ചെന്നൈ: തമിഴ് സിനിമാ പ്രേമികൾ ഏറെ പ്രതീക്ഷയോടെ കാത്തിരുന്ന സൂര്യ-തൃഷ ചിത്രം ‘കറുപ്പി’ന്റെ ആദ്യ ദിന പ്രദർശനം പ്രതിസന്ധിയിൽ. തമിഴ്നാട് മുഖ്യമന്ത്രി വിജയ് പ്രത്യേക അനുമതി നൽകിയിരുന്ന 9 മണി ഷോകൾ സാങ്കേതിക കാരണങ്ങളാൽ റദ്ദാക്കിയതായി നിർമ്മാതാവ് എസ്.ആർ. പ്രഭു അറിയിച്ചു ( Karuppu Special Shows Cancelled). സിനിമ റിലീസ് ചെയ്യുന്ന ഇന്ന് (വ്യാഴാഴ്ച) പുലർച്ചെയാണ് ആരാധകരെ നിരാശരാക്കിക്കൊണ്ട് ഈ ഔദ്യോഗിക അറിയിപ്പ് വന്നത്.
വർഷങ്ങൾക്ക് ശേഷം തമിഴ്നാട്ടിൽ ബിഗ് ബജറ്റ് ചിത്രങ്ങൾക്ക് പുലർച്ചെയുള്ള ഷോകൾക്ക് മുഖ്യമന്ത്രി വിജയ് അനുമതി നൽകിയത് വലിയ ആവേശമായിരുന്നു സൃഷ്ടിച്ചത്. ആദ്യ രണ്ട് ദിവസങ്ങളിൽ അഞ്ച് ഷോകൾ വീതം നടത്താനായിരുന്നു അനുമതി. എന്നാൽ റിലീസ് ദിവസം രാവിലെ ഒമ്പത് മണി ഷോകൾ അപ്രതീക്ഷിതമായി റദ്ദാക്കിയത് ആരാധകരെ പ്രകോപിപ്പിച്ചിട്ടുണ്ട്. 32 മാസത്തെ നീണ്ട കാത്തിരിപ്പിന് ശേഷം പുറത്തിറങ്ങുന്ന ചിത്രം പല തടസ്സങ്ങളെയും അതിജീവിച്ചാണ് ഇവിടെ വരെ എത്തിയതെന്നും ഇപ്പോഴത്തെ പ്രതിസന്ധിയും മാറുമെന്ന് പ്രതീക്ഷിക്കുന്നതായും സംവിധായകൻ ആർ.ജെ. ബാലാജി പറഞ്ഞു.
തമിഴ്നാട്ടിൽ മാത്രമാണോ അതോ കേരളം ഉൾപ്പെടെയുള്ള മറ്റ് സംസ്ഥാനങ്ങളിലും ഷോകൾ റദ്ദാക്കിയിട്ടുണ്ടോ എന്ന കാര്യത്തിൽ വ്യക്തത വന്നിട്ടില്ല. സൂര്യക്കും തൃഷയ്ക്കും പുറമെ ഇന്ദ്രൻസ്, നട്ടി, സ്വാസിക, ശിവദ തുടങ്ങിയ വലിയ താരനിര തന്നെ ചിത്രത്തിൽ അണിനിരക്കുന്നുണ്ട്. ടിക്കറ്റ് ബുക്ക് ചെയ്ത ആരാധകർ സോഷ്യൽ മീഡിയയിലൂടെ തങ്ങളുടെ പ്രതിഷേധം അറിയിക്കുന്നുണ്ട്.
Summary: The 9 AM special shows of Suriya and Trisha’s film ‘Karuppu’ have been cancelled in Tamil Nadu due to unavoidable reasons, despite special permission from CM Vijay. Producer SR Prabhu and Director RJ Balaji expressed their apologies and hope to resolve the hurdles soon. Fans who booked early shows expressed disappointment on social media.
