തിരുവനന്തപുരം: നിയമസഭാ തിരഞ്ഞെടുപ്പിന്റെ വോട്ടെണ്ണൽ നടക്കാനിരിക്കെ, കോൺഗ്രസിനുള്ളിൽ മുഖ്യമന്ത്രി സ്ഥാനത്തെച്ചൊല്ലിയുള്ള തർക്കം. കെ.സി. വേണുഗോപാലിനെ പിന്തുണച്ച് കെ. സുധാകരൻ തന്നെ പരസ്യമായി രംഗത്തെത്തിയതോടെ പാർട്ടിയിൽ ഗ്രൂപ്പ് പോര് പുതിയ തലത്തിലെത്തി. (K Sudhakaran supports KC Venugopal, Chief Minister post fight intensifies in Congress
ഈ പോര് ബോധപൂർവമാണെന്ന സൂചനകൾ പുറത്തുവരുന്നത് പാർട്ടിക്കുള്ളിൽ വലിയ അസ്വസ്ഥതകൾക്ക് കാരണമായിട്ടുണ്ട്. “കേരളം കെ.സി. നയിക്കട്ടെ” എന്ന ആഹ്വാനവുമായി സുധാകരൻ ഇട്ട ഫേസ്ബുക്ക് പോസ്റ്റാണ് വിവാദങ്ങളുടെ കേന്ദ്രബിന്ദു.
കെ. കരുണാകരന്റെ പാത പിന്തുടരാൻ കെ.സിക്ക് കഴിയുമെന്നും കേരളത്തിന് വേണ്ടത് അദ്ദേഹത്തെപ്പോലെ ദീർഘവീക്ഷണമുള്ള നേതാവിനെയാണെന്നും സുധാകരൻ വാനോളം വാഴ്ത്തി. സുധാകരന്റെ നിലപാടിന് പിന്നാലെ മറ്റു നേതാക്കളും കെ.സിക്ക് പിന്തുണയുമായി രംഗത്തെത്തി.
എന്നാൽ ഒരു വിഭാഗം നേതാക്കൾ ഇതിനെതിരെ സജീവമായി രംഗത്തുണ്ട്. സുധാകരന്റെ പോസ്റ്റിന് താഴെ കമന്റുകൾ പ്രവാഹമായതോടെ കമന്റ് ബോക്സ് നിയന്ത്രിക്കേണ്ടി വന്നു. എംപിമാരിൽ ഭൂരിഭാഗവും ഏകപക്ഷീയമായ നീക്കത്തിൽ അതൃപ്തരാണ്. ഇക്കാര്യം അവർ ഹൈക്കമാൻഡിനെ അറിയിക്കുമെന്നാണ് വിവരം. മുഖ്യമന്ത്രി ചർച്ചകൾ ഇപ്പോൾ പാടില്ലെന്ന രാഹുൽ ഗാന്ധിയുടെ കർശന നിർദ്ദേശം നിലനിൽക്കെയാണ് ഇത്തരം പരസ്യമായ ചേരിതിരിവ്.
