ലോകേഷ് സിനിമാറ്റിക് യൂണിവേഴ്സ് അവസാനിച്ചു എന്ന പ്രചരണങ്ങൾക്ക് മറുപടിയുമായി സംവിധായകൻ ലോകേഷ് കനകരാജ്. താൻ ഒറ്റയ്ക്ക് തീരുമാനിച്ചല്ല ഈ പ്രപഞ്ചം കെട്ടിപ്പടുത്തതെന്നും, അതിനാൽ തന്നെ ഒറ്റയ്ക്ക് അത് അവസാനിപ്പിക്കാൻ കഴിയില്ലെന്നും ലോകേഷ് വ്യക്തമാക്കി (Lokesh Kanagaraj LCU). നായകനായി അരങ്ങേറ്റം കുറിക്കുന്ന ‘ഡിസി’ (DC) എന്ന ചിത്രത്തിന്റെ പ്രൊമോഷൻ പരിപാടിക്കിടെയാണ് അദ്ദേഹം ഇക്കാര്യം വ്യക്തമാക്കിയത്. അല്ലു അർജുനോടൊപ്പമുള്ള ചിത്രം പൂർത്തിയാക്കിയ ശേഷം എൽ.സി.യു പ്രൊജക്റ്റുകളിലേക്ക് തിരികെവരുമെന്നും അദ്ദേഹം പറഞ്ഞു.
“എൽ.സി.യു അവസാനിച്ചു എന്ന രീതിയിൽ വലിയ പ്രചാരണം നടക്കുന്നുണ്ട്. സ്വന്തം നിർമാണക്കമ്പനിയായ ജി സ്ക്വാഡ് പൂട്ടിപ്പോയാലും എൽ.സി.യു ഞാൻ അവസാനിപ്പിക്കില്ല. ഈ പേര് ഞാൻ നൽകിയതല്ല, ആരാധകരാണ് നൽകിയത്. അത് ഞാൻ സന്തോഷത്തോടെ സ്വീകരിക്കുകയായിരുന്നു. ‘കൈതി 2’, ‘വിക്രം 2’, പിന്നെ സൂര്യയുടെ റോളക്സ് നായകനായെത്തുന്ന ചിത്രം എന്നിവയെല്ലാം എന്റെ പരിഗണനയിലുള്ളതാണ്. എൽ.സി.യു തീർന്നിട്ടില്ല, ഉറപ്പായും തുടരും,” ലോകേഷ് കനകരാജ് പറഞ്ഞു. തന്റെ ബാനറിൽ നിർമ്മിക്കുന്ന ‘ബെൻസ്’ എന്ന ചിത്രവും എൽ.സി.യുവിന്റെ ഭാഗമാണെന്നും അദ്ദേഹം കൂട്ടിച്ചേർത്തു.
2019-ൽ കാർത്തി നായകനായ ‘കൈതി’ എന്ന ചിത്രത്തിലൂടെയാണ് ലോകേഷ് സിനിമാറ്റിക് യൂണിവേഴ്സിന് തുടക്കമിട്ടത്. പിന്നീട് കമൽ ഹാസന്റെ ‘വിക്രം’, വിജയ് നായകനായ ‘ലിയോ’ എന്നീ ചിത്രങ്ങളിലൂടെ ഈ സിനിമാറ്റിക് യൂണിവേഴ്സ് തമിഴ് സിനിമയിലെ ഏറ്റവും വലിയ ഫ്രാഞ്ചൈസിയായി വളർന്നു. നിലവിൽ അരുൺ മാതേശ്വരൻ സംവിധാനം ചെയ്യുന്ന ‘ഡിസി’ എന്ന ചിത്രത്തിൽ നായകനായി അരങ്ങേറ്റം കുറിക്കാനൊരുങ്ങുകയാണ് ലോകേഷ്. ജൂലൈ 31-ന് ചിത്രം തിയേറ്ററുകളിൽ എത്തും. ഇതിനുശേഷമായിരിക്കും അല്ലു അർജുൻ നായകനാകുന്ന വലിയൊരു ആക്ഷൻ ചിത്രത്തിന്റെ ജോലികളിലേക്ക് ലോകേഷ് കടക്കുക.
Summary: Director Lokesh Kanagaraj has officially confirmed that the Lokesh Cinematic Universe (LCU) is far from over, dismissing rumors of its conclusion. During the promotion of his debut acting project ‘DC’, he stated that projects like ‘Kaithi 2’, ‘Vikram 2’, and a spin-off featuring Rolex are very much in his pipeline, and he plans to return to the LCU franchise after completing his upcoming film with Allu Arjun.
