തിരുവനന്തപുരം: അന്താരാഷ്ട്ര വിപണിയിലെ വിലവർദ്ധനവിന് ആനുപാതികമായി ഇന്ധനവില കൂടുമ്പോൾ കേരളത്തിന് ലഭിക്കുന്ന അധിക നികുതി വരുമാനം മനഃപൂർവ്വം വേണ്ടെന്നുവെക്കുന്ന തരത്തിലുള്ള സാമ്പത്തിക മണ്ടത്തരം ഈ സർക്കാർ കാണിക്കില്ലെന്ന് മുഖ്യമന്ത്രി വി.ഡി. സതീശൻ നിയമസഭയിൽ കടുത്ത ഭാഷയിൽ വ്യക്തമാക്കി (Kerala Assembly Session Fuel Tax Dispute). ഇന്ധനവില വർദ്ധനവിലൂടെയുള്ള അധിക വരുമാനം സംസ്ഥാനത്തിന് ആവശ്യമാണെന്നും അത് ഉപേക്ഷിക്കില്ലെന്നും മുൻ ധനമന്ത്രി തോമസ് ഐസക് നിയമസഭയിൽ പറഞ്ഞ കാര്യങ്ങൾ ഔദ്യോഗിക സഭാരേഖകളിലുണ്ടെന്നും, ആ മണ്ടത്തരം ഇപ്പോൾ ഈ സർക്കാർ കാണിക്കണമെന്നാണോ പ്രതിപക്ഷം ആവശ്യപ്പെടുന്നതെന്നും മുഖ്യമന്ത്രി ചോദിച്ചു.
സംസ്ഥാനത്ത് നിലവിലുള്ള രൂക്ഷമായ വിലക്കയറ്റത്തിന്റെ പശ്ചാത്തലത്തിൽ മുൻ ധനമന്ത്രി കെ.എൻ. ബാലഗോപാൽ കൊണ്ടുവന്ന അടിയന്തരപ്രമേയ നോട്ടീസിന് നിയമസഭയിൽ മറുപടി നൽകുകയായിരുന്നു അദ്ദേഹം. നിലവിൽ സാധാരണക്കാർക്ക് സബ്സിഡി സാധനങ്ങൾ നൽകുന്ന സിവിൽ സപ്ലൈസ് കോർപ്പറേഷന് മാത്രം സർക്കാർ 3000 കോടിയോളം രൂപ നൽകാനുണ്ടെന്നും, ആ തുക കൊടുത്ത് തീർക്കേണ്ട ബാധ്യത സർക്കാരിനുണ്ടെന്നും മുഖ്യമന്ത്രി ചൂണ്ടിക്കാട്ടി. മുൻപ് ഉമ്മൻ ചാണ്ടി സർക്കാർ പെട്രോളിയം ഉൽപ്പന്നങ്ങളുടെ അധിക നികുതി ജനങ്ങളെ ഓർത്ത് വേണ്ടെന്ന് വെച്ചിരുന്നതായും എന്നാൽ കഴിഞ്ഞ ഇടതുപക്ഷ സർക്കാർ ഒരു രൂപ പോലും കുറയ്ക്കാൻ തയ്യാറായില്ലെന്നും അദ്ദേഹം കുറ്റപ്പെടുത്തി.
സംസ്ഥാനത്ത് വിലക്കയറ്റം കുതിച്ചുയരുന്ന സമയത്ത് തന്നെയാണ് കഴിഞ്ഞ എൽഡിഎഫ് സർക്കാർ ഇന്ധനങ്ങൾക്ക് മേൽ രണ്ട് രൂപ സെസ് ഏർപ്പെടുത്തിയതെന്നും അത് ക്ഷേമ പെൻഷൻ ഫണ്ടിന്റെ പേരിലായിരുന്നുവെന്നും അദ്ദേഹം ഓർമ്മിപ്പിച്ചു. വില വർദ്ധനവ് തടയാൻ ആവശ്യമായ ശക്തമായ നടപടികൾ ഈ സർക്കാർ സ്വീകരിക്കുമെന്നും, സംസ്ഥാനത്തിന്റെ സാമ്പത്തികാവസ്ഥ വ്യക്തമാക്കുന്ന വിസ്മയിപ്പിക്കുന്ന ഒരു ധവളപത്രം ഉടൻ പുറത്തിറക്കുമെന്നും അപ്പോൾ കൃത്യമായ കണക്കുകൾ പറയാമെന്നും വ്യക്തമാക്കിയ മുഖ്യമന്ത്രി, വിഷയം സഭ നിർത്തിവെച്ച് ചർച്ച ചെയ്യേണ്ടതില്ലെന്ന് അറിയിച്ചു.
അതേസമയം, മുൻപ് കേന്ദ്ര സർക്കാർ ഇന്ധനവില വർദ്ധിപ്പിച്ചപ്പോഴൊക്കെയും സംസ്ഥാന സർക്കാരിനെ മാത്രം കുറ്റപ്പെടുത്തിയിരുന്ന അന്നത്തെ പ്രതിപക്ഷ നേതാവായിരുന്നു ഇന്നത്തെ മുഖ്യമന്ത്രി വി.ഡി. സതീശനെന്ന് പ്രതിപക്ഷ നേതാവ് പിണറായി വിജയൻ സഭയിൽ തിരിച്ചടിച്ചു. ജനങ്ങളെ കൊള്ളയടിക്കുന്ന കേന്ദ്രസർക്കാർ നടപടികളെ കുറ്റപ്പെടുത്താനോ, അവരുടെ നയങ്ങളെ വിമർശിക്കാനോ മുഖ്യമന്ത്രി തയ്യാറാകാത്തത് എന്തുകൊണ്ടാണെന്നും അദ്ദേഹം നിയമസഭയിൽ ചോദിച്ചു. മുൻപ് പ്രതിപക്ഷ നേതാവായിരുന്ന സമയത്ത് ഇന്ധനങ്ങളുടെ മേലുള്ള അധിക നികുതി സംസ്ഥാന സർക്കാർ വേണ്ടെന്ന് വയ്ക്കണമെന്ന് നിരന്തരം ആവശ്യപ്പെട്ടിരുന്ന ആളാണ് വി.ഡി. സതീശനെന്നും, ഇപ്പോൾ മുഖ്യമന്ത്രി പദവിയിൽ ഇരിക്കുമ്പോൾ അന്ന് ജനങ്ങൾക്ക് നൽകിയ ആ വാക്ക് പാലിക്കാൻ സതീശൻ തയ്യാറാകണമെന്നും പിണറായി വിജയൻ ശക്തമായി ആവശ്യപ്പെട്ടു. വിലക്കയറ്റവും നികുതി ഭാരവും ചർച്ച ചെയ്യാൻ തയ്യാറാകാതെ അടിയന്തിര പ്രമേയത്തിന് സഭയിൽ അനുമതി നിഷേധിച്ചതിൽ കടുത്ത പ്രതിഷേധം രേഖപ്പെടുത്തിക്കൊണ്ട് പ്രതിപക്ഷം നിയമസഭയിൽ നിന്നും കൂട്ടത്തോടെ ഇറങ്ങിപ്പോയി.
Summary: Chief Minister V.D. Satheesan stated in the assembly that the government will not commit the financial blunder of waiving the additional tax revenue generated from rising fuel prices, citing former Finance Minister Thomas Isaac’s past statements in official assembly records. Responding to an adjournment motion on price hikes moved by K.N. Balagopal, the Chief Minister emphasized that the state needs these funds to clear a 3000 Crore Rupee debt to Civil Supplies.
