കൊച്ചി: നടൻ വിജയ്യുടെ മകൻ ജെയ്സൺ സഞ്ജയ് സിനിമാ സംവിധാന രംഗത്തേക്ക് അരങ്ങേറ്റത്തിന് ഒരുങ്ങുകയാണ്. അച്ഛന്റെ പാത പിന്തുടർന്ന് അഭിനയത്തിലേക്ക് എത്താതെ, സംവിധായകനായാണ് ജെയ്സൺ സിനിമാലോകത്തേക്ക് കടന്നുവരുന്നത്. ‘സിഗ്മ’ എന്ന ചിത്രത്തിലൂടെയാണ് അദ്ദേഹത്തിന്റെ സംവിധാന അരങ്ങേറ്റം (Jason Sanjay about Nivin Pauly). സിനിമയോടുള്ള തന്റെ താൽപര്യം എങ്ങനെയാണ് വളർന്നതെന്ന് ജെയ്സൺ സഞ്ജയ് അടുത്തിടെ നൽകിയ അഭിമുഖത്തിൽ പങ്കുവെച്ചു. ചെറുപ്പം മുതൽ തന്നെ സിനിമാ സെറ്റുകളുമായി പരിചയമുണ്ടായിരുന്നുവെന്നും, അതാണ് സിനിമയെ ഒരു സ്വാഭാവിക താൽപര്യമായി മാറ്റിയതെന്നും അദ്ദേഹം പറഞ്ഞു.
“ചെറുപ്പത്തിൽ തന്നെ ഒരുപാട് സിനിമാ സെറ്റുകളിൽ പോയിട്ടുണ്ട്. സാധാരണ ആളുകൾക്ക് സിനിമ വിനോദമാണെങ്കിൽ എനിക്ക് ചെറുപ്പം മുതലേ അതൊരു പരിചിതമായ ലോകമായിരുന്നു. അതിലൂടെ തന്നെയാണ് എന്റെ ഹോബികളും താൽപര്യങ്ങളും വളർന്നത്,” ജെയ്സൺ പറഞ്ഞു. എന്നാൽ കുട്ടിക്കാലം മുതൽ സിനിമ മാത്രമായിരുന്നില്ല തന്റെ സ്വപ്നമെന്നും അദ്ദേഹം വ്യക്തമാക്കി. ആദ്യം പൈലറ്റാകാനായിരുന്നു ആഗ്രഹം. പിന്നീട് ക്രിക്കറ്റിനോടും താൽപര്യം തോന്നി. അച്ഛൻ വിജയിനൊപ്പം ഐപിഎൽ മത്സരങ്ങൾ കാണാൻ പോയ അനുഭവങ്ങളാണ് ക്രിക്കറ്റിനോടുള്ള ഇഷ്ടം വർധിപ്പിച്ചതെന്നും ജെയ്സൺ പറഞ്ഞു.
പതിനൊന്നാം ക്ലാസിൽ പഠിക്കുമ്പോഴാണ് സിനിമാ സംവിധാനത്തോട് കൂടുതൽ താൽപര്യം തോന്നിയതെന്ന് ജെയ്സൺ വ്യക്തമാക്കി. കോളേജിൽ എന്ത് പഠിക്കണമെന്ന ചിന്ത വന്നപ്പോൾ ഫിലിം മേക്കിങ് തിരഞ്ഞെടുക്കുകയായിരുന്നു. കഥ പറയുന്നതിലുള്ള താൽപര്യമാണ് തന്നെ ഈ മേഖലയിലേക്ക് നയിച്ചതെന്നും അദ്ദേഹം പറഞ്ഞു.
തുടർന്ന് കാനഡയിലെ ടൊറന്റോയിൽ ഫിലിം മേക്കിങ് കോഴ്സ് പൂർത്തിയാക്കിയ ജെയ്സൺ, സിനിമയുടെ വിവിധ വിഭാഗങ്ങളെക്കുറിച്ച് അവിടെ നിന്ന് പഠിച്ചു. ചില പരസ്യ ഏജൻസികൾക്കായി പ്രവർത്തിക്കുകയും പരസ്യ ചിത്രങ്ങൾ ഒരുക്കുകയും ചെയ്തിട്ടുണ്ട്. പിന്നീട് ടൊറന്റോ അന്താരാഷ്ട്ര ചലച്ചിത്ര മേളയിൽ വളണ്ടിയറായി പ്രവർത്തിച്ചതും സിനിമയെ പുതിയ കാഴ്ചപ്പാടിൽ മനസിലാക്കാൻ സഹായിച്ചതായി അദ്ദേഹം പറഞ്ഞു. നടൻ നിവിൻ പോളിയുമായുള്ള കൂടിക്കാഴ്ചയും ജെയ്സൺ അഭിമുഖത്തിൽ ഓർത്തെടുത്തു. ടൊറന്റോ ഫിലിം ഫെസ്റ്റിവലിൽ നിവിൻ പോളിയുടെ ‘മൂത്തോൻ’ പ്രദർശിപ്പിച്ചിരുന്ന സമയത്താണ് അദ്ദേഹത്തെ കാണാൻ സാധിച്ചതെന്ന് ജെയ്സൺ പറഞ്ഞു.
“അവിടെ ഒരു ക്യൂ ആൻഡ് എ സെഷൻ ഉണ്ടായിരുന്നു. അദ്ദേഹത്തെ കാണാൻ സാധിച്ചു. എനിക്കും ഫിലിം മേക്കിങ്ങിൽ താൽപര്യമുണ്ടെന്ന് പറഞ്ഞു. അദ്ദേഹത്തിന് അത് ഓർമയുണ്ടോ എന്നറിയില്ല. പക്ഷേ അത് എനിക്ക് വലിയൊരു അനുഭവമായിരുന്നു. അവിടെ നിന്ന് മടങ്ങുമ്പോൾ എന്റെ സ്വപ്നം സാക്ഷാത്കരിക്കണമെന്ന് കൂടുതൽ ഉറപ്പിച്ചു,” ജെയ്സൺ വ്യക്തമാക്കി. വിജയ് സിനിമയിൽ നിന്ന് രാഷ്ട്രീയത്തിലേക്ക് ചുവടുമാറ്റിയതിന് പിന്നാലെയാണ് മകൻ ജെയ്സൺ സഞ്ജയ് സംവിധായകനായി സിനിമാ ലോകത്ത് പുതിയ തുടക്കം കുറിക്കുന്നത്. താരപുത്രന്റെ ആദ്യ ചിത്രമായ **‘സിഗ്മ’**യ്ക്കായി ആരാധകരും സിനിമാപ്രേമികളും കാത്തിരിക്കുകയാണ്.
Summary: Jason Sanjay, son of Tamil actor Vijay, is making his directorial debut with the film “Sigma”. In an interview, he revealed how his interest in filmmaking developed, his early dreams of becoming a pilot and cricketer, his film studies in Toronto, and his memorable meeting with actor Nivin Pauly at the Toronto International Film Festival.
