റിപ്പോർട്ട്: അൻവർ ഷരിഫ്
മലപ്പുറം: ജിദ്ദയിൽ നിന്നും എയർ ഇന്ത്യ എക്സ്പ്രസ്സ് വിമാനത്തിൽ കരിപ്പൂർ അന്താരാഷ്ട്ര വിമാനത്താവളത്തിൽ എത്തിയതിന് ശേഷം കാണാതായ മലപ്പുറം മുണ്ടുപറമ്പ് സ്വദേശി മുഹമ്മദ് സൽമാൻ സാലിഹിനെ (26) കണ്ടെത്താൻ പോലീസ് അന്വേഷണം ഊർജ്ജിതമാക്കി (Muhammed Salman Salih Missing). ഞായറാഴ്ച (07.06.2026) രാത്രി 9.30-ഓടെ കരിപ്പൂരിലിറങ്ങിയ യുവാവ് എയർപോർട്ടിന് പുറത്തേക്ക് വന്നതിന് ശേഷം വീട്ടിൽ എത്തിയിട്ടില്ലെന്ന് ബന്ധുക്കൾ നൽകിയ പരാതിയിൽ പറയുന്നു. പള്ളിയാളി പീടിയേക്കൽ ഹൗസിലാണ് താമസം.
ഇതേ ദിവസം രാത്രി തന്നെ കരിപ്പൂർ വിമാനത്താവള പരിസരത്ത് നിന്നും പ്രവാസി യാത്രക്കാരെ തട്ടിക്കൊണ്ടുപോയി സ്വർണ്ണവും പണവും കവരാൻ പദ്ധതിയിട്ട 13 അംഗ ‘സ്വർണ്ണം പൊട്ടിക്കൽ’ ക്വട്ടേഷൻ സംഘത്തെ കരിപ്പൂർ പോലീസ് പിടികൂടിയിരുന്നു. കേന്ദ്ര സർക്കാർ സ്വർണ്ണത്തിന്റെ ഇറക്കുമതി തീരുവ 16 ശതമാനമായി ഉയർത്തിയതിന് പിന്നാലെ വിമാനത്താവളങ്ങൾ കേന്ദ്രീകരിച്ച് സ്വർണ്ണക്കടത്ത് മാഫിയകളും കവർച്ചാ സംഘങ്ങളും വീണ്ടും സജീവമായിട്ടുണ്ട്. ഈ സാഹചര്യത്തിൽ, വിമാനമിറങ്ങിയ യുവാവിനെ വിമാനത്താവളത്തിന് പുറത്തുവെച്ച് ഏതെങ്കിലും ക്രിമിനൽ സംഘങ്ങൾ തട്ടിക്കൊണ്ടുപോയതാണോ എന്ന കടുത്ത ആശങ്കയിലാണ് ബന്ധുക്കളും പോലീസും. കാണാതായ മുഹമ്മദ് സൽമാൻ സാലിഹിനെക്കുറിച്ച് എന്തെങ്കിലും തരത്തിലുള്ള വിവരങ്ങൾ ലഭിക്കുന്നവർ 7907581532 എന്ന ഫോൺ നമ്പറിലോ തൊട്ടടുത്തുള്ള പോലീസ് സ്റ്റേഷനിലോ വിവരമറിയിക്കേണ്ടതാണ്.
Summary: A missing person case has been officially registered at the Karipur police station following the mysterious disappearance of 26-year-old Muhammed Salman Salih, a resident of Munduparambu, Malappuram. Salih, the son of Haneefa residing at Palliyali Peediyekkal House, went missing on Sunday night (June 7, 2026) shortly after landing at Calicut International Airport from Jeddah on an Air India Express flight.
