വാഷിംഗ്ടൺ: അന്താരാഷ്ട്ര തലത്തിൽ അതിപ്രധാനമായ ഹോർമുസ് കടലിടുക്കിലൂടെയുള്ള (Strait of hormuz shipping safety) കപ്പൽ ഗതാഗതം പൂർണ്ണമായും സുരക്ഷിതമാണെന്നും നിയമാനുസൃതമായി സർവീസ് നടത്തുന്ന എല്ലാ കപ്പലുകൾക്കുമായി പാത തുറന്നുനൽകിയിരിക്കുകയാണെന്നും യുഎസ് സെൻട്രൽ കമാൻഡ് (CENTCOM). ഗൾഫ് മേഖലയിലെ യുഎസ് ഇടപെടലുകൾ അവസാനിപ്പിക്കുന്നത് വരെ ഹോർമുസ് കടലിടുക്ക് പൂർണ്ണമായി അടച്ചതായും കപ്പലുകളെ കടത്തിവിടില്ലെന്നുമുള്ള ഇറാന്റെ പ്രഖ്യാപനങ്ങൾക്ക് തൊട്ടുപിന്നാലെയാണ് യുഎസ് സെൻട്രൽ കമാൻഡ് നിലപാട് വ്യക്തമാക്കിയത്.
മേഖലയിൽ ഇറാന്റെ ഭാഗത്തുനിന്നുള്ള ആവർത്തിച്ചുള്ള ആക്രമണങ്ങളും കടുത്ത ഭീഷണികളും നിലനിൽക്കുന്നുണ്ടെങ്കിലും നാവിക സ്വാതന്ത്ര്യം (Freedom of Navigation) ഉറപ്പുവരുത്താൻ യുഎസ് സൈന്യം സദാ സന്നദ്ധരാണെന്ന് അധികൃതർ അറിയിച്ചു. ഹോർമുസ് കടലിടുക്കിന്മേൽ ഇറാന് യാതൊരുവിധ നിയന്ത്രണവുമില്ല. നിലവിൽ അന്താരാഷ്ട്ര നിയമങ്ങൾ പാലിച്ചുകൊണ്ട് ഈ പാതയിലൂടെയുള്ള കപ്പൽ ഗതാഗതം സുഗമമായി മുന്നോട്ട് പോകുന്നുണ്ടെന്നും യുഎസ് നാവികസേന ഉറപ്പുനൽകുന്നു. എന്നാൽ, തങ്ങൾ നിർദേശിക്കുന്ന ബദൽ പാതകൾ ഉപയോഗിക്കുന്ന കപ്പലുകളെ വകവരുത്തുമെന്ന കടുത്ത മുന്നറിയിപ്പാണ് ഇറാൻ റെവലൂഷനറി ഗാർഡ് (IRGC) നൽകിയിരിക്കുന്നത്.
ഇതിനിടെ മേഖലയിൽ കപ്പലുകൾക്ക് നേരെയുള്ള ആക്രമണം തുടരുകയാണ്. കഴിഞ്ഞ ദിവസം സൈപ്രസ് പതാക വഹിച്ച ഒരു ചരക്കുകപ്പലിന് നേരെ മിസൈൽ ആക്രമണം ഉണ്ടാകുകയും കപ്പലിന്റെ എൻജിൻ റൂമിന് വൻതോതിൽ തീപിടിക്കുകയും ചെയ്തു. അപകടത്തിൽപ്പെട്ട കപ്പലിലെ ജീവനക്കാരെ ഒമാൻ നാവികസേനയാണ് സാഹസികമായി രക്ഷപ്പെടുത്തിയത്. കപ്പൽ ആക്രമണത്തിന് പിന്നാലെ പ്രതികാരമെന്നോണം ഇറാൻ ലക്ഷ്യമാക്കി അമേരിക്കയുടെ അതിശക്തമായ വ്യോമാക്രമണവും ഉണ്ടായി.
തെക്കൻ ഇറാനിലെ പ്രമുഖ നഗരങ്ങളും തുറമുഖങ്ങളും കേന്ദ്രീകരിച്ചായിരുന്നു അമേരിക്കൻ യുദ്ധവിമാനങ്ങൾ ബോംബവർഷം നടത്തിയത്. ബന്ദർ അബ്ബാസ്, ബുഷഹർ, ചബഹർ, കിഷ് ദ്വീപ്, സിറിക്ക് തുടങ്ങിയ തന്ത്രപ്രധാന പ്രദേശങ്ങളിൽ ഈ ആഴ്ച അമേരിക്ക നടത്തുന്ന മൂന്നാമത്തെ വ്യോമാക്രമണം കൂടിയാണിത്. യുഎസ് പ്രസിഡന്റ് ഡോണൾഡ് ട്രംപിന്റെ നേരിട്ടുള്ള ഉത്തരവുപ്രകാരമാണ് ഇറാന്റെ നാവിക ആസ്തികളെയും വിക്ഷേപണ കേന്ദ്രങ്ങളെയും തകർത്തുകൊണ്ടുള്ള സൈനിക നടപടിയെന്ന് യുഎസ് സെൻട്രൽ കമാൻഡ് ഔദ്യോഗികമായി സ്ഥിരീകരിച്ചു. ഇതോടെ ഗൾഫ് മേഖലയിൽ യുഎസ്-ഇറാൻ സൈനിക നീക്കങ്ങൾ കടുത്ത യുദ്ധപ്രതീതിയാണ് സൃഷ്ടിച്ചിരിക്കുന്നത്.
Story Summary: The US Central Command dismissed Iran’s claims of closing the Strait of Hormuz, asserting that the shipping lane remains open and safe for lawful transit. This statement follows heavy US airstrikes ordered by President Donald Trump on southern Iranian ports like Bandar Abbas and Chabahar, triggered by a missile attack on a Cyprus-flagged vessel.
