ന്യൂഡൽഹി: കേന്ദ്ര സർക്കാരിന്റെ ഇ20 എഥനോൾ മിശ്രിത പെട്രോൾ നയത്തിനെതിരെ നടത്താനിരുന്ന സമാധാനപരമായ പ്രതിഷേധത്തിന് മുന്നോടിയായി തന്നെ ഡൽഹി പോലീസ് വീട്ടുതടങ്കലിലാക്കിയതായി രാഷ്ട്രീയ നിരീക്ഷണകനും സംരംഭകനുമായ തെഹസീൻ പൂനാവാല. ഗ്രേറ്റർ കൈലാഷ്-1 ലെ വസതിയിലാണ് വൻ പോലീസ് സംഘം എത്തി അദ്ദേഹത്തിന്റെ സഞ്ചാരസ്വാതന്ത്ര്യം തടഞ്ഞത്.(Tehseen Poonawalla House Arrested By Delhi Police Over Ethanol Protest)
കേന്ദ്ര ഉപരിതല ഗതാഗത വകുപ്പ് മന്ത്രി നിതിൻ ഗഡ്കരി നിർദ്ദേശിച്ച എഥനോൾ നയത്തിനെതിരെ ‘ടീം ഭാരത്’ എന്ന കൂട്ടായ്മയുടെ ബാനറിൽ നിരാഹാര സമരവും മൗനവ്രതവും നടത്താൻ പൂനാവാല മുൻകൂട്ടി തീരുമാനിച്ചിരുന്നു. ഓഗസ്റ്റ് 1 ശനിയാഴ്ച രാവിലെ എ.പി.ജെ അബ്ദുൾ കലാം റോഡിൽ നിന്ന് ഗാന്ധി സ്മൃതിയിലേക്ക് നടത്തുന്ന പദയാത്രയോടെ സമരം ആരംഭിക്കാനിരിക്കെയാണ് പോലീസിന്റെ ഇടപെടൽ.
“രേഖകളോ ഉത്തരവോ ഇല്ലാതെ തടങ്കൽ”
വീട്ടുതടങ്കലിലാക്കപ്പെട്ട വിവരം സോഷ്യൽ മീഡിയ പ്ലാറ്റ്ഫോമായ ‘എക്സി’ലൂടെ ചിത്രങ്ങളും വീഡിയോകളും പങ്കുവെച്ചാണ് പൂനാവാല പുറത്തുവിട്ടത്. വനിതാ ഉദ്യോഗസ്ഥരടക്കമുള്ള ഡൽഹി പോലീസിലെ വലിയൊരു സംഘം തന്റെ വീട്ടുവാതിക്കൽ തമ്പടിച്ചിരിക്കുന്ന ദൃശ്യങ്ങൾ അദ്ദേഹം പോസ്റ്റ് ചെയ്തു. “എനിക്കെതിരെ കുറ്റപത്രമോ വാറന്റോ മറ്റ് നിയമപരമായ രേഖകളോ ഒന്നുമില്ലാതെയാണ് പോലീസ് എന്നെ തടഞ്ഞു വെച്ചിരിക്കുന്നത്. എഥനോൾ നയത്തിലെ അഴിമതിക്കെതിരെ സംസാരിക്കുന്നതിനെ കേന്ദ്ര സർക്കാർ ഭയപ്പെടുന്നു,” പൂനാവാല ആരോപിച്ചു.
സമരം ക്രമസമാധാന പ്രശ്നങ്ങൾക്ക് കാരണമാകുമെന്ന ആശങ്കയിലാണ് നടപടിയെന്ന് വീഡിയോയിൽ ഒരു പോലീസ് ഉദ്യോഗസ്ഥൻ പൂനാവാലയോട് പറയുന്നത് കാണാം. മുൻകൂട്ടി സോഷ്യൽ മീഡിയയിലൂടെ പ്രതിഷേധം പ്രഖ്യാപിച്ചതിനാൽ ആയിരക്കണക്കിന് ആളുകൾ ഒത്തുകൂടാൻ സാധ്യതയുണ്ടെന്ന വിവരം ഉയർന്ന ഉദ്യോഗസ്ഥരിൽ നിന്ന് ലഭിച്ചതിനാലാണ് നടപടിയെന്നും പോലീസ് വിശദീകരിച്ചു. മാധ്യമപ്രവർത്തകർ എത്തിയതോടെ പ്രദേശത്തെ ഇന്റർനെറ്റ് കണക്റ്റിവിറ്റി പോലീസ് ജാം ചെയ്തതായും പൂനാവാല ആരോപിച്ചു.
Story Summary
Political analyst Tehseen Poonawalla claimed that he was placed under house arrest by Delhi Police at his Greater Kailash-1 residence to prevent a peaceful protest against the mandatory E20 ethanol-blended petrol policy. Poonawalla shared videos showing police officers outside his home blocking his movement, alleging that the action was taken without any legal notice or paperwork.
