ്ധ വികാരത്തിന് പുറമെ സംഘടനാ തലത്തിലുണ്ടായ വീഴ്ചകളും വോട്ട് ചോർച്ചയും പിബി പരിശോധിക്കും. നിയമസഭയിൽ ഭരണപക്ഷത്തിന് വലിയ ഭൂരിപക്ഷമുള്ള സാഹചര്യത്തിൽ, കരുത്തനായ ഒരു നേതാവ് തന്നെ പ്രതിപക്ഷത്തെ നയിക്കണമെന്ന നിലപാടിലാണ് ഒരു വിഭാഗം. പിണറായി വിജയൻ സമ്മതം അറിയിച്ചാൽ അദ്ദേഹം തന്നെയാകും പ്രതിപക്ഷ നേതാവ്. ആദ്യത്തെ കുറച്ചു കാലം അദ്ദേഹം നയിച്ച ശേഷം പിന്നീട് മാറുന്നതിനെക്കുറിച്ചും ആലോചനകളുണ്ട്. പിണറായി വിജയൻ പദവി ഏറ്റെടുക്കാൻ വിമുഖത കാണിച്ചാൽ, കെ.എൻ. ബാലഗോപാലിന്റെ പേരിനാകും മുൻഗണന.
Story Summary
The CPM Politburo meets in Delhi today to analyze the election defeat in Kerala and decide on the next Opposition Leader. While there is a strong push for Pinarayi Vijayan to lead the opposition, the party is also considering K.N. Balagopal if Vijayan expresses reluctance.
