തിരുവനന്തപുരം: മുഖ്യമന്ത്രി വി.ഡി. സതീശനെ ഫേസ്ബുക്കിലൂടെ അധിക്ഷേപിക്കുകയും പരിഹസിക്കുകയും ചെയ്ത സംഭവത്തിൽ ഗവൺമെന്റ് സ്കൂൾ പ്രധാനാധ്യാപകന് സസ്പെൻഷൻ (V.D. Satheesan). ആറ്റിങ്ങൽ ഗവ. ബോയ്സ് ഹയർ സെക്കൻഡറി സ്കൂൾ പ്രിൻസിപ്പൽ എസ്. ജവാദിനെതിരെയാണ് പൊതുവിദ്യാഭ്യാസ വകുപ്പ് അച്ചടക്ക നടപടി സ്വീകരിച്ചത്. സർവീസിൽ നിന്നും വിരമിക്കാൻ വെറും രണ്ട് ദിവസം മാത്രം ബാക്കിനിൽക്കെയാണ് അധ്യാപകന് സസ്പെൻഷൻ ലഭിച്ചതെന്നത് ശ്രദ്ധേയമാണ്.
മുഖ്യമന്ത്രിയുടെ ചിത്രം പരിഹാസ്യമായ രീതിയിൽ ചിത്രീകരിച്ചുകൊണ്ട് സോഷ്യൽ മീഡിയയിൽ പോസ്റ്റിട്ടു എന്നാണ് അധ്യാപകനെതിരെയുള്ള കണ്ടെത്തൽ. സർക്കാരിന്റെയും മുഖ്യമന്ത്രിയുടെയും വിവിധ പ്രഖ്യാപനങ്ങളെ തരംതാഴ്ത്തി കാണിക്കുന്ന രീതിയിലുള്ള പോസ്റ്റുകളാണ് ഇയാൾ ഫേസ്ബുക്കിൽ പങ്കുവെച്ചിരുന്നത്. സംഭവത്തിൽ യൂത്ത് കോൺഗ്രസ് നേതാവ് നൽകിയ പരാതിയുടെ അടിസ്ഥാനത്തിൽ പോലീസ് എഫ്.ഐ.ആർ. രജിസ്റ്റർ ചെയ്ത് അന്വേഷണം ആരംഭിച്ചിരുന്നു. ഇതിന് പിന്നാലെയാണ് ഇപ്പോൾ വകുപ്പുതല നടപടിയും ഉണ്ടായിരിക്കുന്നത്.
ഉത്തരവാദപ്പെട്ട പദവിയിലിരിക്കുന്ന ഒരു അധ്യാപകന്റെ ഭാഗത്തുനിന്നുണ്ടായ ഈ പോസ്റ്റ് സമൂഹത്തിന് തികച്ചും തെറ്റായ സന്ദേശമാണ് നൽകുന്നതെന്ന് പൊതുവിദ്യാഭ്യാസ വകുപ്പ് ഡെപ്യൂട്ടി സെക്രട്ടറി പുറത്തിറക്കിയ സസ്പെൻഷൻ ഉത്തരവിൽ വ്യക്തമാക്കുന്നു. ഇത്തരം പ്രവണതകൾ അധ്യാപകരിലും വിദ്യാർത്ഥികളിലും അനാവശ്യമായ രാഷ്ട്രീയ ധ്രുവീകരണത്തിന് കാരണമാകുമെന്നും ഉത്തരവിൽ ചൂണ്ടിക്കാണിക്കുന്നുണ്ട്.
Story Summary: S. Jawad, the principal of Attingal Govt Boys Higher Secondary School, has been suspended just two days before his retirement for posting defamatory content against Chief Minister V.D. Satheesan on Facebook.
