മലപ്പുറം/പൊള്ളാച്ചി: സ്കൂൾ അവധിക്കാലത്ത് ഒത്തുചേരാനും സന്തോഷം പങ്കുവെക്കാനുമായി യാത്ര പുറപ്പെട്ട അധ്യാപക സംഘത്തെ കാത്തിരുന്നത് വലിയ ദുരന്തമായിരുന്നു (Valparai Accident). വെള്ളിയാഴ്ച പുലർച്ചെ മലപ്പുറം കോളത്തൂരിൽ നിന്ന് യാത്ര തിരിച്ച സംഘം അതിരപ്പിള്ളി സന്ദർശിച്ച ശേഷമാണ് വാൽപ്പാറയിലേക്ക് പോയത്. വാൽപ്പാറയിൽ നിന്ന് പൊള്ളാച്ചിയിലേക്ക് വരുന്ന വഴിക്കാണ് അപകടമുണ്ടായത്. വൈകുന്നേരം അഞ്ചേകാലോടെ 13-ാം ഹെയർപിൻ വളവിൽ വെച്ച് നിയന്ത്രണം നഷ്ടപ്പെട്ട ട്രാവലർ വാൻ സംരക്ഷണ ഭിത്തി തകർത്ത് താഴെയുള്ള ഒമ്പതാം വളവിലേക്ക് നേരിട്ട് പതിക്കുകയായിരുന്നു.
ഏകദേശം നാല് വളവുകൾ താഴേക്ക് വാഹനം നിലംപതിച്ചതോടെ ട്രാവലർ വാൻ പൂർണ്ണമായും തകർന്നു. ഒരു പുരുഷനും ഏഴ് സ്ത്രീകളും സംഭവസ്ഥലത്ത് തന്നെ മരിച്ചു. ആശുപത്രിയിൽ വെച്ചാണ് ഒരാളുടെ മരണം കൂടി സ്ഥിരീകരിച്ചത്.
ചെങ്ങോട്ടൂർ സ്വദേശി മുഹമ്മദ് ഫാഹിസ് ഓടിച്ചിരുന്ന ട്രാവലറിൽ ഡ്രൈവർ ഉൾപ്പെടെ 13 പേരാണ് ഉണ്ടായിരുന്നത്. പാങ്ങ് ജി.എൽ.പി സ്കൂളിലെ അധ്യാപകർക്ക് പുറമെ സ്കൂളിലെ ആയ, ബസ് ഡ്രൈവർ, ഇവരുടെ സുഹൃത്തുക്കളായ മറ്റ് അധ്യാപകർ, കുട്ടികൾ എന്നിവരും സംഘത്തിലുണ്ടായിരുന്നു. യാത്രയ്ക്കിടെ അതിരപ്പിള്ളിയിൽ വെച്ച് ഇവർ പകർത്തിയ ഗ്രൂപ്പ് ഫോട്ടോ ഇപ്പോൾ നൊമ്പരമായി മാറുകയാണ്.
പത്തോളം അധ്യാപകർ മാത്രം ജോലി ചെയ്യുന്ന പാങ്ങ് ജി.എൽ.പി സ്കൂളിലെ പ്രിയപ്പെട്ടവരുടെ അപകടവാർത്ത ഗ്രാമത്തെ ഒന്നടങ്കം തളർത്തിയിരിക്കുകയാണ്. പരിക്കേറ്റ ഡ്രൈവറും രണ്ട് കുട്ടികളും ഉൾപ്പെടെയുള്ളവർ പൊള്ളാച്ചി സർക്കാർ ആശുപത്രിയിൽ തീവ്രപരിചരണ വിഭാഗത്തിലാണ്.
മൃതദേഹങ്ങൾ പോസ്റ്റ്മോർട്ടം നടപടികൾക്ക് ശേഷം നാട്ടിലെത്തിക്കാനുള്ള ശ്രമങ്ങൾ പുരോഗമിക്കുകയാണ്. തമിഴ്നാട് പോലീസ് അപകടത്തെക്കുറിച്ച് വിശദമായ അന്വേഷണം ആരംഭിച്ചിട്ടുണ്ട്.
Story Summary: The village of Pang in Malappuram is in shock after nine people, including teachers from the local GLP school, died in a road accident at Valparai. The minivan fell from the 13th hairpin bend to the 9th bend, completely crushing the vehicle.
