വാഷിങ്ടൺ: വാർധക്യം തടയാനും ആയുസ്സ് വർധിപ്പിക്കാനുമുള്ള പരീക്ഷണങ്ങളിലൂടെ ശ്രദ്ധ നേടിയ ആന്റി-ഏജിങ് ഇൻഫ്ലുവൻസർ ബ്രയാൻ ജോൺസൺ വീണ്ടും സമൂഹമാധ്യമങ്ങളിൽ ചർച്ചയായിരിക്കുകയാണ്. തന്റെ കാമുകിയായ കേറ്റ് ടോളോയുടെ ആർത്തവരക്ത സാമ്പിൾ മൈനസ് 80 ഡിഗ്രി സെൽഷ്യസിൽ സൂക്ഷിച്ചിരിക്കുകയാണെന്ന് ജോൺസൺ വെളിപ്പെടുത്തി. (Bryan Johnson menstrual blood research)
സമൂഹമാധ്യമ പ്ലാറ്റ്ഫോമായ എക്സിലൂടെയാണ് 48-കാരനായ ജോൺസൺ ഇക്കാര്യം പങ്കുവെച്ചത്. ഏകദേശം 10 മില്ലിലിറ്റർ ആർത്തവരക്തമാണ് ശീതീകരിച്ച് സൂക്ഷിച്ചിരിക്കുന്നതെന്നും സാമ്പിളിൽ എൻഡോമെട്രിയൽ കോശങ്ങൾ, പ്രതിരോധ സംവിധാനവുമായി ബന്ധപ്പെട്ട കോശങ്ങൾ, സ്റ്റെം സെല്ലുകൾ എന്നിവ അടങ്ങിയിട്ടുണ്ടെന്നും അദ്ദേഹം വ്യക്തമാക്കി.
ആർത്തവരക്തം മൂല്യമേറിയതും ഗവേഷണരംഗത്ത് വേണ്ടത്ര ഉപയോഗിക്കപ്പെടാത്തതുമായ ജൈവസാമ്പിളാണെന്നാണ് ജോൺസന്റെ വാദം. രോഗബാധിതമായ ടിഷ്യൂകളുടെ സാന്നിധ്യം പരിശോധിക്കുക, മൈക്രോപ്ലാസ്റ്റിക്കുകളുടെ അളവ് കണ്ടെത്തുക, എൻഡോക്രൈൻ സംവിധാനത്തെ ബാധിക്കുന്ന രാസവസ്തുക്കളുടെയും PFAS വിഭാഗത്തിൽപ്പെടുന്ന മലിനീകരണ വസ്തുക്കളുടെയും സാന്നിധ്യം അളക്കുക എന്നിവയാണ് സാമ്പിൾ ശേഖരിച്ചതിന്റെ ലക്ഷ്യമെന്നും അദ്ദേഹം പറഞ്ഞു.
Kate’s period blood is in my -80 °C freezer.
Around 10 mL. pic.twitter.com/OdLxO9qyJu
— Bryan Johnson (@bryan_johnson) July 31, 2026
ആർത്തവരക്ത പരിശോധനയിലൂടെ ഗർഭാശയത്തിന്റെ ആരോഗ്യസ്ഥിതിയെ ശസ്ത്രക്രിയയോ ടിഷ്യു ബയോപ്സിയോ കൂടാതെ വിലയിരുത്താൻ കഴിയുമെന്നാണ് ജോൺസന്റെ വിശദീകരണം. ഓരോ ആർത്തവചക്രത്തിലും ഇത്തരം സാമ്പിളുകൾ ശേഖരിച്ച് പരിശോധന ആവർത്തിക്കാമെന്നും, സാധാരണ രക്തപരിശോധനയിൽ നിന്ന് ലഭിക്കുന്ന പരോക്ഷ വിവരങ്ങൾക്കപ്പുറം ഗർഭാശയത്തിലെ ജൈവപരിസ്ഥിതിയെക്കുറിച്ച് നേരിട്ടുള്ള സൂചനകൾ ലഭിക്കാമെന്നും അദ്ദേഹം അവകാശപ്പെട്ടു.
കാമുകിയായ കേറ്റ് ടോളോയെ തന്റെ ശാസ്ത്രീയ പരീക്ഷണങ്ങളുടെ ഭാഗമായാണ് കാണുന്നതെന്നും ജോൺസൺ വ്യക്തമാക്കി. കേറ്റിന്റെ കഴിഞ്ഞ ആർത്തവചക്രത്തിനിടെയാണ് സാമ്പിൾ ശേഖരിച്ചതെന്നും അദ്ദേഹം പറഞ്ഞു. എന്നാൽ ഈ പരീക്ഷണത്തെക്കുറിച്ചുള്ള ശാസ്ത്രീയ രീതികളും പഠനഫലങ്ങളും വിശദമായി പുറത്തുവിട്ടിട്ടില്ല.
സ്വന്തം ആരോഗ്യപ്രശ്നങ്ങൾക്കും കേറ്റിന്റെ എൻഡോമെട്രിയോസിസ് ചികിത്സയ്ക്കും പുതിയ മാർഗങ്ങൾ കണ്ടെത്തുകയാണ് പ്രധാന ലക്ഷ്യമെന്നും ജോൺസൺ പറഞ്ഞു. കൃത്രിമബുദ്ധിയും ബയോടെക്നോളജിയും ഉപയോഗിച്ച് രോഗങ്ങളെ ചികിത്സിക്കാൻ പുതിയ വഴികൾ കണ്ടെത്താനാകുമെന്നും, ഭാവിയിൽ ഇത്തരം ചികിത്സാരീതികൾ മറ്റുള്ളവർക്കും ലഭ്യമാക്കാനാണ് ശ്രമിക്കുന്നതെന്നും അദ്ദേഹം കൂട്ടിച്ചേർത്തു. വാർധക്യത്തെ മറികടക്കാനും ആയുസ്സ് വർധിപ്പിക്കാനുമുള്ള പരീക്ഷണങ്ങൾക്കായി വർഷംതോറും വൻതുക ചെലവഴിക്കുന്ന വ്യക്തിയായാണ് ബ്രയാൻ ജോൺസൺ അറിയപ്പെടുന്നത്. അടുത്തിടെ തന്റെ പരീക്ഷണങ്ങൾ പരിധിവിട്ടിരിക്കാമെന്ന് അദ്ദേഹം പറഞ്ഞതിന് പിന്നാലെയാണ് കാമുകിയുടെ ആർത്തവരക്തം ശീതീകരിച്ച് സൂക്ഷിക്കുന്നുവെന്ന പുതിയ വെളിപ്പെടുത്തൽ പുറത്തുവന്നത്.
Summary: Anti-ageing influencer Bryan Johnson revealed that he is storing approximately 10 mL of his girlfriend Kate Tolo’s menstrual blood at minus 80 degrees Celsius for research. He said the sample could help study uterine health, diseased tissue, microplastics, endocrine disruptors and PFAS, although detailed scientific findings from the experiment have not been released.
