തെന്നിന്ത്യൻ സംഗീത ലോകത്തെ തരംഗമായ അനിരുദ്ധ് രവിചന്ദറും റാപ്പർ വേടനും (ഹിരൺദാസ് മുരളി) ഒന്നിച്ചുള്ള പുതിയ ചിത്രം സോഷ്യൽ മീഡിയയിൽ വലിയ ചർച്ചയാകുന്നു (Anirudh Vedan Collaboration). അനിരുദ്ധിന്റെ സ്റ്റുഡിയോയിൽ നിന്നുള്ള ചിത്രം വേടൻ പങ്കുവെച്ചതോടെ, ഇരുവരും ഒന്നിച്ചുള്ള ഒരു ഗാനം ഉടൻ പുറത്തിറങ്ങുമെന്ന് ആരാധകർ ഉറപ്പിച്ചു കഴിഞ്ഞു. അരുൺ മാതേശ്വരൻ സംവിധാനം ചെയ്യുന്ന ‘ഡിസി’ (DC) എന്ന ചിത്രത്തിന് വേണ്ടിയാണ് ഈ കൂട്ടുകെട്ട് ഒന്നിക്കുന്നതെന്നാണ് റിപ്പോർട്ടുകൾ.
‘റോക്കി’, ‘ക്യാപ്റ്റൻ മില്ലർ’ തുടങ്ങിയ ശ്രദ്ധേയ ചിത്രങ്ങൾക്ക് ശേഷം അരുൺ മാതേശ്വരൻ സംവിധാനം ചെയ്യുന്ന പുതിയ ചിത്രമാണ് ‘ഡിസി’. സംവിധായകൻ ലോകേഷ് കനകരാജ് നായകനാകുന്ന ചിത്രത്തിൽ വാമിഖ ഗബ്ബിയാണ് നായിക. ദേവദാസ്, ചന്ദ്ര എന്നീ കഥാപാത്രങ്ങളെ ആസ്പദമാക്കിയാണ് ചിത്രത്തിന്റെ പേര് നൽകിയിരിക്കുന്നത്. ആക്ഷനും ഇമോഷനും ഒരുപോലെ പ്രാധാന്യം നൽകുന്ന ചിത്രമായിരിക്കും ഇതെന്ന സൂചനകൾ ട്രെയിലറിൽ നിന്ന് തന്നെ ലഭിച്ചിരുന്നു.
തമിഴ് സിനിമാ ലോകത്ത് ഇതിനകം തന്നെ ശ്രദ്ധേയമായ സാന്നിധ്യമാണ് വേടൻ. മാരി സെൽവരാജ് സംവിധാനം ചെയ്ത ‘ബൈസൺ കാലമാടൻ’ എന്ന ചിത്രത്തിലെ ‘റെക്ക റെക്ക’ എന്ന ഗാനം വേടനും അറിവും ചേർന്ന് പാടിയത് വലിയ ഹിറ്റായിരുന്നു. തമിഴ് പ്രേക്ഷകർക്കിടയിൽ ഏറെ ജനശ്രദ്ധ നേടാൻ ഈ ഗാനത്തിലൂടെ വേടന് സാധിച്ചു. അനിരുദ്ധിന്റെ സംഗീതത്തിൽ വേടന്റെ ശബ്ദം കൂടെ എത്തുമ്പോൾ തമിഴ് സിനിമയിൽ വലിയൊരു തരംഗം തന്നെ പ്രതീക്ഷിക്കാം എന്നാണ് ആരാധകരുടെ വിലയിരുത്തൽ.
Summary: Music director Anirudh Ravichander and rapper Vedan have sparked excitement by sharing a photo from a recording studio, fueling rumors of a collaboration for Arun Matheswaran’s upcoming film ‘DC’. Starring Lokesh Kanagaraj and Wamiqa Gabbi, the film is highly anticipated, with fans eagerly awaiting what this powerful musical combination will deliver.
