ചെന്നൈ: തമിഴ്നാട് മുഖ്യമന്ത്രിയായി തമിഴക വെട്രി കഴകം (TVK) അധ്യക്ഷൻ വിജയ് സത്യപ്രതിജ്ഞ ചെയ്യാനിരിക്കെ സംസ്ഥാന രാഷ്ട്രീയത്തിൽ അപ്രതീക്ഷിത തിരിച്ചടി (Tamil Nadu Politics 2026). വിജയ്ക്ക് ഭൂരിപക്ഷമില്ലെന്നും വ്യാജ കത്തുകൾ ഹാജരാക്കിയാണ് പിന്തുണ അവകാശപ്പെടുന്നതെന്നും ആരോപിച്ച് ടിടിവി ദിനകരൻ രംഗത്തെത്തി. എടപ്പാടി പളനിസ്വാമിയെ (EPS) മുഖ്യമന്ത്രിയാക്കാൻ ക്ഷണിക്കണമെന്ന് ആവശ്യപ്പെട്ട് ദിനകരൻ ഗവർണർക്ക് കത്ത് നൽകി.
തന്റെ പാർട്ടിയായ എഎംഎംകെയുടെ പിന്തുണ ടിവികെയ്ക്കുണ്ടെന്ന് കാണിച്ച് വിജയ് വ്യാജ കത്തുണ്ടാക്കിയെന്നാണ് ദിനകരന്റെ ആരോപണം. മന്നാർകുടി എംഎൽഎ എസ്. കാമരാജ് ടിവികെയെ പിന്തുണച്ചിട്ടില്ലെന്നും ഇക്കാര്യത്തിൽ അന്വേഷണം വേണമെന്നും അദ്ദേഹം ആവശ്യപ്പെട്ടു.
234 അംഗ നിയമസഭയിൽ ഭരിക്കാൻ 118 പേരുടെ പിന്തുണ വേണമെന്നിരിക്കെ വിജയ്ക്ക് നിലവിൽ 116 പേരുടെ പിന്തുണ മാത്രമേ ഉറപ്പാക്കാൻ കഴിഞ്ഞിട്ടുള്ളൂ എന്നാണ് വിവരം. വിസികെ (VCK), മുസ്ലിം ലീഗ് എന്നീ പാർട്ടികളുടെ പിന്തുണ കത്തുകൾ ഹാജരാക്കുന്നതിലും ടിവികെ പരാജയപ്പെട്ടതായി റിപ്പോർട്ടുകളുണ്ട്.
ശനിയാഴ്ച രാവിലെ 11 മണിക്ക് സത്യപ്രതിജ്ഞ നടക്കുമെന്ന് വാർത്തകളുണ്ടായിരുന്നെങ്കിലും വിജയ്യെ സർക്കാരുണ്ടാക്കാൻ ഇതുവരെ ക്ഷണിച്ചിട്ടില്ലെന്ന് ഗവർണർ ആർ.വി. ആർലേക്കറുടെ ഓഫീസ് വ്യക്തമാക്കി. മതിയായ രേഖകൾ ഹാജരാക്കാത്തതിനാൽ നാളെ സത്യപ്രതിജ്ഞ ഉണ്ടാകാൻ സാധ്യതയില്ല.
വിജയ്ക്ക് ഭൂരിപക്ഷം തെളിയിക്കാൻ കഴിയാത്ത സാഹചര്യത്തിൽ എഐഎഡിഎംകെ (AIADMK) നേതാവ് എടപ്പാടി പളനിസ്വാമിയെ സർക്കാരുണ്ടാക്കാൻ ക്ഷണിക്കണമെന്നാണ് ടിടിവി ദിനകരൻ ഗവർണറോട് ആവശ്യപ്പെട്ടത്. വിജയ് ഇന്ന് ഗവർണറെ കണ്ട് ഭൂരിപക്ഷം അവകാശപ്പെട്ടെങ്കിലും പിന്തുണക്കുന്ന എംഎൽഎമാരുടെ കൃത്യമായ പട്ടിക നൽകാൻ സാധിച്ചില്ലെന്നാണ് സൂചന. കോൺഗ്രസ്, സിപിഐ, സിപിഎം എന്നീ പാർട്ടികൾ വിജയ്ക്ക് പിന്തുണ പ്രഖ്യാപിച്ചിട്ടുണ്ടെങ്കിലും മറ്റ് ചെറുകക്ഷികളുടെ നിലപാട് നിർണ്ണായകമാണ്. തമിഴ്നാട് രാഷ്ട്രീയത്തിലെ ഈ അനിശ്ചിതത്വം വരും ദിവസങ്ങളിൽ കൂടുതൽ നാടകീയമായ നീക്കങ്ങൾക്ക് വഴിവെച്ചേക്കാം.
Story Summary: High drama in Tamil Nadu politics as Vijay’s TVK struggles to prove majority for government formation. AMMK leader TTV Dhinakaran met Governor R.V. Arlekar, accusing TVK of using a fake support letter and urging the Governor to invite Edappadi Palaniswami (EPS) to form the government. Vijay currently has 116 MLAs’ support, two short of the magic number 118, leading to the postponement of the scheduled swearing-in.
