ഇറാക്കിൽ ഐഎസ് ഭീകരർ ചെക്പോയിന്റ് ആക്രമിച്ചു; 50 പേർ കൊല്ലപ്പെട്ടു
നസിറിയ: ദക്ഷിണ ഇറാക്കിൽ ഇസ്ലാമിക് സ്റ്റേറ്റ് ഭീകരർ പോലീസ് ചെക്പോയിന്റിനും റെസ്റ്റോറന്റിനും നേരെ നടത്തിയ ചാവേർ ആക്രമണത്തിൽ 50 പേർ കൊല്ലപ്പെട്ടു. 80ൽ അധികം പേർക്കു പരിക്കേറ്റു.
ദി ഖർ പ്രവിശ്യയിലെ നസിറിയയിൽ പോലീസ് ചെക്പോയിന്റിനു നേരെയായിരുന്നു ആക്രമണം. ആദ്യം സ്ഫോടക വസ്തുക്കൾനിറച്ച കാർ പൊട്ടിച്ചു. പിന്നാലെ ചെക്പോയിന്റിനു തൊട്ടടുത്ത് സ്ഥിതിചെയ്യുന്ന റെസ്റ്റോറന്റിനുള്ളിൽ മറ്റൊരു ഭീകരൻ പൊട്ടിത്തെറിച്ചു. ഈ സ്ഥലങ്ങളിലേക്കു സുരക്ഷാസേനയുടെ ശ്രദ്ധതിരിഞ്ഞ സയമയം നാലു ഭീകരർ ചെക്പോയിന്റിനുനേരെ വെടിയുതിർക്കുകയായിരുന്നു. പരിക്കേറ്റവരിൽ ചിലരുടെ നില ഗുരുതരമായതിനാൽ മരണസംഖ്യ ഉയരാൻ സാധ്യതയുണ്ടെന്ന് പോലീസ് പറഞ്ഞു.