തന്റെ പക്കൽ അഞ്ച് ജോഡി ആനക്കൊമ്പുകളുണ്ടെന്ന പുതിയ വെളിപ്പെടുത്തലുമായി നടൻ മോഹൻലാൽ രംഗത്ത്. വനംവകുപ്പ് പ്രഖ്യാപിച്ച ഒറ്റത്തവണ തീർപ്പാക്കൽ (പൊതുമാപ്പ്) പദ്ധതി പ്രകാരമാണ് താരം ഇക്കാര്യം ഔദ്യോഗികമായി അറിയിച്ചത് (Mohanlal Ivory Case). ഇതിനുമുൻപ് രണ്ട് ജോഡി ആനക്കൊമ്പുകൾ കൈവശം വെച്ചതുമായി ബന്ധപ്പെട്ട കേസ് ഹൈക്കോടതിയുടെ പരിഗണനയിലിരിക്കെയാണ് പുതിയ വെളിപ്പെടുത്തൽ എന്നത് ശ്രദ്ധേയമാണ്.
പുതുതായി വെളിപ്പെടുത്തിയ മൂന്ന് ജോഡി ആനക്കൊമ്പുകളുടെ വിവരങ്ങളും രേഖകളും ഹാജരാക്കാൻ മലയാറ്റൂർ ഡിഎഫ്ഒ പി. കാർത്തിക് താരത്തിന് നിർദ്ദേശം നൽകി. ആനക്കൊമ്പുകൾക്ക് പുറമെ, ആനക്കൊമ്പിൽ തീർത്ത 13 ശിൽപങ്ങളും തന്റെ കൈവശമുണ്ടെന്ന് താരം അറിയിച്ചിട്ടുണ്ട്. ഇവ തനിക്ക് സമ്മാനമായി ലഭിച്ചതാണെന്നാണ് വനംവകുപ്പിന് നൽകിയ പ്രാഥമിക വിശദീകരണം.
നേരത്തെ 2015-ലും 2016-ലും സർക്കാർ മോഹൻലാലിന് ആനക്കൊമ്പുകൾ കൈവശം വെക്കാൻ അനുമതി നൽകുകയും വനംവകുപ്പ് ഉടമസ്ഥാവകാശ സർട്ടിഫിക്കറ്റ് നൽകുകയും ചെയ്തിരുന്നു. എന്നാൽ, പിന്നീട് ഹൈക്കോടതി ഈ സർട്ടിഫിക്കറ്റ് റദ്ദാക്കിയിരുന്നു. നിലവിലെ നിയമപ്രകാരം ആനക്കൊമ്പുകൾ പാരമ്പര്യമായി രേഖകളോടെ സൂക്ഷിക്കുകയല്ലാതെ, സമ്മാനമായി സ്വീകരിക്കുന്നത് ഗുരുതരമായ നിയമലംഘനമാണ്. അതിനാൽ താരത്തിന്റെ ഈ വിശദീകരണം നിയമപരമായി എത്രത്തോളം നിലനിൽക്കുമെന്നതിൽ ആശങ്കയുണ്ട്. നിയമനടപടികൾ തുടരുന്നതിനിടയിൽ വന്ന ഈ പുതിയ വെളിപ്പെടുത്തൽ വലിയ ചർച്ചകൾക്കാണ് വഴിവെച്ചിരിക്കുന്നത്.
Summary: Actor Mohanlal has declared the possession of five pairs of ivory tusks and 13 ivory artifacts under the Kerala Forest Department’s one-time amnesty scheme. This revelation comes amid ongoing legal proceedings regarding his previous possession of two pairs of tusks. While Mohanlal claims these were gifts, legal experts suggest this explanation may face scrutiny under the Wildlife Protection Act, as gifting ivory is not legally permitted.
