തിരുവനന്തപുരം: കേരള നിയമസഭയിലെ പ്രതിപക്ഷ ഉപനേതൃസ്ഥാനത്തെ (എൽഡിഎഫ് പാർലമെന്ററി പാർട്ടി ഉപനേതൃസ്ഥാനം) ചൊല്ലി ഭരണപക്ഷത്തെ പ്രധാന കക്ഷികൾക്കിടയിൽ ഭിന്നത രൂക്ഷമാകുന്നതിനിടെ ഇന്ന് നിർണായക ഉഭയകക്ഷി ചർച്ച നടക്കും (CPIM CPI Discussion). സിപിഐ സംസ്ഥാന സെക്രട്ടറി ബിനോയ് വിശ്വം സിപിഐഎം സംസ്ഥാന സെക്രട്ടറി എം. വി. ഗോവിന്ദനുമായി നേരിട്ട് കൂടിക്കാഴ്ച നടത്തി വിഷയം ചർച്ച ചെയ്യും. എൽഡിഎഫ് പാർലമെന്ററി പാർട്ടിയിലെ രണ്ടാമത്തെ വലിയ കക്ഷിയായ തങ്ങൾക്ക് ഉപനേതൃസ്ഥാനം വേണമെന്ന ആവശ്യത്തിൽ സിപിഐ ഉറച്ചുനിൽക്കുമ്പോൾ, അത് വിട്ടുനൽകാൻ കഴിയില്ലെന്ന കർശന നിലപാടിലാണ് സിപിഐഎം. ഈ പദവി ലഭിക്കുന്നത് വരെ എൽഡിഎഫിന്റെ പാർലമെന്ററി പാർട്ടി യോഗങ്ങളിൽ നിന്ന് വിട്ടുനിൽക്കുമെന്ന കടുത്ത തീരുമാനത്തിലാണ് സിപിഐ നേതൃത്വം.
ഉപനേതൃസ്ഥാനം സിപിഐയ്ക്ക് നൽകാനാകില്ലെന്ന് കഴിഞ്ഞ ദിവസം നടത്തിയ വാർത്താ സമ്മേളനത്തിൽ എം. വി. ഗോവിന്ദൻ പരസ്യമായി പ്രഖ്യാപിച്ചിരുന്നു. ഇതേത്തുടർന്ന് ഇരുപാർട്ടികളും തമ്മിലുള്ള ബന്ധത്തിൽ കടുത്ത അസ്വാരസ്യങ്ങൾ പുകയുന്ന പശ്ചാത്തലത്തിലാണ് ഇന്നത്തെ അടിയന്തിര യോഗം വിളിച്ചുചേർത്തിരിക്കുന്നത്. നാളെ സിപിഐ സംസ്ഥാന സെക്രട്ടേറിയറ്റ് യോഗം ചേരാനിരിക്കെയാണ് അതിനു മുന്നോടിയായി ബിനോയ് വിശ്വം സിപിഐഎം നേതൃത്വത്തെ കാണുന്നത്. ഈ തർക്കം കൂടുതൽ വഷളാകാതെ ഒത്തുതീർപ്പിലെത്തിക്കാനുള്ള ശ്രമങ്ങളാണ് ഇരുഭാഗത്തുനിന്നും നടക്കുന്നത്. എങ്കിലും ഇരുപാർട്ടികളും തങ്ങളുടെ നിലപാടുകളിൽ ഉറച്ചുനിൽക്കുന്നത് ചർച്ച സങ്കീർണ്ണമാക്കിയേക്കും.
അതിനിടെ, ഈ വിഷയത്തിൽ സിപിഐ സംസ്ഥാന സെക്രട്ടറി ബിനോയ് വിശ്വം സ്വീകരിച്ച നിലപാടുകൾക്കെതിരെ പാർട്ടിക്കുള്ളിൽ തന്നെ വലിയ വിമർശനങ്ങൾ ഉയരുന്നുണ്ട്. പ്രതിപക്ഷ ഉപനേതൃസ്ഥാനവുമായി ബന്ധപ്പെട്ട തർക്കങ്ങൾ തുടക്കം മുതൽ തന്നെ പരസ്യമായി ഉന്നയിക്കേണ്ടതില്ലായിരുന്നു എന്നാണ് പാർട്ടിയിലെ ഒരു വിഭാഗം നേതാക്കളുടെ അഭിപ്രായം. പരസ്യ പ്രതികരണങ്ങൾ മുന്നണിയുടെ കെട്ടുറപ്പിനെ ബാധിക്കുമെന്നും കൂടുതൽ തന്ത്രപരമായ നീക്കങ്ങളായിരുന്നു നടത്തേണ്ടിയിരുന്നതെന്നും വിമർശനമുണ്ട്. ഇന്നത്തെ ചർച്ചയിലെ തീരുമാനങ്ങൾ എൽഡിഎഫ് മുന്നണിയുടെ ഭാവി രാഷ്ട്രീയ നീക്കങ്ങളിൽ ഏറെ നിർണായകമാകും.
Summary: A crucial meeting will be held today between CPIM State Secretary M V Govindan and CPI State Secretary Binoy Viswam to resolve the ongoing dispute over the Opposition Deputy Leader post in the LDF parliamentary party. CPI has boycotted LDF parliamentary meetings, demanding the position as the second-largest party, while CPIM remains firm on not conceding it. The discussion comes ahead of the CPI State Secretariat meeting tomorrow, amid internal criticism against Binoy Viswam’s public stance on the issue.
