കൊച്ചി: കുംഭമേളയിലൂടെ വൈറലായ താരം തന്റെ പ്രായം തെളിയിക്കുന്ന രേഖകളുമായി എറണാകുളം സി.ജെ.എം കോടതിയിൽ രഹസ്യമൊഴി നൽകി. തന്നെ അപകീർത്തിപ്പെടുത്തിയെന്നും സിനിമയുടെ ചിത്രീകരണത്തിനിടെ സംവിധായകൻ മോശമായി പെരുമാറിയെന്നുമുള്ള പരാതികളിലാണ് താരം മൊഴി നൽകിയത്. താൻ പ്രായപൂർത്തിയായ വ്യക്തിയാണെന്നും രാഷ്ട്രീയ ലക്ഷ്യങ്ങളോടെ നുണപ്രചാരണം നടത്തുകയാണെന്നും താരം പറഞ്ഞു.(Kumbh Mela viral star in court with proof, Serious allegations)
താരം എറണാകുളം സെൻട്രൽ പോലീസിൽ പരാതി നൽകിയിരുന്നു. ഈ കേസിൽ മൊഴി നൽകുന്നതിനിടെയാണ് തന്റെ പ്രായം സംബന്ധിച്ച ആധാർ കാർഡ് ഉൾപ്പെടെയുള്ള രേഖകൾ താരം കോടതിയിൽ സമർപ്പിച്ചത്. തന്റെ മാതാപിതാക്കളെ സമ്മർദ്ദത്തിലാക്കി രാഷ്ട്രീയ ലക്ഷ്യങ്ങളോടെ കെട്ടിച്ചമച്ചതാണ് മധ്യപ്രദേശിലെ പോക്സോ കേസ്. ഏഴ് വയസ്സുള്ളപ്പോൾ എടുത്ത ആധാർ കാർഡ് അടക്കമുള്ള രേഖകൾ ഹാജരാക്കിയെന്നും വ്യാജരേഖ ചമച്ചാണ് ഭർത്താവിനെതിരെ കേസ്സെടുത്തതെന്നും താരത്തിന്റെ അഭിഭാഷകൻ വ്യക്തമാക്കി.
പെൺകുട്ടി വിവാഹം കഴിക്കുമ്പോൾ പ്രായപൂർത്തിയായിരുന്നില്ലെന്ന് ചൂണ്ടിക്കാട്ടി മധ്യപ്രദേശ് പോലീസ് പോക്സോ നിയമപ്രകാരം കേസെടുത്തിരുന്നു. എന്നാൽ, താരത്തിന്റെ ഭർത്താവിനെ ഈ മാസം 20 വരെ അറസ്റ്റ് ചെയ്യരുതെന്ന് കേരള ഹൈക്കോടതി ഉത്തരവിട്ടിട്ടുണ്ട്. കേസ് അന്വേഷണത്തിനായി കേരളത്തിലെത്തിയ മധ്യപ്രദേശ് പോലീസിന് മൊഴി രേഖപ്പെടുത്താൻ ഇതുവരെ സാധിച്ചിട്ടില്ല.
