കൊച്ചി: താരസംഘടനയായ ‘അമ്മ’യുടെ ഭരണസമിതി കൂട്ടത്തോടെ രാജിവച്ചു. സംഘടനയിലെ വാർഷിക ജനറൽ ബോഡി യോഗത്തിൽ അരങ്ങേറിയ നാടകീയ സംഭവങ്ങൾക്കും രൂക്ഷമായ തർക്കങ്ങൾക്കും പിന്നാലെയാണ് പ്രസിഡന്റ് ശ്വേത മേനോൻ ഉൾപ്പെടെ പതിനേഴംഗ ഭരണസമിതി അധികാരം ഒഴിഞ്ഞത് (AMMA Committee Resigns). വാർഷിക റിപ്പോർട്ടിലെ വരവ്–ചിലവ് കണക്കുകളിൽ ഗുരുതരമായ പിഴവുകളും അവ്യക്തതയും ഉണ്ടെന്ന് ആരോപിച്ച് സിദ്ധിഖ്, ബാബുരാജ്, ഇടവേള ബാബു, രഞ്ജി പണിക്കർ തുടങ്ങിയ പ്രമുഖ അംഗങ്ങൾ ശക്തമായി രംഗത്തെത്തിയതാണ് പ്രതിസന്ധി രൂക്ഷമാക്കിയത്.
ജനറൽ സെക്രട്ടറി കുക്കു പരമേശ്വരൻ അവതരിപ്പിച്ച വാർഷിക റിപ്പോർട്ട് പാസാക്കാൻ സമ്മേളിച്ച യോഗത്തിൽ, കണക്കുകൾ അംഗീകരിക്കാൻ കഴിയില്ലെന്ന് ഒരു വിഭാഗം അംഗങ്ങൾ കർശന നിലപാട് സ്വീകരിച്ചു. റിപ്പോർട്ടിലെ പിഴവുകൾ ചൂണ്ടിക്കാട്ടി അംഗങ്ങൾ അവിശ്വാസം പ്രകടിപ്പിച്ചതോടെ, വിശദമായ പഠനത്തിനായി 45 ദിവസത്തെ സമയം വേണമെന്ന് ശ്വേത മേനോൻ ആവശ്യപ്പെട്ടെങ്കിലും അത് അംഗീകരിക്കപ്പെട്ടില്ല. ഇതിനെത്തുടർന്ന് നേതൃത്വത്തിനെതിരെ ഉയർന്ന ആരോപണങ്ങൾക്കും പ്രത്യാരോപണങ്ങൾക്കും പിന്നാലെ ഭരണസമിതി രാജി പ്രഖ്യാപിക്കുകയായിരുന്നു.
യോഗത്തിൽ അരങ്ങേറിയ വാഗ്വാദങ്ങൾക്കിടെ മുൻ പ്രസിഡന്റ് മോഹൻലാൽ വൈകാരികമായാണ് പ്രതികരിച്ചത്. സംഘടനയെ തകർക്കാൻ ആരെയും അനുവദിക്കില്ലെന്നും വ്യക്തിപരമായ ഭിന്നതകൾ മാറ്റിവെച്ച് ഐക്യം കാത്തുസൂക്ഷിക്കണമെന്നും അദ്ദേഹം ആഹ്വാനം ചെയ്തു. എങ്കിലും, ഭരണസമിതിയുടെ രാജിയിലേക്കാണ് കാര്യങ്ങൾ നീങ്ങിയത്. നിലവിലെ സാഹചര്യത്തിൽ സംഘടനയുടെ ദൈനംദിന പ്രവർത്തനങ്ങൾക്കായി ഒരു താത്കാലിക സമിതിയെ നിയമിക്കാനാണ് സാധ്യത. വരും ദിവസങ്ങളിൽ സംഘടനയ്ക്കുള്ളിൽ വലിയ അഴിച്ചുപണികൾക്കും പുതിയ തിരഞ്ഞെടുപ്പിനും വഴിതുറക്കുന്നതാണ് ഈ സംഭവവികാസങ്ങൾ.
Summary: The entire 17-member executive committee of the actors’ association ‘AMMA,’ including President Swetha Menon, has resigned following intense protests and disputes during the annual general body meeting. The resignation was triggered by allegations of financial irregularities and lack of transparency in the annual report, which senior members like Siddique, Baburaj, and Renji Panicker strongly opposed.
