ന്യൂഡൽഹി: 2030ലെ കോമൺവെൽത്ത് ഗെയിംസിന് അഹമ്മദാബാദ് ആതിഥേയത്വം വഹിക്കാനൊരുങ്ങുന്നതിനിടെ, ഗുജറാത്തിനെ വേദിയായി തെരഞ്ഞെടുത്തതിനെ ചോദ്യം ചെയ്ത് ഹരിയാനയിൽ നിന്നുള്ള കോൺഗ്രസ് എംപി ദീപേന്ദർ സിങ് ഹൂഡ ( Commonwealth Games 2030 Ahmedabad). രാജ്യത്തിന് ഏറ്റവും കൂടുതൽ മെഡലുകൾ സമ്മാനിക്കുന്ന ഹരിയാനയെ ഗെയിംസിന്റെ ആതിഥേയ സംസ്ഥാനമായോ സഹ-ആതിഥേയ സംസ്ഥാനമായോ പരിഗണിക്കണമെന്നാണ് അദ്ദേഹത്തിന്റെ ആവശ്യം.
ഗ്ലാസ്ഗോയിൽ നടന്ന 2026 കോമൺവെൽത്ത് ഗെയിംസിന്റെ സമാപനച്ചടങ്ങിൽ ഗെയിംസ് പതാകയും ബാറ്റണും ഇന്ത്യയ്ക്ക് ഔദ്യോഗികമായി കൈമാറി. 2030ലെ കോമൺവെൽത്ത് ഗെയിംസിന്റെ വേദിയായ അഹമ്മദാബാദിലേക്ക് പ്രതീകാത്മകമായി കൈമാറിയ പതാകയും ബാറ്റണും ഒളിമ്പിക് സ്വർണമെഡൽ ജേതാവ് നീരജ് ചോപ്ര, ഇന്ത്യൻ ഒളിമ്പിക് അസോസിയേഷൻ പ്രസിഡന്റ് പി.ടി. ഉഷ, ഗുജറാത്ത് ഉപമുഖ്യമന്ത്രി ഹർഷ് സംഘവി എന്നിവർ ചേർന്നാണ് ഏറ്റുവാങ്ങിയത്.
2010ൽ ഡൽഹിയിൽ കോമൺവെൽത്ത് ഗെയിംസിന് ആതിഥേയത്വം വഹിച്ച ഇന്ത്യ, 2030ൽ വീണ്ടും ഗെയിംസിന് വേദിയാകുന്നതോടെ രണ്ട് തവണ കോമൺവെൽത്ത് ഗെയിംസിന് ആതിഥേയത്വം വഹിക്കുന്ന രണ്ടാമത്തെ രാജ്യമായി മാറും. നേരത്തെ ഓസ്ട്രേലിയയാണ് രണ്ടുതവണ ഗെയിംസിന് വേദിയായത്. അതേസമയം, 2026ലെ ഗെയിംസിൽ ഇന്ത്യൻ താരങ്ങൾ മികച്ച പ്രകടനമാണ് കാഴ്ചവെച്ചത്. 13 സ്വർണം ഉൾപ്പെടെ 39 മെഡലുകളുമായി ഇന്ത്യ കാമ്പയിൻ പൂർത്തിയാക്കി. ഇതിൽ ഹരിയാനയിൽ നിന്നുള്ള താരങ്ങൾ ഏഴ് സ്വർണവും രണ്ട് വെള്ളിയും ഒരു വെങ്കലവും നേടി ശ്രദ്ധേയ സംഭാവന നൽകി.
