തിരുവനന്തപുരം: കാപ്പാ കേസിൽ ജയിലിൽ കഴിയുന്ന കൗൺസിലർ ആർ. സുഗതന്റെ (R Sugathan) അവധി അപേക്ഷയുമായി ബന്ധപ്പെട്ട വിവാദത്തിൽ ആഭ്യന്തര വകുപ്പ് അണ്ടർ സെക്രട്ടറിക്കെതിരെ അന്വേഷണം പ്രഖ്യാപിച്ചു. മന്ത്രിയുടെയോ വകുപ്പ് സെക്രട്ടറിയുടെയോ അനുമതിയില്ലാതെ ഉദ്യോഗസ്ഥൻ സ്വമേധയാ തീരുമാനമെടുത്തെന്ന ആരോപണത്തെ തുടർന്നാണ് നടപടി.
കൗൺസിലറുടെ അവധി അപേക്ഷയിൽ ആഭ്യന്തര വകുപ്പ് സ്വീകരിച്ച നടപടിയെ മുൻനിർത്തി മുൻ ആഭ്യന്തരമന്ത്രി രമേശ് ചെന്നിത്തല ശക്തമായ വിമർശനം ഉന്നയിച്ചിരുന്നു. ഇതിന് പിന്നാലെയാണ് ബന്ധപ്പെട്ട ഉദ്യോഗസ്ഥന്റെ നടപടികൾ അന്വേഷിക്കാൻ തീരുമാനമായത്.
തദ്ദേശ സ്വയംഭരണ വകുപ്പിന്റെ അഭിപ്രായം ഉൾപ്പെടുത്തി ആഭ്യന്തര വകുപ്പിന്റെ പേരിൽ കത്ത് നൽകിയ നടപടിയിലാണ് വിവാദം ഉയർന്നത്. വിഷയത്തിൽ ബന്ധപ്പെട്ട മന്ത്രിയുടെ അറിവോ അനുമതിയോ ഇല്ലാതെയാണ് നടപടികൾ സ്വീകരിച്ചതെന്ന ആരോപണമാണ് ഉയരുന്നത്.
അതേസമയം, കൗൺസിലറുടെ അവധി അപേക്ഷ പൂർണമായും നിയമപരമാണെന്ന് മേയർ വി.വി. രാജേഷ് പ്രതികരിച്ചു. കൗൺസിലറുടെ അംഗത്വം സംരക്ഷിക്കേണ്ടത് മേയറുടെ ഉത്തരവാദിത്തമാണെന്നും ആഭ്യന്തര വകുപ്പ് പുറത്തിറക്കിയ സർക്കുലറാണ് നടപടിക്ക് അടിസ്ഥാനമായതെന്നും അദ്ദേഹം വ്യക്തമാക്കി.
ഇതിനിടെ, അവധി അപേക്ഷ കൗൺസിൽ യോഗത്തിൽ അവതരിപ്പിച്ച് വോട്ടെടുപ്പിലൂടെ അംഗീകരിക്കണമെന്ന നിർദേശത്തിന്റെ നിയമസാധുത പരിശോധിച്ച് വ്യക്തത വരുത്തുമെന്ന് നഗരസഭ സെക്രട്ടറി അറിയിച്ചു. വിഷയത്തിൽ നിയമോപദേശം തേടി തുടർനടപടികൾ സ്വീകരിക്കുമെന്നും അധികൃതർ അറിയിച്ചു.
Story Summary:
The Kerala Home Department has ordered an inquiry against an Under Secretary over the handling of jailed councillor R. Sugathan’s leave application. The issue has sparked political controversy, with differing views from opposition leaders and the city mayor.
