ചെന്നൈ: തിരുപ്പരൻകുന്ദ്രം ദീപം തെളിക്കൽ വിഷയത്തിൽ നിലവിലെ രീതി തന്നെ തുടരുമെന്ന ടിവികെ (TVK) സർക്കാരിന്റെ തീരുമാനം രാഷ്ട്രീയ കേന്ദ്രങ്ങളിൽ ചർച്ചയാകുന്നു. വിഷയത്തിൽ കൃത്യമായ നിലപാട് സ്വീകരിച്ച സർക്കാരിനെ പ്രശംസിച്ച് ഇടതുപാർട്ടികളും ഡിഎംകെ സഖ്യത്തിലെ മനിതനേയ മക്കൾ കക്ഷിയും രംഗത്തെത്തി. തിരുപ്പരൻകുന്ദ്രത്ത് രാഷ്ട്രീയം കളിക്കാൻ ആരെയും അനുവദിക്കില്ലെന്ന് നിയമമന്ത്രി സി.ടി.ആർ. നിർമൽ കുമാർ നേരത്തെ വ്യക്തമാക്കിയിരുന്നു.(TVK Government Firm on Thirupparankundram Deepam Lighting Controversy)
ടിവികെയുടേത് ശരിയായ തീരുമാനമാണെന്ന് സിപിഐ സംസ്ഥാന സെക്രട്ടറി വീരപാണ്ഡ്യൻ പ്രതികരിച്ചു. മുഖ്യമന്ത്രി ജോസഫ് വിജയിയും സർക്കാരും വർഗീയ ശക്തികളുടെ സമ്മർദത്തിന് വഴങ്ങാതെ ഈ മതേതര നിലപാടിൽ ഉറച്ചുനിൽക്കണമെന്ന് മനിതനേയ മക്കൾ കക്ഷിയും ആവശ്യപ്പെട്ടു. ടിവികെ സഖ്യം യഥാർത്ഥ മതേതര പ്രത്യയശാസ്ത്ര സഖ്യമാണെന്നും ബിജെപിയുടെ ‘ബി-ടീം’ എന്ന വിമർശനം പരിഹാസ്യമാണെന്നും മന്ത്രി കെ.ജി. അരുൺരാജ് പറഞ്ഞു. വിജയ് ബിജെപിക്ക് വഴങ്ങില്ലെന്ന് നേരത്തെ തന്നെ തെളിയിച്ചതാണെന്നും അദ്ദേഹം കൂട്ടിച്ചേർത്തു.
തിരുപ്പരൻകുന്ദ്രം മലയിൽ സിക്കന്തർ ദർഗ്ഗയോട് ചേർന്ന് കാർത്തിക ദീപം തെളിക്കണമെന്ന മദ്രാസ് ഹൈക്കോടതി സിംഗിൾ ബെഞ്ച് വിധി വലിയ വിവാദങ്ങൾക്ക് തിരികൊളുത്തിയിരുന്നു. മുൻ വർഷങ്ങളിൽ എന്താണോ നടന്നുപോന്നത്, അത് തന്നെ തുടരുമെന്നും ഡിഎംകെ സർക്കാരിനോട് ചേർന്ന് നിൽക്കുന്ന നിലപാടാണ് തങ്ങളുടേതെന്നും മന്ത്രി നിർമൽ കുമാർ വ്യക്തമാക്കി. തിരുപ്പരൻകുന്ദ്രത്തെ സമാധാനം തകർക്കാൻ ഒരു മതശക്തിയെയും അനുവദിക്കില്ലെന്നും, നൂറു ശതമാനവും പ്രദേശവാസികളുടെ താൽപ്പര്യങ്ങൾക്കൊപ്പമാണ് സർക്കാർ നിലകൊള്ളുന്നതെന്നും ടിവികെ വ്യക്തമാക്കി.
Story Summary
The TVK government in Tamil Nadu has received praise from Left parties and alliance partners for its firm stance on the Thirupparankundram deepam lighting controversy, confirming that traditional practices will be maintained. Minister C.T.R. Nirmal Kumar asserted that the government would not allow communal forces to disrupt the peace in the region, prioritizing the interests of the local community over political pressures.