“മെഡലുകൾ ഹരിയാനയ്ക്ക്, ഗെയിംസ് ഗുജറാത്തിന്” എന്നായിരുന്നു ദീപേന്ദർ ഹൂഡയുടെ പ്രതികരണം. 2026ലെ ഗെയിംസിൽ ഹരിയാനയ്ക്ക് 11 മെഡലുകൾ ലഭിച്ചപ്പോൾ ഗുജറാത്തിന് ഒരു മെഡൽ പോലും നേടാനായില്ലെന്ന സംസ്ഥാനാടിസ്ഥാനത്തിലുള്ള കണക്കും അദ്ദേഹം സമൂഹമാധ്യമത്തിൽ പങ്കുവെച്ചു. ഹരിയാനയുടെ കായികമികവ് പരിഗണിച്ച് 2030ലെ ഗെയിംസിൽ സംസ്ഥാനത്തിന് പ്രധാന പങ്ക് നൽകണമെന്നും അദ്ദേഹം ആവശ്യപ്പെട്ടു.
ഹരിയാനയിലെ മറ്റ് കോൺഗ്രസ് എംപിമാർക്കൊപ്പം പാർലമെന്റിന് മുന്നിൽ പ്രതിഷേധിച്ച ഹൂഡ, ഹരിയാനയെ ഗെയിംസിന്റെ ആതിഥേയ സംസ്ഥാനമാക്കുകയോ സഹ-ആതിഥേയ പദവി നൽകുകയോ വേണമെന്ന ആവശ്യവും ഉന്നയിച്ചു. അതേസമയം, ഹൂഡയുടെ വിമർശനത്തിന് ബിജെപി നേതാവും മുൻ ഗുസ്തി താരവുമായ ബബിത ഫോഗട്ട് മറുപടി നൽകി. 2010ലെ കോമൺവെൽത്ത് ഗെയിംസ് ഡൽഹിയിൽ നടന്നപ്പോൾ എന്തുകൊണ്ട് ഹരിയാനയ്ക്കായി ഇത്തരമൊരു ആവശ്യം ഉന്നയിച്ചില്ലെന്ന് അവർ ചോദിച്ചു. ഹരിയാന ഗുസ്തി അസോസിയേഷൻ പ്രസിഡന്റായിരുന്ന കാലത്ത് സംസ്ഥാനത്ത് ദേശീയതല കായികമത്സരം പോലും സംഘടിപ്പിക്കാൻ സാധിച്ചില്ലെന്നും ഫോഗട്ട് വിമർശിച്ചു.
കോമൺവെൽത്ത് ഗെയിംസ് ഒരു സംസ്ഥാനമല്ല, രാജ്യമാണ് ആതിഥേയത്വം വഹിക്കുന്നതെന്നും ഒരു സംസ്ഥാനത്ത് അന്താരാഷ്ട്ര കായികമേള നടക്കുമ്പോൾ അത് രാജ്യത്തിന്റെ നേട്ടമായി കണക്കാക്കണമെന്നും ബബിത ഫോഗട്ട് പറഞ്ഞു. 2026ലെ ഗെയിംസിൽ ഇന്ത്യൻ താരങ്ങളുടെ മികച്ച പ്രകടനത്തെ അഭിനന്ദിക്കാതെ ഇപ്പോൾ ഹരിയാനയുടെ പേരിൽ രാഷ്ട്രീയ വിവാദം സൃഷ്ടിക്കുകയാണെന്നും അവർ ആരോപിച്ചു. 2030ലെ കോമൺവെൽത്ത് ഗെയിംസിന്റെ വേദിയായി അഹമ്മദാബാദിനെ തെരഞ്ഞെടുത്തതോടെ കായിക അടിസ്ഥാനസൗകര്യ വികസനം, സംസ്ഥാനങ്ങളുടെ പങ്കാളിത്തം, കായിക നേട്ടങ്ങളുടെ അടിസ്ഥാനത്തിലുള്ള അംഗീകാരം തുടങ്ങിയ വിഷയങ്ങളും രാഷ്ട്രീയ ചർച്ചയായി മാറിയിരിക്കുകയാണ്.
Summary: The handover of the Commonwealth Games flag and baton to India for the 2030 Ahmedabad edition has triggered a political debate. Congress MP Deepender Hooda questioned why Gujarat was chosen despite Haryana athletes contributing a major share of India’s medals, while BJP leader and former wrestler Babita Phogat said international sporting events are hosted by the country, not an individual state.
