ന്യൂഡൽഹി: ആർ.ഒ വാട്ടർ പ്യൂരിഫയർ നന്നാക്കാൻ വന്ന ടെക്നീഷ്യൻ എന്ന വ്യാജേന വീടുകളിൽ കയറി കവർച്ചയ്ക്ക് ശ്രമിച്ച മധ്യവയസ്കനെ ഡൽഹി പോലീസ് അറസ്റ്റ് ചെയ്തു. അജയ് ബഗ്ഗ എന്നയാളാണ് പിടിയിലായത്. കൈയ്യിൽ അരിവാളുമായി വീടുകൾ തോറും കയറിയിറങ്ങുന്ന ഇയാളുടെ ദൃശ്യങ്ങൾ സിസിടിവിയിൽ പതിഞ്ഞിരുന്നു. (Delhi RO Technician Robbery)
സെമി ഫോർമൽ വസ്ത്രങ്ങളും തൊപ്പിയും ധരിച്ചെത്തുന്ന ഇയാൾ വീടുകളിലെ ബെല്ലടിച്ച ശേഷം വാട്ടർ പ്യൂരിഫയർ സർവീസിനായി വന്നതാണെന്ന് പറയും. വീട്ടുകാർ വാതിൽ തുറന്നാൽ കൈയ്യിലുള്ള നീല പ്ലാസ്റ്റിക് കവറിൽ ഒളിപ്പിച്ചിരിക്കുന്ന അരിവാൾ കാട്ടി ഭീഷണിപ്പെടുത്തി അകത്തുകയറി കവർച്ച നടത്താനായിരുന്നു ഇയാളുടെ നീക്കം. ഷാലിമാർ ബാഗ്, കേശവ് പുരം തുടങ്ങിയ സ്ഥലങ്ങളിലെ റെസിഡൻഷ്യൽ സൊസൈറ്റികളിൽ ഇയാൾ കറങ്ങിനടക്കുന്ന ദൃശ്യങ്ങൾ പുറത്തുവന്നിട്ടുണ്ട്. ഡെലിവറി ബോയ് എന്ന വ്യാജേനയും ഇയാൾ മുൻപ് തട്ടിപ്പുകൾ നടത്തിയിരുന്നതായി പോലീസ് അറിയിച്ചു. വീഡിയോകൾ പ്രചരിച്ചതോടെ പോലീസ് അയൽക്കൂട്ടങ്ങളിൽ ജാഗ്രതാ നിർദ്ദേശം നൽകിയിരുന്നു. അപരിചിതർക്കായി വാതിൽ തുറക്കരുതെന്നും സംശയാസ്പദമായ രീതിയിൽ ആരെങ്കിലും എത്തിയാൽ ഉടൻ അറിയിക്കണമെന്നും പോലീസ് നിർദ്ദേശിച്ചു.
പിതാംപുര, കേശവ് പുരം തുടങ്ങിയ വടക്കുപടിഞ്ഞാറൻ ഡൽഹിയിലെ വിവിധ ഭാഗങ്ങളിൽ ഇയാൾ സമാനമായ രീതിയിൽ കുറ്റകൃത്യങ്ങൾ ചെയ്തിട്ടുള്ളതായി കണ്ടെത്തിയിട്ടുണ്ട്. പ്രതിയെ നിലവിൽ പോലീസ് വിശദമായി ചോദ്യം ചെയ്തുവരികയാണ്.
Summary: Delhi Police arrested Ajay Bagga for attempting robberies by posing as an RO filter technician. CCTV footage showed Bagga carrying a sickle in a blue plastic bag, targeting homes in areas like Shalimar Bagh and Pitampura. He would use the weapon to intimidate residents once they opened the door. Police issued a public alert following the viral videos, leading to his eventual apprehension and interrogation.
