കോണ്‍ഗ്രസിന്‍റെ കാര്യം നോക്കാന്‍ തങ്ങൾക്കറിയാമെന്ന് കെ.സി.വേണുഗോപാല്‍
Updated: Apr 4, 2024, 13:27 IST
തിരുവനന്തപുരം: മുഖ്യമന്ത്രി രാഹുല്‍ ഗാന്ധിയുടെ റോഡ് ഷോയില്‍ ലീഗിന്‍റെ പതാക ഒഴിവാക്കിയതിനെതിരെ നടത്തിയ വിമർശനത്തിൽ പ്രതികരണവുമായി മുതിർന്ന കോൺഗ്രസ് നേതാവും ആലപ്പുഴയിലെ യു.ഡി.എഫ്. സ്ഥാനാർഥിയുമായ കെ.സി.വേണുഗോപാല്‍. മുഖ്യമന്ത്രിയുടെ ഉപദേശം ഇക്കാര്യത്തിൽ ആവശ്യമില്ലെന്നും കോണ്‍ഗ്രസിന്‍റെ കാര്യം നോക്കാൻ തങ്ങള്‍ക്കറിയാമെന്നും അദ്ദേഹം പറഞ്ഞു. രാഹുൽ ഗാന്ധിയെ വിമർശിക്കുകയാണ് മുഖ്യമന്ത്രിയുടെ ഏക അജണ്ടയെന്നും അദ്ദേഹം മോദിയെക്കുറിച്ച് ഒരക്ഷരം പോലും മിണ്ടുന്നില്ലെന്നും പറഞ്ഞ കെ.സി.വേണുഗോപാൽ രാഹുലിനെതിരെയുള്ള വിമര്‍ശനം തങ്ങള്‍ സ്വാഗതം ചെയ്യുകയാണെന്ന് കൂട്ടിച്ചേർത്തു. മുഖ്യമന്ത്രി പ്രവര്‍ത്തിക്കേണ്ടത് സിദ്ധാര്‍ഥനെപ്പോലുള്ളവര്‍ക്ക് നീതി ലഭ്യമാക്കാൻ വേണ്ടിയാണെന്നും, കേസിലെ പ്രതികളെ എന്തുകൊണ്ടാണ് പോലീസ് സംരക്ഷിക്കാൻ ശ്രമിച്ചതെന്ന് വ്യക്തമാക്കണമെന്നും കെ.സി.വേണുഗോപാൽ പറഞ്ഞു.