യുക്രെയ്നിലെ നാല് മേഖലകളിലെ ഹിതപരിശോധന ഇന്ന് ആരംഭിക്കും
Sep 23, 2022, 09:20 IST
കീവ്: റഷ്യൻ നിയന്ത്രണത്തിലുള്ള നാല് യുക്രെയ്ൻ പ്രദേശങ്ങളിൽ റഷ്യാ അനുകൂല നിലപാട് അറിയാൻ ഹിതപരിശോധന നടത്തും. ലുഹാൻസ്ക്, ഡൊണെറ്റ്സ്ക്, ഖേഴ്സൻ, സാപോറീഷ്യ പ്രദേശങ്ങൾ റഷ്യയിൽ ചേരണോ എന്ന് വോട്ടെടുപ്പിലൂടെ തീരുമാനിക്കുന്നതാണ് ഹിതപരിശോധന. അതേസമയം, പ്രദേശങ്ങൾ റഷ്യൻ സൈന്യത്തിന്റെ അധീനതിയലായതിനാലും സുതാര്യത ഉറപ്പില്ലാത്തതിനാലും വോട്ടെടുപ്പിൽ റഷ്യയുടെ വിജയം ഏറെക്കുറെ ഉറപ്പാണ്. വെള്ളിയാഴ്ച മുതൽ ചൊവ്വാഴ്ച വരെയാണ് ഹിതപരിശോധന. എന്നാൽ റഷ്യയുടെ നടപടി നിയമവിരുദ്ധമാണെന്നും പ്രദേശങ്ങൾ പിടിച്ചെടുക്കാനുള്ള തന്ത്രമാണെന്നും വ്യാപക വിമർശനമുണ്ട്. അധിനിവേശ ശ്രമങ്ങൾക്ക് യുക്രെയൻ ശക്തമായ തിരിച്ചടി നൽകിയതും ആഗോള തളത്തിൽ പ്രതിഛായ മോശമായതുമാണ് ഹിതപരിശോധന നടത്തി മുഖംമിനുക്കാനുള്ള റഷ്യൻ നീക്കത്തിന് പ്രേരണയായത്.