മോൺട്രിയൽ: മോൺട്രിയൽ-ട്രൂഡോ അന്താരാഷ്ട്ര വിമാനത്താവളത്തിൽ എയർ കാനഡയുടെ ബോയിംഗ് 737 മാക്സ് 8 വിമാനം ടാക്സിവേയിൽ നിന്ന് തെന്നിമാറി പുൽത്തകിടിയിലേക്ക് കയറി (Air Canada Incident Montreal). വ്യാഴാഴ്ച ഉച്ചകഴിഞ്ഞ് ലോസ് ഏഞ്ചൽസിൽ നിന്ന് മോൺട്രിയലിലേക്ക് എത്തിയ ‘എസി 774’ വിമാനമാണ് അപകടത്തിൽപ്പെട്ടത്. വിമാനത്തിലുണ്ടായിരുന്ന 156 യാത്രക്കാരും 6 ജീവനക്കാരും സുരക്ഷിതരാണെന്ന് എയർ കാനഡ അധികൃതർ അറിയിച്ചു. ആർക്കും പരിക്കുകളില്ല.
വിമാനം ലാൻഡ് ചെയ്ത് ടാക്സിവേയിലേക്ക് പ്രവേശിക്കുന്നതിനിടെയാണ് അപകടം സംഭവിച്ചത്. സംഭവത്തെത്തുടർന്ന് വിമാനത്താവളത്തിലെ നോർത്ത് റൺവേ താൽക്കാലികമായി അടച്ചിടുകയും അടിയന്തര രക്ഷാപ്രവർത്തനങ്ങൾ ആരംഭിക്കുകയും ചെയ്തു. യാത്രക്കാരെ ബസ് മാർഗ്ഗം സുരക്ഷിതമായി ടെർമിനലിലെത്തിച്ചു. വിമാനത്താവളത്തിലെ അടിയന്തര ഏകോപന കേന്ദ്രം ഉടൻ തന്നെ പ്രവർത്തിക്കുകയും സ്ഥിതിഗതികൾ നിയന്ത്രണവിധേയമാക്കുകയും ചെയ്തു.
അപകടം നടന്ന സമയത്ത് പ്രദേശത്ത് മഴയും ശക്തമായ കാറ്റും ഉണ്ടായിരുന്നുവെന്ന് റിപ്പോർട്ടുകളുണ്ട്. ടാക്സിവേയിലേക്കുള്ള തിരിവിൽ വിമാനം നിയന്ത്രണം വിട്ടതാവാമെന്നാണ് പ്രാഥമിക നിഗമനം. സംഭവത്തിൽ എയർ കാനഡയും കാനഡയിലെ ട്രാൻസ്പോർട്ടേഷൻ സേഫ്റ്റി ബോർഡും അന്വേഷണം ആരംഭിച്ചിട്ടുണ്ട്. റൺവേ താൽക്കാലികമായി അടച്ചതിനാൽ ചില വിമാനങ്ങളുടെ സർവീസുകളിൽ വൈകല്യങ്ങൾ നേരിട്ടെങ്കിലും, പിന്നീട് വിമാനത്താവളത്തിന്റെ പ്രവർത്തനം സാധാരണ നിലയിലായി.
Summary: An Air Canada Boeing 737 MAX 8 veered off a taxiway into the grass after landing at Montreal-Trudeau International Airport on Thursday. All 162 people on board (156 passengers and 6 crew) were evacuated safely with no injuries reported. The incident caused a temporary closure of the airport’s North Runway and minor flight delays. Authorities, including the Transportation Safety Board of Canada, are investigating the incident, which occurred amidst rainy and windy conditions.
