ന്യൂഡൽഹി: സി.യു.ഇ.ടി പരീക്ഷയ്ക്കിടെയുണ്ടായ സാങ്കേതിക തകരാർ വലിയ രാഷ്ട്രീയ വിവാദത്തിലേക്ക്. മെയ് 30-ന് നടന്ന പരീക്ഷയിൽ പല കേന്ദ്രങ്ങളിലും പരീക്ഷ ആരംഭിക്കാൻ വൈകിയതിനെത്തുടർന്ന് കോൺഗ്രസ് നേതാവ് രാഹുൽ ഗാന്ധി കേന്ദ്ര സർക്കാരിനെതിരെ രൂക്ഷ വിമർശനവുമായി രംഗത്തെത്തി.(Rahul Gandhi Criticizes Government Over Technical Glitch In CUET UG 2026 Exam)
നീറ്റ് (NEET), സി.ബി.എസ്.ഇ (CBSE), എസ്.എസ്.സി (SSC), ഇപ്പോൾ സി.യു.ഇ.ടി (CUET) തുടങ്ങി നാല് പ്രധാന പരീക്ഷകൾ നടന്നിട്ടും, പത്തു ദശലക്ഷത്തോളം വിദ്യാർത്ഥികളുടെ ഭാവി നിർണ്ണയിക്കുന്ന ഒരൊറ്റ പരീക്ഷ പോലും സത്യസന്ധമായി നടത്താൻ സർക്കാരിന് കഴിഞ്ഞില്ലെന്ന് രാഹുൽ ഗാന്ധി എക്സിൽ കുറിച്ചു. ഇന്ത്യയെ ‘വിശ്വഗുരു’വാക്കി മാറ്റുമെന്ന സർക്കാരിന്റെ അവകാശവാദത്തെ പരിഹസിച്ച അദ്ദേഹം, വിദ്യാഭ്യാസ സംവിധാനം തകർന്നെന്നും ഇതിന് ഉത്തരവാദികളായവരോട് യുവതലമുറ കണക്കു ചോദിക്കുമെന്നും മുന്നറിയിപ്പ് നൽകി.
നാഷണൽ ടെസ്റ്റിംഗ് ഏജൻസിയുടെ (NTA) സാങ്കേതിക പങ്കാളിയായ ടാറ്റ കൺസൾട്ടൻസി സർവീസസിന്റെ (TCS) ഭാഗത്തുണ്ടായ സാങ്കേതിക പിഴവാണ് പരീക്ഷ വൈകാൻ കാരണമായതെന്ന് എൻ.ടി.എ സ്ഥിരീകരിച്ചു. ഇതിനെത്തുടർന്ന് രണ്ടാം ഷിഫ്റ്റ് പരീക്ഷയുടെ സമയം പുനഃക്രമീകരിക്കേണ്ടി വന്നു. ഉച്ചയ്ക്ക് 3 മണിക്ക് തുടങ്ങേണ്ടിയിരുന്ന പരീക്ഷ വൈകിട്ട് 4 മണിക്കാണ് ആരംഭിച്ചത്. വിദ്യാർത്ഥികൾക്ക് 2.30 മുതൽ പ്രവേശനം അനുവദിച്ചു.
സാങ്കേതിക തകരാർ പരിഹരിച്ചതായും വിദ്യാർത്ഥികൾക്ക് നഷ്ടപ്പെട്ട സമയം നികത്താൻ അധിക സമയം അനുവദിക്കുമെന്നും എൻ.ടി.എ അറിയിച്ചു. രാവിലത്തെ ഷിഫ്റ്റിലെ വിദ്യാർത്ഥികൾക്ക് പൂർണ്ണ സമയം ലഭിച്ചെന്നും ഏജൻസി വ്യക്തമാക്കി. കഴിഞ്ഞ ഒരു വർഷമായി സി.ബി.എസ്.ഇ, നീറ്റ് പേപ്പർ ചോർച്ച തുടങ്ങിയ സംഭവങ്ങൾ പരീക്ഷാ നടത്തിപ്പിന്റെ വിശ്വാസ്യതയെ വലിയ തോതിൽ ചോദ്യം ചെയ്തിരുന്നു. ഇതിനു പിന്നാലെയാണ് ഇപ്പോൾ സി.യു.ഇ.ടിയിലെ സാങ്കേതിക തകരാറും ഉണ്ടായിരിക്കുന്നത്. പരീക്ഷാ നടത്തിപ്പിലെ സുതാര്യതയും മുൻകരുതലും സംബന്ധിച്ച് വിദ്യാർത്ഥികളും രക്ഷിതാക്കളും വലിയ ആശങ്കയിലാണ്.
Story Summary
A technical glitch during the CUET UG 2026 examination led to delays across several centers, drawing sharp criticism from Rahul Gandhi, who alleged a systemic failure in conducting major national examinations honestly. While the National Testing Agency (NTA) rectified the issue and provided compensatory time to students, the incident has intensified political debate over the management and transparency of high-stakes testing in India.
