കൊച്ചി: ഇന്ത്യൻ നാവികസേനയ്ക്കായി കൊച്ചിൻ ഷിപ്പ്യാർഡ് ലിമിറ്റഡ് (Cochin Shipyard) നിർമിച്ച ഏഴാമത് ആന്റി സബ്മറൈൻ വാർഫെയർ ഷാലോ വാട്ടർ ക്രാഫ്റ്റ് (ASW-SWC) ‘മച്ചിലിപട്ടണം’ വിജയകരമായി നീറ്റിലിറക്കി. രാജ്യത്തിന്റെ സമുദ്രസുരക്ഷയും തദ്ദേശീയ പ്രതിരോധ നിർമാണ ശേഷിയും കൂടുതൽ ശക്തിപ്പെടുത്തുന്ന സുപ്രധാന നാഴികക്കല്ലായാണ് ഈ നേട്ടം വിലയിരുത്തപ്പെടുന്നത്.
കൊച്ചിൻ ഷിപ്പ്യാർഡിൽ നടന്ന ചടങ്ങിൽ ഇന്ത്യൻ നാവികസേന വൈസ് അഡ്മിറൽ അതുൽ ആനന്ദിന്റെ പത്നി ഗുൽറുഖ് ആനന്ദ് കപ്പലിന്റെ ലോഞ്ചിങ് നിർവഹിച്ചു. വൈസ് അഡ്മിറൽ അതുൽ ആനന്ദ് ചടങ്ങിൽ മുഖ്യാതിഥിയായി പങ്കെടുത്തു.
ഇന്ത്യൻ നാവികസേനയ്ക്കായി നിർമ്മിച്ചുവരുന്ന എട്ട് ASW-SWC യുദ്ധക്കപ്പലുകളുടെ ശ്രേണിയിലെ ഏഴാമത്തെ കപ്പലാണ് ‘മച്ചിലിപട്ടണം’. പൂർണമായും തദ്ദേശീയ സാങ്കേതികവിദ്യ ഉപയോഗിച്ച് രൂപകൽപ്പന ചെയ്ത് നിർമിച്ച ഈ കപ്പൽ ‘ആത്മനിർഭർ ഭാരത്’ ദൗത്യത്തിന്റെ ഭാഗമായി പ്രതിരോധ മേഖലയിലെ ഇന്ത്യയുടെ സ്വയംപര്യാപ്തതയ്ക്ക് കരുത്തേകുന്നതാണ്.
78 മീറ്റർ നീളവും ഏകദേശം 900 ടൺ ഭാരവുമുള്ള യുദ്ധക്കപ്പലിന് മണിക്കൂറിൽ 25 നോട്ടിക്കൽ മൈൽ വരെ വേഗത്തിൽ സഞ്ചരിക്കാനാകും. പരമാവധി 1,800 നോട്ടിക്കൽ മൈൽ ദൂരം സഞ്ചരിക്കാൻ ശേഷിയുള്ള കപ്പലിൽ അത്യാധുനിക സോണാർ സംവിധാനങ്ങളും സമുദ്രാന്തർ നിരീക്ഷണത്തിനും അന്തർവാഹിനികളെ കണ്ടെത്തുന്നതിനുമായി നൂതന സാങ്കേതിക ഉപകരണങ്ങളും സജ്ജീകരിച്ചിട്ടുണ്ട്.
ആന്ധ്രാപ്രദേശിലെ കൃഷ്ണ ജില്ലയിൽ സ്ഥിതി ചെയ്യുന്ന ചരിത്രപ്രസിദ്ധമായ തുറമുഖ നഗരമായ മച്ചിലിപട്ടണത്തിന്റെ പേരാണ് ഈ യുദ്ധക്കപ്പലിന് നൽകിയിരിക്കുന്നത്.
ചടങ്ങിൽ കൊച്ചിൻ ഷിപ്പ്യാർഡ് ചെയർമാനും മാനേജിംഗ് ഡയറക്ടറുമായ ജോസ് വി.ജെ., ഡയറക്ടർമാരായ ഡോ. ഹരികൃഷ്ണൻ എസ്. (ഓപ്പറേഷൻസ്), രാജേഷ് ഗോപാലകൃഷ്ണൻ (ടെക്നിക്കൽ), റിയർ അഡ്മിറൽ ദീപക് സിംഗാൾ വി.എസ്.എം., ചീഫ് വിജിലൻസ് ഓഫീസർ ഡോ. സി. പാണ്ടി സെൽവ ദുരൈ (IOFS), കപ്പൽ നിർമാണത്തിന് നേതൃത്വം നൽകിയ അനുപ് മേനോൻ (WPS-കൊച്ചി), ദക്ഷിണ നാവികസേനയിലെ മുതിർന്ന ഉദ്യോഗസ്ഥർ എന്നിവർ പങ്കെടുത്തു.
ഇതിന് മുമ്പ് ഐഎൻഎസ് മാഹി, ഐഎൻഎസ് മാൽവൻ, ഐഎൻഎസ് മാംഗ്രോൾ, ഐഎൻഎസ് മാൽപേ, ഐഎൻഎസ് മുൾക്കി, ഐഎൻഎസ് മഗ്ദല എന്നീ ആറ് ASW-SWC കപ്പലുകളും കൊച്ചിൻ ഷിപ്പ്യാർഡ് വിജയകരമായി നീറ്റിലിറക്കിയിരുന്നു.
ഇന്ത്യൻ നാവികസേനയും കൊച്ചിൻ ഷിപ്പ്യാർഡും ചേർന്ന് വികസിപ്പിക്കുന്ന ഈ യുദ്ധക്കപ്പൽ ശ്രേണി സമുദ്രാതിർത്തി സുരക്ഷ ശക്തിപ്പെടുത്തുന്നതിനും അന്തർവാഹിനി ഭീഷണികളെ ഫലപ്രദമായി നേരിടുന്നതിനും നിർണായക പങ്കുവഹിക്കുമെന്നാണ് വിലയിരുത്തൽ.
Story Summary:
Cochin Shipyard has launched ‘Machilipatnam’, the seventh Anti-Submarine Warfare Shallow Water Craft built for the Indian Navy. The indigenously designed warship is expected to significantly enhance India’s coastal and underwater defence capabilities.
