തിരുവനന്തപുരം: കേരളത്തിന്റെ മുഖ്യമന്ത്രിയെ ഇന്ന് പ്രഖ്യാപിക്കാനിരിക്കെ, ഡൽഹിയിൽ നിന്ന് എഐസിസി പ്രതിനിധികളുടെ സംഘം ചാർട്ടേഡ് വിമാനത്തിൽ തിരുവനന്തപുരത്തേക്ക് തിരിക്കുന്നു. മുകുൾ വാസ്നിക്, അജയ് മാക്കൻ, ദീപ ദാസ് മുൻഷി തുടങ്ങിയ മുതിർന്ന കോൺഗ്രസ് നേതാക്കളാണ് തലസ്ഥാനത്ത് എത്തുക. ഇവർ എത്തിയ ശേഷം നടക്കുന്ന നിയമസഭാകക്ഷി യോഗത്തിൽ മുഖ്യമന്ത്രി ആരാണെന്ന ഔദ്യോഗിക പ്രഖ്യാപനമുണ്ടാകും.(Kerala CM announcement, AICC Observers Head To Kerala For Final Announcement)
ഉന്നത നേതാക്കൾ എത്തുന്നതിനായി സിവിൽ ഏവിയേഷൻ അധികൃതരിൽ നിന്ന് ചാർട്ടേഡ് വിമാനം ലാൻഡ് ചെയ്യുന്നതിനുള്ള പ്രത്യേക അനുമതി കോൺഗ്രസ് തേടിയിട്ടുണ്ട്. വൈകുന്നേരം നാല് മണിയോടെ വിമാനം തിരുവനന്തപുരം വിമാനത്താവളത്തിൽ എത്തും. ഹൈക്കമാൻഡ് പ്രതിനിധികൾ എത്തിയ ശേഷമാകും മുഖ്യമന്ത്രിയെക്കുറിച്ചുള്ള അന്തിമ പ്രഖ്യാപനം നടക്കുക.
രാഹുൽ ഗാന്ധിയുടെ വസതിയിൽ വെച്ച് കെ.സി. വേണുഗോപാൽ നടത്തിയ അടിയന്തര കൂടിക്കാഴ്ച രാഷ്ട്രീയ നിരീക്ഷകർക്കിടയിൽ വലിയ ആകാംക്ഷ ഉളവാക്കിയിട്ടുണ്ട്. മുഖ്യമന്ത്രി സ്ഥാനാർത്ഥി നിർണ്ണയത്തിലെ അന്തിമഘട്ട ചർച്ചകളാണ് നടന്നതെന്നാണ് സൂചന. മുഖ്യമന്ത്രി പ്രഖ്യാപനത്തിന് തൊട്ടുപിന്നാലെ, കെപിസിസി പ്രസിഡന്റ് സണ്ണി ജോസഫിന്റെ നേതൃത്വത്തിൽ യുഡിഎഫ് പ്രതിനിധികൾ ഗവർണറെ കണ്ട് സർക്കാർ രൂപീകരണത്തിനുള്ള അവകാശവാദം ഉന്നയിക്കും. വി.ഡി. സതീശൻ അടക്കമുള്ള നേതാക്കൾ ഇതിനകം തലസ്ഥാനത്ത് എത്തിയിട്ടുണ്ട്. അണികളുടെ വികാരം മാനിച്ചും, പാർട്ടിയിൽ പൂർണ്ണ ഐക്യം ഉറപ്പാക്കിക്കൊണ്ടും സമവായത്തിലൂടെയുള്ള ഒരു പ്രഖ്യാപനത്തിനാണ് ഹൈക്കമാൻഡ് മുൻഗണന നൽകുന്നത്.
Story Summary
High-level suspense continues as Kerala awaits its new Chief Minister today, May 14, 2026. A chartered flight carrying AICC observers Mukul Wasnik, Ajay Maken, and Deepa Dasmunshi is expected to land in Thiruvananthapuram by 4:00 PM. While the Congress Legislative Party meeting is scheduled for 1:00 PM, the official announcement of the Chief Minister is likely to follow the arrival of these central observers. KPCC President Sunny Joseph will formally stake the claim to form the government with the Governor shortly after the final decision is reached.
