കൊച്ചി: അമ്മ സംഘടനയുമായി ബന്ധപ്പെട്ട വിവാദങ്ങളുടെ പശ്ചാത്തലത്തിൽ സമൂഹമാധ്യമങ്ങളിൽ സജീവമായ ചർച്ചകൾക്കിടെ, പഴയ ആരോപണം ഉയർത്തിയ കമന്റിന് മറുപടിയുമായി നടി മാല പാർവതി. മകനെതിരായ മുൻകാല വിവാദം ചൂണ്ടിക്കാട്ടി വന്ന കമന്റിനാണ് നടി വിശദമായ മറുപടി നൽകിയത്. (Maala Parvathi Son Controversy)
മാല പാർവതിയുടെ ഫേസ്ബുക്ക് പോസ്റ്റിന് താഴെയായിരുന്നു ഒരു ഉപയോക്താവ്, മകൻ ട്രാൻസ്ജെൻഡർ യുവതിക്ക് അശ്ലീല ചിത്രങ്ങൾ അയച്ചെന്ന ആരോപണവുമായി ബന്ധപ്പെട്ട കേസിന്റെ നിലവിലെ സ്ഥിതി ചോദിച്ച് കമന്റ് രേഖപ്പെടുത്തിയത്. ഇതിന് മറുപടിയായി മാല പാർവതി, ആരോപണവിധേയയായ വ്യക്തി പിന്നീട് വിവാഹിതയായെന്നും അവർ കേസ് നൽകിയിരുന്നില്ലെന്നും വ്യക്തമാക്കി. “അവർ കേസ് കൊടുത്തില്ല. കേസ് കൊടുക്കുന്നുണ്ടെങ്കിൽ കൂടെ വരാമെന്ന് ഞാൻ പറഞ്ഞിരുന്നു. പിന്നീട് ചിലർ ഒത്തുതീർപ്പ് ചർച്ചകൾ നടത്തിയെങ്കിലും അതിന് തയ്യാറായില്ല. മാനം പണംകൊടുത്ത് വാങ്ങാനോ നിലനിർത്താനോ കഴിയില്ല. സമൂഹം നൽകുന്ന ശിക്ഷ അനുഭവിക്കേണ്ടിവരും,” എന്നാണ് മാല പാർവതി പ്രതികരിച്ചത്.
ഇത്തരത്തിലുള്ള കമന്റുകൾ എവിടെ നിന്നാണ് വരുന്നതെന്ന് അറിയാമെന്നും അതുകൊണ്ടാണ് മറുപടി നൽകാൻ തീരുമാനിച്ചതെന്നും മാല പാർവതി പറഞ്ഞു. “ഈ ആരോപണത്തിന്റെ പേരിൽ കഴിഞ്ഞ ആറു വർഷമായി എന്റെ മകൻ ഒരു പൊതുപരിപാടിയിലും പങ്കെടുത്തിട്ടില്ല. എന്നെ ആക്രമിക്കാൻ മകന്റെ പേര് ഉപയോഗിക്കുന്നവർ ഇത് മനസ്സിലാക്കണം,” എന്നും അവർ കുറിച്ചു. താൻ പ്രതികരിക്കുന്നത് വ്യക്തിപരമായ നേട്ടത്തിനുവേണ്ടിയല്ലെന്നും ശരിയെന്ന് വിശ്വസിക്കുന്ന കാര്യങ്ങളിൽ ഉറച്ചുനിൽക്കുമെന്നും തെറ്റ് സംഭവിച്ചാൽ അത് തിരുത്താൻ തയ്യാറാണെന്നും മാല പാർവതി വ്യക്തമാക്കി.
അമ്മ സംഘടനയുമായി ബന്ധപ്പെട്ട വിഷയങ്ങളിൽ നടി ശ്വേത മേനോനുമായുള്ള അഭിപ്രായവ്യത്യാസം സമൂഹമാധ്യമങ്ങളിൽ ചർച്ചയാകുന്നതിനിടെയാണ് മാല പാർവതിയുടെ ഈ പ്രതികരണവും ശ്രദ്ധ നേടുന്നത്. പഴയ വിവാദം വീണ്ടും ഉയർത്തിക്കാട്ടിയ കമന്റിന് നൽകിയ മറുപടി സമൂഹമാധ്യമങ്ങളിൽ വ്യാപകമായി പങ്കുവെക്കപ്പെടുന്നുണ്ട്.
Summary: Actress Maala Parvathi has responded to a social media comment that brought up past allegations involving her son. She said no case had been filed by the complainant, rejected any compromise attempts, and revealed that her son has stayed away from public appearances for the past six years because of the controversy.
