500 രൂപയ്ക്ക് എൽപിജി, വനിതകൾക്ക് പ്രതിമാസം 2,500 രൂപ സഹായം; തെലുങ്കാന പിടിക്കാൻ വാഗ്‌ദാനങ്ങളുമായി കോൺഗ്രസ്
ഹൈദരാബാദ്: തെലുങ്കാന നിയമസഭാ തെരഞ്ഞെടുപ്പിനുള്ള വാഗ്ദാന പട്ടിക അവതരിപ്പിച്ച് കോൺഗ്രസ്. ഹൈദരാബാദിലെ തുക്കുഗുഡയിൽ സംഘടിപ്പിച്ച പൊതുസമ്മേളനത്തിൽ മുൻ എഐസിസി അധ്യക്ഷ സോണിയ ഗാന്ധി ആണ് വാഗ്ദാനങ്ങൾ പ്രഖ്യാപിച്ചത്. കർണാടകയിലെ ജനങ്ങളെ കോൺഗ്രസിലേക്ക് അടുപ്പിച്ച അഞ്ച് ഇന വാഗ്ദാനങ്ങൾക്ക് സമാനമായ തരത്തിലുള്ള ഉറപ്പുകളാണ് തെലുങ്കാനയിലെ വോട്ടർമാർക്ക് മുന്നിൽ കോൺഗ്രസ് അവതരിപ്പിക്കുന്നത്.
സംസ്ഥാനത്ത് ഭരണം ലഭിച്ചാൽ, മഹാലക്ഷ്മി പദ്ധതി പ്രകാരം സ്ത്രീകൾക്ക് പ്രതിമാസം 2,500 രൂപ ധനസഹായം നൽകുമെന്നും 500 രൂപയ്ക്ക് എൽപിജി സിലിണ്ടർ നൽകുമെന്നും കോൺഗ്രസ് വാഗ്ദാനം ചെയ്യുന്നുണ്ട്. ടിഎസ്ആർടിസി ബസുകളിൽ സംസ്ഥാനമാകെ സ്ത്രീകൾക്ക് സൗജന്യ യാത്രയും അനുവദിക്കും.