ആലപ്പുഴ: കേരളത്തിലും തമിഴ്നാട്ടിലും ബിജെപിക്ക് വലിയ രാഷ്ട്രീയ സാധ്യതകളാണുള്ളതെന്നും സംസ്ഥാനത്ത് ഭരണമാറ്റം അനിവാര്യമാണെന്നും ബിജെപി ദേശീയ നിർവാഹകസമിതി അംഗവും നടിയുമായ ഖുശ്ബു (Khushbu BJP). ഹരിപ്പാട് നിയസഭാ മണ്ഡലത്തിലെ എൻ.ഡി.എ സ്ഥാനാർത്ഥിയുടെ തിരഞ്ഞെടുപ്പ് പ്രചാരണ പരിപാടികളിൽ സംസാരിക്കുകയായിരുന്നു അവർ. കേരളത്തിൽ ബിജെപി നേതൃത്വം നൽകുന്ന സർക്കാർ അധികാരത്തിൽ വരുമെന്നും ഖുശ്ബു ആത്മവിശ്വാസം പ്രകടിപ്പിച്ചു.
മണ്ഡലത്തിലെ വികസന മുരടിപ്പിനെതിരെ രൂക്ഷമായ ഭാഷയിലാണ് ഖുശ്ബു പ്രതികരിച്ചത്. പള്ളിപ്പാട് പനംപള്ളി കോളനിയിലെ കുടിവെള്ള പ്രശ്നം ഇതിന് ഉദാഹരണമായി അവർ ചൂണ്ടിക്കാട്ടി. കഴിഞ്ഞ ഒരു മാസമായി കോളനിയിൽ കുടിവെള്ളം ലഭ്യമല്ലായിരുന്നു. എന്നാൽ ബിജെപി അവിടെ ഒരു പൊതുസമ്മേളനം സംഘടിപ്പിക്കുന്നു എന്ന് അറിഞ്ഞപ്പോൾ മാത്രമാണ് അധികൃതർ വെള്ളമെത്തിക്കാൻ തയ്യാറായതെന്ന് അവർ പരിഹസിച്ചു.
കോൺഗ്രസിനെ ഇന്ന് ഒരു രാഷ്ട്രീയ പാർട്ടിയായി പരിഗണിക്കാൻ പോലും കഴിയില്ല. ഡീൽ രാഷ്ട്രീയത്തെക്കുറിച്ചുള്ള അവരുടെ ആരോപണങ്ങൾക്ക് മറുപടി നൽകാനില്ലെന്നും ഖുശ്ബു വ്യക്തമാക്കി. പ്രധാനമന്ത്രി നരേന്ദ്ര മോദി രാജ്യത്തിനായി 24 മണിക്കൂറും പ്രവർത്തിക്കുന്നത് പോലെ, ബിജെപി സ്ഥാനാർത്ഥി വിജയിച്ചാൽ മണ്ഡലത്തിനായി അഹോരാത്രം പണിയെടുക്കുമെന്ന് അവർ ഉറപ്പുനൽകി.
കേരളത്തിന്റെ സമഗ്രമായ വികസനത്തിന് ബിജെപി അധികാരത്തിൽ വരണമെന്നും നിലവിലെ രാഷ്ട്രീയ സാഹചര്യത്തിൽ മാറ്റം വേണമെന്നും അവർ കൂട്ടിച്ചേർത്തു. ഹരിപ്പാട് നഗരത്തിൽ നടന്ന ആവേശകരമായ റോഡ് ഷോയ്ക്ക് ശേഷമാണ് പനംപള്ളി കോളനിയിലെ പൊതുസമ്മേളനത്തിൽ ഖുശ്ബു പങ്കെടുത്തത്. താരത്തെ കാണാൻ വൻ ജനക്കൂട്ടമാണ് മണ്ഡലത്തിന്റെ വിവിധ ഭാഗങ്ങളിൽ എത്തിയത്.
Story Summary:
BJP National Executive member and actress Khushbu campaigned in Harippad, Alappuzha, stating that a change of government is inevitable in Kerala. She criticized the Congress party and highlighted the lack of development in the constituency, specifically mentioning the water crisis in Panampally colony. Khushbu expressed confidence that an NDA government would come to power in the state.
