ചെന്നൈ: ദീർഘനാളത്തെ കാത്തിരിപ്പിന് ഒടുവിൽ വിജയ് നായകനായ ‘ജന നായകൻ’ തിയേറ്ററുകളിലെത്തി. തമിഴ്നാട് മുഖ്യമന്ത്രിയായതിന് ശേഷമുള്ള വിജയ്യുടെ ആദ്യ സിനിമ എന്ന പ്രത്യേകതയും, അഭിനേതാവെന്ന നിലയിലെ അവസാന ചിത്രമെന്ന പ്രചാരണവും സിനിമയ്ക്ക് വൻ പ്രതീക്ഷയാണ് സൃഷ്ടിച്ചിരിക്കുന്നത് (Jana Nayagan Movie Release). റിലീസ് ദിനത്തിൽ തന്നെ തിയേറ്ററുകൾ ആഘോഷമാക്കി മാറ്റിയിരിക്കുകയാണ് ആരാധകർ.
ചിത്രത്തിലെ ടൈറ്റിൽ കാർഡാണ് ഇപ്പോൾ സമൂഹമാധ്യമങ്ങളിൽ വലിയ ചർച്ചയാകുന്നത്. “Honourable Chief Minister of Tamil Nadu, Thalapathy C. Joseph Vijay” എന്ന ടൈറ്റിൽ കാർഡോടെയാണ് ചിത്രം ആരംഭിക്കുന്നത്. ടൈറ്റിൽ കാർഡ് സ്ക്രീനിലെത്തിയതുമുതൽ ആരാധകർ ആർപ്പുവിളികളോടെയും കരഘോഷങ്ങളോടെയും സ്വീകരിക്കുന്ന ദൃശ്യങ്ങൾ സാമൂഹികമാധ്യമങ്ങളിൽ വ്യാപകമായി പ്രചരിക്കുകയാണ്.
കേരളത്തിലും പുലർച്ചെ മുതൽ പ്രത്യേക ഫാൻസ് ഷോകൾ സംഘടിപ്പിച്ചു. നിരവധി തിയേറ്ററുകളിൽ ആഘോഷപരിപാടികളും പാൽ അഭിഷേകവും വെടിക്കെട്ടും ഉൾപ്പെടെ വിജയ് ആരാധകർ സിനിമയെ വരവേറ്റു. ചിത്രത്തിലെ വിജയ്യുടെ ഡാൻസ് രംഗങ്ങൾക്കും മാസ് സീനുകൾക്കും തിയേറ്ററുകളിൽ വൻ പ്രതികരണമാണ് ലഭിക്കുന്നതെന്നാണ് പുറത്തുവരുന്ന റിപ്പോർട്ടുകൾ.
ആദ്യം ജനുവരിയിൽ റിലീസ് ചെയ്യാനിരുന്ന ചിത്രം സെൻസർ നടപടികൾ നീണ്ടതിനെ തുടർന്ന് മാറ്റിവെക്കുകയായിരുന്നു. ഇതിനിടെ ചിത്രത്തിന്റെ എച്ച്.ഡി. പതിപ്പ് ഓൺലൈനിൽ ചോർന്നതും അണിയറ പ്രവർത്തകർക്ക് തിരിച്ചടിയായിരുന്നു. എന്നാൽ അതെല്ലാം മറികടന്ന് ശക്തമായ ഓപ്പണിങ്ങാണ് ചിത്രത്തിന് ലഭിച്ചിരിക്കുന്നത്. എച്ച്. വിനോദ് സംവിധാനം ചെയ്ത ചിത്രത്തിൽ പൂജ ഹെഗ്ഡെ, മമിത ബൈജു, പ്രകാശ് രാജ്, പ്രിയാമണി, നരേൻ, ഗൗതം വാസുദേവ് മേനോൻ തുടങ്ങി വലിയ താരനിരയാണ് അണിനിരക്കുന്നത്. വിജയ് സിനിമകളുടെ പതിവ് മാസ് എലമെന്റുകളും രാഷ്ട്രീയ പശ്ചാത്തലവും ചേർന്ന ചിത്രത്തിന് ആദ്യദിനത്തിൽ തന്നെ മികച്ച പ്രേക്ഷക പ്രതികരണമാണ് ലഭിക്കുന്നത്.
Summary: Vijay’s Jana Nayagan has finally hit theatres, with the title card introducing him as the “Honourable Chief Minister of Tamil Nadu, Thalapathy C. Joseph Vijay” becoming the biggest talking point. Fans across theatres celebrated the film’s release with massive enthusiasm.
