തിരുവനന്തപുരം: വട്ടിയൂർക്കാവിലെ വധശ്രമക്കേസിലെ പ്രതിയും ബിജെപി കൗൺസിലറുമായ ആർ. സുഗതനെ പിടികൂടിയ പൊലീസ് നടപടിയെ ആഭ്യന്തരമന്ത്രി രമേശ് ചെന്നിത്തല അഭിനന്ദിച്ചു. കൗൺസിലറുടെ അറസ്റ്റിൽ അസ്വാഭാവികമായി ഒന്നുമില്ലെന്നും, ഗുണ്ടകൾ ആരായാലും അവർക്കെതിരെ കർശന നടപടി തുടരുമെന്നും മന്ത്രി വ്യക്തമാക്കി.(Home Minister Ramesh Chennithala Appreciates Police for Arresting BJP Councillor)
പ്രതിയെ പിടികൂടുന്നതിനിടെ പൊലീസ് ഉദ്യോഗസ്ഥർ നടത്തിയ ഇടപെടലുകളെ മന്ത്രി പ്രശംസിച്ചു. ആകാശത്തേക്ക് വെടിവെച്ച് പ്രതിയെ കീഴടക്കിയ പൊലീസ് ഉദ്യോഗസ്ഥരുടെ ധീരതയെ അദ്ദേഹം പ്രത്യേകം പരാമർശിച്ചു. ഗുണ്ടകൾ ആരായാലും എവിടെയുണ്ടെങ്കിലും ആ പണി നിർത്തിപ്പോകുന്നതാണ് അവർക്ക് നല്ലത്. കേരളത്തെ ഗുണ്ടകളുടെ പറുദീസയാക്കാൻ ഒരുതരത്തിലും അനുവദിക്കില്ല. ഇത്തരം വിഷയങ്ങളിൽ സർക്കാർ വിട്ടുവീഴ്ചയില്ലാത്ത നടപടികളാണ് സ്വീകരിക്കുന്നത്, രമേശ് ചെന്നിത്തല പറഞ്ഞു.
അറസ്റ്റിനിടെ പ്രതിയുടെ കുട്ടിയെ ആക്രമിച്ചെന്ന ആരോപണങ്ങളെ മന്ത്രി ശക്തമായി തള്ളി. പൊലീസിന്റെ മനോവീര്യം തകർക്കാനുള്ള ബോധപൂർവമായ ശ്രമമാണ് ഇതിന് പിന്നിലെന്ന് അദ്ദേഹം പറഞ്ഞു. കള്ളക്കഥകൾ മെനഞ്ഞ് പൊലീസ് സേനയെ അനാവശ്യമായി പ്രതിക്കൂട്ടിലാക്കാൻ ആരും ശ്രമിക്കരുതെന്നും മന്ത്രി മുന്നറിയിപ്പ് നൽകി.
വട്ടിയൂർക്കാവിലെ വധശ്രമക്കേസിലെ പ്രതിയും ബിജെപി കൗൺസിലറുമായ ആർ. സുഗതനെ പൊലീസ് അറസ്റ്റ് ചെയ്തു. കാപ്പ (KAPA) നിയമപ്രകാരം നടപടിയെടുത്ത സുഗതനെ രാവിലെ പൂജപ്പുര സെൻട്രൽ ജയിലിലേക്ക് മാറ്റി. സംസ്ഥാനത്ത് കാപ്പ പ്രകാരം ജയിലിലാകുന്ന ആദ്യ കൗൺസിലറാണ് സുഗതൻ.
Story Summary
Home Minister Ramesh Chennithala has commended the Kerala Police for the dramatic arrest of BJP Councillor R. Sugathan, who is an accused in an attempted murder case. He warned that the government will take stern action against criminal elements and criticized attempts to tarnish the police’s reputation with false allegations.
