ഗുവാഹത്തി: അസമിലെ വിവിധ ജില്ലകളിൽ പ്രളയക്കെടുതി രൂക്ഷമായി തുടരുന്നു. ശനിയാഴ്ച ലഭ്യമായ കണക്കുകൾ പ്രകാരം സംസ്ഥാനത്തെ അഞ്ച് ജില്ലകളിലായി 1.92 ലക്ഷത്തിലധികം ആളുകളെയാണ് പ്രളയം നേരിട്ട് ബാധിച്ചിരിക്കുന്നത്. കഴിഞ്ഞ മണിക്കൂറുകളിൽ രണ്ട് പേർ കൂടി മരിച്ചതോടെ ഈ വർഷത്തെ ആകെ പ്രളയ മരണസംഖ്യ 82 ആയി ഉയർന്നതായി ഔദ്യോഗിക വൃത്തങ്ങൾ അറിയിച്ചു.(Assam Floods, Death Toll Reaches 82 Nearly Two Lakh People Affected)
ശിവസാഗർ, ഗോലാഘട്ട്, ജോർഹാട്ട്, നഗാവ്, ചരായിദേവ് എന്നിവയാണ് പ്രളയം ഏറ്റവും കൂടുതൽ നാശം വിതച്ച അഞ്ച് ജില്ലകൾ. ഇതിൽ ചരായിദേവ് ജില്ലയിലാണ് സ്ഥിതിഗതികൾ കൂടുതൽ രൂക്ഷം. ഇവിടെ മാത്രം 77,456 ആളുകൾ ദുരിതത്തിലായി. ശിവസാഗറിൽ 63,492 പേരെയും ജോർഹാട്ടിൽ 34,067 പേരെയും പ്രളയം ബാധിച്ചിട്ടുണ്ട്. അതേസമയം, എട്ട് ജില്ലകളെ ബാധിച്ചിരുന്ന വ്യാഴാഴ്ചത്തെ അപേക്ഷിച്ച് മൊത്തത്തിലുള്ള സാഹചര്യത്തിൽ നേരിയ പുരോഗതിയുണ്ട്.
ശിവസാഗറിലെ ദിഖൗ നദിയും ഗോലാഘട്ടിലെ നുമാലിഗഡിന് സമീപമുള്ള ധൻസിരി നദിയും അപകടകരമായ രീതിയിൽ കരകവിഞ്ഞൊഴുകുകയാണ്. ജലാശയങ്ങൾക്ക് സമീപത്തേക്ക് പൊതുജനങ്ങൾ പോകരുതെന്ന് അധികൃതർ മുന്നറിയിപ്പ് നൽകി. “സംസ്ഥാനത്ത് നിലവിൽ പ്രവർത്തിക്കുന്ന 54 ദുരിതാശ്വാസ ക്യാമ്പുകളിലായി പതിമൂവായിരത്തോളം ആളുകളാണ് കഴിയുന്നത്. കൂടാതെ 26 വിതരണ കേന്ദ്രങ്ങൾ വഴി അയ്യായിരത്തിലധികം പേർക്ക് അടിയന്തര സഹായങ്ങൾ എത്തിക്കുന്നുണ്ട്.” – അസം ദുരന്തനിവാരണ അതോറിറ്റി അറിയിച്ചു.
ദേശീയ-സംസ്ഥാന ദുരന്തനിവാരണ സേനകളുടെ (NDRF, SDRF) നേതൃത്വത്തിൽ രക്ഷാപ്രവർത്തനവും സഹായ വിതരണവും ഊർജ്ജിതമായി പുരോഗമിക്കുകയാണ്. പ്രളയബാധിതർക്കായി നിരവധി ആശ്വാസ നടപടികളാണ് അസം സർക്കാർ പ്രഖ്യാപിച്ചിരിക്കുന്നത്. നാശനഷ്ടങ്ങൾ വേഗത്തിൽ കണക്കാക്കി പുനരധിവാസ ഫണ്ട് ഉടൻ ലഭ്യമാക്കും. കേടുപാടുകൾ സംഭവിച്ച വാഹനങ്ങൾ, കന്നുകാലികൾ, സ്വത്തുക്കൾ എന്നിവയുടെ ഇൻഷുറൻസ് ക്ലെയിമുകൾ വേഗത്തിൽ തീർപ്പാക്കാൻ ഇൻഷുറൻസ് കമ്പനികളോട് ആവശ്യപ്പെടുമെന്ന് മുഖ്യമന്ത്രി ഹിമന്ത ബിശ്വ ശർമ്മ വ്യക്തമാക്കി.
ചരായിദേവ്, ശിവസാഗർ, ജോർഹാട്ട്, ഗോലാഘട്ട് എന്നീ ഏറ്റവും കൂടുതൽ ദുരിതം അനുഭവിച്ച നാല് ജില്ലകളിലെ ബാങ്ക് ഉപഭോക്താക്കൾക്ക് വായ്പ തിരിച്ചടവിൽ 6 മാസത്തെ മൊറട്ടോറിയം നൽകാൻ തീരുമാനിച്ചിട്ടുണ്ട്. ബാങ്ക് ഇതര ധനകാര്യ സ്ഥാപനങ്ങളോടും (NBFC) സമാനമായ ഇളവുകൾ നൽകാൻ ആവശ്യപ്പെടും. കൂടാതെ, പ്രധാനമന്ത്രി സൂര്യഘർ പദ്ധതിക്ക് കീഴിൽ പ്രളയബാധിത പ്രദേശങ്ങളിലെ 9,289 ഗുണഭോക്താക്കൾക്കായി 41.67 കോടി രൂപയുടെ സംസ്ഥാന സബ്സിഡി തുക ചൊവ്വാഴ്ചയ്ക്കകം നേരിട്ട് ബാങ്ക് അക്കൗണ്ടുകളിലേക്ക് കൈമാറാൻ വൈദ്യുതി വകുപ്പിന് മുഖ്യമന്ത്രി നിർദ്ദേശം നൽകി.
Story Summary
Severe floods in Assam continue to affect nearly 1.93 lakh people across five districts, with two fresh deaths raising this year’s total toll to 82. The Assam government has announced relief packages, including a six-month loan moratorium and expedited insurance claim settlements for affected families in the worst-hit regions.
