സന്നദ്ധ പ്രവർത്തകരുടെ മരണത്തിൽ ഇസ്രയേലിനെ വിമർശിച്ച് സഖ്യ കക്ഷികൾ
Apr 4, 2024, 14:19 IST
വാഷിംഗ്ടൺ ഡിസി: ഗാസയിൽ ഇസ്രായേൽ ആക്രമണത്തിൽ വേൾഡ് സെൻട്രൽ കിച്ചണിന്‍റെ ഏഴു പ്രവർത്തകർ കൊല്ലപ്പെട്ട സംഭവത്തിൽ പ്രതിഷേധം ശക്തം. അടുത്ത സുഹൃത്തുക്കളായ യു.എസും ബ്രിട്ടനും ഇസ്രായേലിനെ വിമർശിച്ചത് വളരെ കാഠിന്യമേറിയ വാക്കുകളിൽ തന്നെയാണ്. യു.എസ്. പ്രസിഡന്‍റ് ജോ ബൈഡൻ പ്രതികരിച്ചത് ഹൃദയഭേദകമായ ഈ സംഭവത്തിൽ താൻ അത്യധികം ക്ഷുഭിതനാണെന്നാണ്. ഇസ്രായേൽ ഗാസയിലെ സന്നദ്ധപ്രവർത്തകരുടെ സംരക്ഷണത്തിനു വേണ്ടതൊന്നും ചെയ്യുന്നില്ലെന്നും ബൈഡൻ ആരോപണമുന്നയിച്ചു. ബ്രിട്ടീഷ് വിദേശകാര്യ മന്ത്രാലയം 12 വർഷത്തിനിടയ്ക്ക് ആദ്യമായി ഇസ്രായേൽ അംബാസഡറെ വിളിച്ചുവരുത്തുകയും വിശദീകരണം ആരായുകയും ചെയ്തു.