ബെംഗളൂരു: ഒന്നിലധികം സംസ്ഥാനങ്ങളിൽ വോട്ടർ ഐഡികൾ കൈവശം വെച്ചെന്ന കേസിൽ പ്രമുഖ നടൻ പ്രകാശ് രാജിന് ബെംഗളൂരു കോടതി ജാമ്യം അനുവദിച്ചു. കോടതി അയച്ച നോട്ടീസുകളോട് പ്രതികരിക്കാത്തതിനെ തുടർന്ന് പ്രകാശ് രാജിനെതിരെ ബെംഗളൂരുവിലെ 48-ാമത് അഡീഷണൽ ചീഫ് ജുഡീഷ്യൽ മജിസ്ട്രേറ്റ് കോടതി നേരത്തെ ജാമ്യമില്ലാ അറസ്റ്റ് വാറണ്ട് പുറപ്പെടുവിച്ചിരുന്നു. വെള്ളിയാഴ്ച കോടതിയിൽ നേരിട്ട് ഹാജരായ പ്രകാശ് രാജ് ജാമ്യാപേക്ഷ സമർപ്പിക്കുകയും, അഭിഭാഷകർ വാറണ്ട് റദ്ദാക്കണമെന്ന് ആവശ്യപ്പെടുകയുമായിരുന്നു.(Actor Prakash Raj granted bail by Bengaluru Court In Multiple Voter ID Case )
ഇരുഭാഗത്തിന്റെയും വാദങ്ങൾ കേട്ട കോടതി, ജാമ്യമില്ലാ വാറണ്ട് റദ്ദാക്കുകയും നാലായിരം രൂപയുടെ പണയ ജാമ്യ വ്യവസ്ഥയിൽ പ്രകാശ് രാജിന് ജാമ്യം അനുവദിക്കുകയും ചെയ്തു.കോടതിയിൽ നിന്ന് മുൻപ് അയച്ച സമൻസുകൾ ഒന്നും തന്നെ പ്രകാശ് രാജിന് നേരിട്ട് ലഭിച്ചിരുന്നില്ലെന്നും, മാധ്യമ വാർത്തകളിലൂടെ മാത്രമാണ് ഇത്തരമൊരു കോടതി നടപടിയെക്കുറിച്ച് അറിഞ്ഞതെന്നും അദ്ദേഹത്തിന്റെ അഭിഭാഷകർ കോടതിയെ ബോധിപ്പിച്ചു.
ഈ വാദം അംഗീകരിച്ചാണ് കോടതി വാറണ്ട് പിൻവലിച്ചത്. കർണാടക, തമിഴ്നാട്, തെലങ്കാന ഉൾപ്പെടെ രാജ്യത്തെ നാല് സംസ്ഥാനങ്ങളിൽ പ്രകാശ് രാജിന് ഒരേസമയം വോട്ടർ ഐഡി കാർഡുകളുണ്ടെന്ന് ആരോപിച്ച് അഭിഭാഷകനാണ് ഹലസൂരു ഗേറ്റ് പോലീസ് സ്റ്റേഷനിൽ പരാതി നൽകിയത്.
Story Summary
The 48th ACJM Court in Bengaluru recalled a non-bailable warrant and granted bail to actor Prakash Raj in a multiple voter ID case upon a cash surety of Rs 4,000. Prakash Raj appeared in person after his lawyers argued that previous court summons were never served to him. The case, filed in 2019, alleges that the actor illegally holds voter identity cards in four states including Karnataka, Tamil Nadu, and Telangana.
