കൊച്ചി: മലയാള സിനിമയിൽ താൻ ഇന്നും സജീവമായി തുടരാൻ കാരണം സുഹൃത്തുക്കളുടെ പിന്തുണയാണെന്ന് നടൻ അജു വർഗീസ്. വിനീത് ശ്രീനിവാസൻ മാത്രമല്ല, നിവിൻ പോളി, മിഥുൻ മാനുവൽ തോമസ്, ബാലാജി തുടങ്ങി നിരവധി സുഹൃത്തുക്കളാണ് തന്റെ കരിയറിലെ നിർണായക ഘട്ടങ്ങളിൽ ഒപ്പമുണ്ടായതെന്ന് അദ്ദേഹം പറഞ്ഞു. (Aju Varghese on Friends Support)
“വിനീത് ശ്രീനിവാസൻ ഉള്ളതുകൊണ്ട് ജീവിച്ചുപോകുന്ന ഒരു ജീവി” എന്ന രീതിയിൽ സമൂഹമാധ്യമങ്ങളിൽ പ്രചരിച്ച ട്രോൾ തനിക്ക് ഏറെ ഇഷ്ടപ്പെട്ടതാണെന്നും അതിൽ അഭിമാനമേയുള്ളുവെന്നും അജു പറഞ്ഞു. “ഞാൻ ജീവിക്കുന്നത് എന്റെ സുഹൃത്തുക്കൾ കാരണമാണ്. അവർ തന്നെയാണ് പല അവസരങ്ങളിലും എന്നെ മുന്നോട്ട് നയിച്ചത്,” എന്നും അദ്ദേഹം കൂട്ടിച്ചേർത്തു.
തന്റെ നിരവധി സിനിമകളിലും സുഹൃത്തുക്കളുടെ വിശ്വാസമാണ് അവസരങ്ങൾ ലഭിക്കാൻ കാരണമായതെന്ന് അജു വ്യക്തമാക്കി. ‘കറുപ്പ്’ എന്ന ചിത്രത്തിൽ ബാലാജിയുടെ സൗഹൃദം കൊണ്ടാണ് അഭിനയിക്കാൻ കഴിഞ്ഞതെന്നും, ‘ആട്’ മിഥുൻ മാനുവൽ തോമസും ‘സർവ്വം മായ’ നിവിൻ പോളിയും വഴിയാണ് ലഭിച്ചതെന്നും അദ്ദേഹം പറഞ്ഞു. അഖിൽ സത്യൻ ഉൾപ്പെടെ പുതിയ തലമുറ സംവിധായകരുമായുള്ള സൗഹൃദവും തന്റെ സിനിമാജീവിതത്തിന് കരുത്താകുന്നുണ്ടെന്നും അദ്ദേഹം വ്യക്തമാക്കി.
സിനിമാ റിവ്യൂകളെക്കുറിച്ചും അജു തുറന്നുപറഞ്ഞു. സോഷ്യൽ മീഡിയയുടെ കാലത്ത് എല്ലാവർക്കും അഭിപ്രായം പറയാനുള്ള സ്വാതന്ത്ര്യമുണ്ടെന്നും, വിമർശനങ്ങളെ വ്യക്തിപരമായി എടുക്കാറില്ലെന്നും അദ്ദേഹം പറഞ്ഞു. “എന്റെ ചുറ്റുമുള്ള സുഹൃത്തുക്കൾ തന്നെയാണ് ഏറ്റവും വലിയ വിമർശകർ. അതുകൊണ്ട് പുറത്തുനിന്നുള്ള വിമർശനങ്ങൾ എന്നെ അധികം ബാധിക്കാറില്ല,” എന്നും അദ്ദേഹം പറഞ്ഞു. കോവിഡ് കാലഘട്ടം തന്റെ ജീവിതത്തിൽ വലിയ മാറ്റങ്ങൾ സൃഷ്ടിച്ചുവെന്നും അജു വെളിപ്പെടുത്തി. സിനിമയുടെ ഭാവിയെക്കുറിച്ച് ആശങ്ക തോന്നിയതോടെ ഹോട്ടൽ ബിസിനസ് തുടങ്ങുന്നതിനെക്കുറിച്ചുപോലും ആലോചിച്ചിരുന്നുവെന്ന് അദ്ദേഹം പറഞ്ഞു. പത്ത് വർഷത്തിലേറെ സിനിമയിൽ പ്രവർത്തിച്ചിട്ടും സാമ്പത്തിക സുരക്ഷിതത്വം തൃപ്തികരമല്ലെന്ന തിരിച്ചറിവാണ് കഥാപാത്രങ്ങൾ തിരഞ്ഞെടുക്കുന്ന രീതിയിൽ മാറ്റം വരുത്താൻ പ്രേരിപ്പിച്ചതെന്നും അദ്ദേഹം കൂട്ടിച്ചേർത്തു.
അതേസമയം, എം.എ. നിഷാദ് സംവിധാനം ചെയ്യുന്ന പുതിയ ചിത്രം ‘ലർക്കി’ യിൽ ഒരു ട്രൈബൽ ഓഫീസറുടെ കഥാപാത്രത്തെയാണ് അജു അവതരിപ്പിക്കുന്നത്. മനുഷ്യനും വന്യജീവികളും തമ്മിലുള്ള സംഘർഷം പ്രമേയമാക്കുന്ന ചിത്രം സാമൂഹിക പ്രസക്തിയുള്ള വിഷയമാണ് കൈകാര്യം ചെയ്യുന്നതെന്നും, ചിത്രത്തിന്റെ പ്രമേയവും സംവിധായകനുമായുള്ള ബന്ധവുമാണ് അതിന്റെ ഭാഗമാകാൻ പ്രേരിപ്പിച്ചതെന്നും അജു വർഗീസ് പറഞ്ഞു.
Summary: Actor Aju Varghese says his successful career in Malayalam cinema is built on the support of close friends, including Vineeth Sreenivasan, Nivin Pauly and Mithun Manuel Thomas. He also spoke about handling criticism, the impact of the Covid period on his career, and his upcoming film Larki.
