ദിലീപിനെതിരേ തെളിവുകൾ കൈമാറിയെന്ന് ബാലചന്ദ്രകുമാർ
Jan 11, 2022, 17:04 IST
കൊച്ചി: നടിയെ ആക്രമിച്ച കേസിലും അന്വേഷണ ഉദ്യോഗസ്ഥരെ വധിക്കാൻ പദ്ധതിയിട്ടെന്ന കേസിലും നടൻ ദിലീപിനെതിരേ സംവിധായകൻ ബാലചന്ദ്രകുമാർ ക്രൈംബ്രാഞ്ചിന് തെളിവുകൾ കൈമാറി. കളമശേരിയിലെ ക്രൈംബ്രാഞ്ച് ഓഫീസിൽ വിളിച്ചുവരുത്തിയാണ് ബാലചന്ദ്രകുമാറിൽ നിന്നും അന്വേഷണ സംഘം മൊഴിയെടുത്തത്. തന്‍റെ പക്കലുള്ള ഫോണ് റിക്കോർഡുകൾ അടക്കമുള്ള ഡിജിറ്റൽ തെളിവുകൾ അന്വേഷണ സംഘത്തിന് നൽകിയാതായി ചന്ദ്രകുമാർ മാധ്യമങ്ങളോട് പറഞ്ഞു. . താൻ നൽകിയ ശബ്ദരേഖ ദിലീപിന്‍റേതല്ലെന്ന് അദ്ദേഹം പോലും നിഷേധിച്ചിട്ടില്ല. ദിലീപ് സാക്ഷികളെ സ്വാധീനിക്കാൻ ശ്രമിച്ചതിന്‍റെ തെളിവുകളും അന്വേഷണ സംഘത്തിന് കൈമാറി. താൻ പോലീസുമായി ചേർന്ന് ഗുഢാലോചന നടത്തുന്നുവെന്ന ആരോപണം തെറ്റാണ്. അന്വേഷണ ഉദ്യോഗസ്ഥരെ താൻ മുൻപ് കണ്ടിട്ടുണ്ടെങ്കിൽ തെളിവ് ഹാജരാക്കണമെന്നും ബാലചന്ദ്രകുമാർ പറഞ്ഞു.