അതിതീവ്ര മഴയ്ക്ക് സാധ്യത; തമിഴ്നാട്ടിൽ വീണ്ടും റെഡ് അലർട്ട്
Nov 26, 2021, 17:00 IST
ചെന്നൈ: അതിതീവ്ര മഴ മുന്നറിയിപ്പിനെ തുടർന്ന് തമിഴ്നാട്ടിലെ മുഴുവൻ തീരദേശ ജില്ലകളിലും റെഡ് അലർട്ട് പ്രഖ്യാപിച്ചു. തലസ്ഥാനമായ ചെന്നൈ ഉൾപ്പടെയുള്ള 16 ജില്ലകളിലാണ് കാലാവസ്ഥാ വകുപ്പ് മുന്നറിയിപ്പ് നൽകിയിരിക്കുന്നത്. കാരയ്ക്കൽ, പുതിച്ചേരി എന്നിവടങ്ങളിലും റെഡ് അലർട്ട് പ്രഖ്യാപിച്ചിട്ടുണ്ട്.രണ്ടു ദിവസം തമിഴ്നാടിന്റെ വിവിധ ഇടങ്ങളിൽ അതിതീവ്ര മഴയുണ്ടാകുമെന്നാണ് കാലാവസ്ഥാ പ്രവചനം. കനത്ത മഴയെത്തുടർന്ന് ചെന്നൈ നഗരത്തിന്റെ പല ഭാഗത്തും വെള്ളപ്പൊക്കം രൂക്ഷമാണ്. നിരവധി പേരെ സുരക്ഷിത സ്ഥലത്തേക്ക് മാറ്റിപ്പാർപ്പിച്ചിട്ടുണ്ട്. ശക്തമായ മഴയ്ക്ക് പുറമേ കനത്ത കാറ്റുണ്ടാകുമെന്നാണ് കാലാവസ്ഥാ നിരീക്ഷണ കേന്ദ്രം മുന്നറിയിപ്പിൽ വ്യക്തമാക്കിയിട്ടുണ്ട്.