തിരുവനന്തപുരം: കേരളത്തിന്റെ പുതിയ മുഖ്യമന്ത്രിയായി തിരഞ്ഞെടുക്കപ്പെട്ട വി.ഡി. സതീശന്റെ സത്യപ്രതിജ്ഞാ ചടങ്ങുകൾ തിങ്കളാഴ്ച തിരുവനന്തപുരത്ത് നടക്കും. സെൻട്രൽ സ്റ്റേഡിയത്തിൽ നടക്കുന്ന ചടങ്ങിൽ മുഖ്യമന്ത്രിയോടൊപ്പം ഘടകകക്ഷി നേതാക്കളും സത്യപ്രതിജ്ഞ ചെയ്ത് അധികാരമേൽക്കും. മറ്റ് മന്ത്രിമാരുടെ സത്യപ്രതിജ്ഞ പിന്നീട് ഘട്ടംഘട്ടമായി നടക്കും.(VD Satheesan To Take Oath As Kerala CM On Monday With Ramesh Chennithala Extending Support)
സത്യപ്രതിജ്ഞാ ചടങ്ങിലേക്ക് പ്രമുഖ ദേശീയ നേതാക്കളെയും മറ്റ് സംസ്ഥാനങ്ങളിലെ മുഖ്യമന്ത്രിമാരുമെത്തുമെന്നാണ് സൂചന. ലോക്സഭാ പ്രതിപക്ഷ നേതാവ് രാഹുൽ ഗാന്ധി, പ്രിയങ്ക ഗാന്ധി, കോൺഗ്രസ് അധ്യക്ഷൻ മല്ലികാർജുൻ ഖർഗെ എന്നിവർ ചടങ്ങിനെത്തും. കോൺഗ്രസ് ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാരും ദേശീയ നേതാക്കളും സത്യപ്രതിജ്ഞയ്ക്ക് സാക്ഷ്യം വഹിക്കും. തമിഴ്നാട് മുഖ്യമന്ത്രി വിജയെയും ചടങ്ങിലേക്ക് പ്രത്യേകമായി ക്ഷണിക്കുമെന്ന് അധികൃതർ അറിയിച്ചു.
ഇന്ന് ഡൽഹിയിൽ വെച്ച് നടന്ന വാർത്താസമ്മേളനത്തിൽ ദീപാദാസ് മുൻഷിയാണ് വി.ഡി. സതീശനെ മുഖ്യമന്ത്രിയായി ഔദ്യോഗികമായി പ്രഖ്യാപിച്ചത്. മുഖ്യമന്ത്രി സ്ഥാനത്തേക്ക് പരിഗണിക്കപ്പെടാതിരുന്നതിൽ അതൃപ്തി പ്രകടിപ്പിക്കുന്ന രമേശ് ചെന്നിത്തല നിയമസഭാ കക്ഷി യോഗത്തിൽ പങ്കെടുക്കില്ല. എന്നാൽ, വി.ഡി. സതീശനെ നിയമസഭാ കക്ഷി നേതാവായി തിരഞ്ഞെടുത്ത തീരുമാനത്തിന് പൂർണ്ണ പിന്തുണ നൽകും. പിന്തുണ അദ്ദേഹം കത്ത് വഴി അറിയിക്കും. പുതിയ സർക്കാരിന്റെ രൂപീകരണവും മന്ത്രിസഭാ വിഭജനവും സംബന്ധിച്ച ചർച്ചകൾ പാർട്ടിക്കുള്ളിൽ സജീവമായി പുരോഗമിക്കുകയാണ്.
Story Summary
V.D. Satheesan will take the oath of office as Kerala’s new Chief Minister on Monday at a ceremony in Thiruvananthapuram, attended by prominent national Congress leaders and guest Chief Ministers, including Tamil Nadu CM Vijay. While Ramesh Chennithala has decided to skip the legislature party meeting due to his dissatisfaction with the selection process, he has formally extended his support to the new leader via a letter.
