ന്യൂഡൽഹി: രാജ്യത്ത് വിതരണം ചെയ്യുന്ന എഥനോൾ ചേർത്ത പെട്രോൾ വാഹനങ്ങളുടെ മൈലേജ് കുറയ്ക്കുന്നുവെന്ന പരാതികൾ ശക്തമാകുന്നതിനിടെ പ്രതികരണവുമായി നിതിൻ ഗഡ്കരി. സാധാരണക്കാരായ കാർ ഉടമകൾക്ക് അവരുടെ വാഹനത്തിന്റെ കൃത്യമായ മൈലേജ് സ്വയം കണക്കാക്കാൻ കഴിയില്ലെന്നും, ഇതിനായി കമ്പനി അംഗീകൃത ഡീലർമാരുടെ പരിശോധനാ സംവിധാനങ്ങളെ ആശ്രയിക്കണമെന്നും മന്ത്രി പറഞ്ഞു.(Nitin Gadkari on E20 petrol, says Car Owners Cannot Measure Mileage Accurately)
തന്റെ കാറിന്റെ മൈലേജ് ലിറ്ററിന് 11 കിലോമീറ്ററിൽ നിന്ന് 7 കിലോമീറ്ററായി കുത്തനെ കുറഞ്ഞുവെന്ന മാധ്യമപ്രവർത്തകയുടെ ചോദ്യത്തോട് പ്രതികരിക്കുകയായിരുന്നു അദ്ദേഹം. ഡാഷ്ബോർഡിലെ റീഡിങ് നോക്കിയാണ് താനിത് മനസിലാക്കിയതെന്ന് മാധ്യമപ്രവർത്തക പറഞ്ഞപ്പോൾ, തനിക്കും നിങ്ങൾക്കും അത്തരത്തിൽ മൈലേജ് കൃത്യമായി അളക്കാൻ കഴിയില്ലെന്ന് ഗഡ്കരി വ്യക്തമാക്കി. കമ്പനി ഡീലറുടെ പക്കലുള്ള പ്രത്യേക മെഷീൻ ഉപയോഗിച്ച് മാത്രമേ വാഹനങ്ങളുടെ യഥാർത്ഥ ഇന്ധനക്ഷമത കണ്ടെത്താനാകൂവെന്ന് എഥനോൾ മിശ്രിത പദ്ധതിയെ ശക്തമായി പിന്തുണയ്ക്കുന്ന മന്ത്രി ആവർത്തിച്ചു.
ഇ20 പെട്രോൾ ഉപയോഗിക്കുന്നത് വഴി ചില വാഹനങ്ങളിൽ 3 മുതൽ 5 ശതമാനം വരെ മൈലേജ് കുറയാൻ സാധ്യതയുണ്ടെന്ന് അടുത്തിടെ കേന്ദ്ര പെട്രോളിയം മന്ത്രാലയം തന്നെ സമ്മതിച്ചിരുന്നു. എങ്കിലും ഇന്ധന ഇറക്കുമതി ചെലവ് കുറയ്ക്കാനും പരിസ്ഥിതി മലിനീകരണം തടയാനുമുള്ള മികച്ച മാർഗ്ഗമാണിതെന്നാണ് സർക്കാരിന്റെ വാദം. ഏപ്രിൽ 1 മുതലാണ് രാജ്യത്ത് ഇ20 പെട്രോൾ വിതരണം കേന്ദ്ര സർക്കാർ നിർബന്ധമാക്കിയത്. എന്നാൽ പഴയ വാഹനങ്ങളിലെ ഇതിന്റെ പ്രകടനത്തെക്കുറിച്ചും എൻജിൻ തകരാറുകളെക്കുറിച്ചും വാഹന ഉടമകൾക്കിടയിലും ഓട്ടോമൊബൈൽ രംഗത്തും ആശങ്കകൾ നിലനിൽക്കുന്നുണ്ട്.
Story Summary
Union Minister Nitin Gadkari stated that car owners cannot accurately measure their vehicle’s fuel efficiency on their own and must rely on authorized dealer tests, amid rising complaints about E20 ethanol-blended petrol reducing mileage. This comes after the Petroleum Ministry acknowledged a potential 3-5% drop in fuel economy due to E20 fuel.
