തിരുവനന്തപുരം: മാധ്യമപ്രവർത്തകൻ കെ.എം. ബഷീർ വാഹനാപകടത്തിൽ കൊല്ലപ്പെട്ട കേസിന്റെ വിചാരണ നടപടികളിൽ പ്രോസിക്യൂഷന് തിരിച്ചടി (KM Basheer accident case witness turns hostile). കേസിലെ നിർണ്ണായക ദൃക്സാക്ഷിയായ ഓട്ടോ ഡ്രൈവർ ഷഫീഖ് തിരുവനന്തപുരം നാലാം അഡീഷണൽ സെഷൻസ് കോടതിയിൽ വിചാരണവേളയിൽ കൂറുമാറി. പ്രതിയായ ഐ.എ.എസ് ഉദ്യോഗസ്ഥൻ ശ്രീറാം വെങ്കിട്ടരാമന് അനുകൂലമായാണ് ഇദ്ദേഹം മൊഴി നൽകിയത്.
അപകടസമയത്ത് കാർ അമിതവേഗതയിൽ വന്ന് ബൈക്കിൽ ഇടിക്കുന്നത് കണ്ടെന്നും വാഹനം ഓടിച്ചിരുന്നത് ശ്രീറാം വെങ്കിട്ടരാമനാണെന്നും മുൻപ് മജിസ്ട്രേറ്റിന് നൽകിയ രഹസ്യമൊഴിയിൽ ഷഫീഖ് പറഞ്ഞിരുന്നു. എന്നാൽ, അപകട ശബ്ദം കേട്ട് ചെന്നു നോക്കിയപ്പോൾ കാർ ബൈക്കിൽ ഇടിച്ചുകിടക്കുന്നതാണ് കണ്ടതെന്നും, ശ്രീറാമാണ് വാഹനമോടിച്ചതെന്ന് മറ്റുള്ളവർ പറയുന്നത് കേട്ട ഓർമ്മ മാത്രമാണെന്നുമാണ് സാക്ഷി ഇപ്പോൾ കോടതിയിൽ തിരുത്തിപ്പറഞ്ഞത്.
വിചാരണക്കോടതി മാറ്റത്തിനെതിരെ കുടുംബം ഹൈക്കോടതിയിൽ: അതേസമയം, കേസിന്റെ വിചാരണ തിരുവനന്തപുരം ഒന്നാം അഡീഷണൽ സെഷൻസ് കോടതിയിൽ നിന്ന് നാലാം അഡീഷണൽ സെഷൻസ് കോടതിയിലേക്ക് മാറ്റിയ നടപടിക്കെതിരെ കെ.എം. ബഷീറിന്റെ ഭാര്യ സി. ജസീല നൽകിയ ഹരജിയിൽ ഹൈക്കോടതി സംസ്ഥാന സർക്കാരിന് നോട്ടീസ് അയച്ചു. പ്രതിഭാഗം അഭിഭാഷകന്റെ ആരോഗ്യപ്രശ്നങ്ങൾ ചൂണ്ടിക്കാട്ടി കോടതി മാറ്റിയ നടപടി റദ്ദാക്കണമെന്നും, നിലവിലെ സാഹചര്യത്തിൽ നീതിപൂർവ്വമായ വിചാരണയെക്കുറിച്ച് ആശങ്കയുണ്ടെന്നുമാണ് കുടുംബത്തിന്റെ ഹരജി.
2019 ആഗസ്റ്റ് 3-നാണ് മ്യൂസിയത്തിന് സമീപം കെ.എം. ബഷീർ സഞ്ചരിച്ച ബൈക്കിൽ ശ്രീറാം വെങ്കിട്ടരാമനും സുഹൃത്ത് വഫ ഫിറോസും സഞ്ചരിച്ച കാറിടിച്ച് അപകടമുണ്ടാകുന്നത്. നിലവിൽ കേസിൽ സർവീസിലുള്ള ശ്രീറാം വെങ്കിട്ടരാമൻ മാത്രമാണ് ഏക പ്രതി.
Story Summary: In a setback to the prosecution in the K.M. Basheer road accident case, key witness Shafeek turned hostile during the trial at the Thiruvananthapuram 4th Additional Sessions Court. Meanwhile, the Kerala High Court issued a notice to the state government on a petition filed by Basheer’s wife challenging the transfer of the trial court.
